އދ. ގެ އިންސާނީ ހައްގުތަކާ ބެހޭ ކޮމިޓީން ރައީސް ނަޝީދުގެ މަައްސަލަައިގަ މިއަހަރު ގޮތެއް ނިންމާނެ: ޖެންސަރ
ޔޫއެންޑަބްލިއުޖީއޭޑީން، އޮކްޓޯބަރ 2015 ގައި ވަނީ ނަޝީދުގެ ހުކުމް "އާބިޓްރަރީ"ކަމަށް ކަނޑައަޅާ އެމަނިކުފާނު ވަގުތުން މިނިވަން ކުރުމަށް ގޮވާލާފަ
ރައީސް ނަޝީދުގެ ވަކީލު، ފްރީޑަމް ފައުންޑަރގެ ބާނީ ޖެރަޑް ޖެންސަރ
ތޭރަ އަހަރުގެ ޖަލު ހުކުމެއްގައި އިއްވާފައިވާ، ކުރީގެ ރައީސުލްޖުމްހޫރިއްޔާ މުހައްމަދު ނަޝީދުގެ މައްސަލަ އދ. އިންސާނީ ހައްގުތަކާ ބެހޭ ކޮމިޓީއަށް ހުށަހަޅާފައިވާ އިރު، މި އަހަރު ފަހުކޮޅު އެ ކަމުގައި ގޮތެއް ނިންމާނެ ކަމަށް ލަފާކުރެއްވޭ ކަމަށް އެމަނިކުފާނުގެ ނައިނަލްއަގުވާމީ ވަކީލު، ޖެރަޑް ޖެންސަރ ވިދާޅުވެއްޖެއެވެ.
ޖެންސަރ މިހެން ވިދާޅުވީ އެމެރިކާގެ ޔުނިވަރސިޓީ އޮފް މިޝިގަންގައި ހޯމަ ދުވަހުގެ ރޭ ބޭއްވި ޕެނަލް މަޝްވަރާއެއްގައެވެ. މި ޕެނަލްގައި ރައީސް ނަޝީދު ވެސް ބައިވެރިވެވަޑައިގެންނެވިއެވެ.
ދިވެހިރާއްޖެއަކީ އެ ކޮމިޓީގެ ދަށުން އޮންނަ އިންޓަނެޝަނަލް ކޮވެނަންންޓް އޮން ސިވިލް އެންޑް ޕޮލިޓިކަލް ރައިޓްސް (އައިސީސީޕީއާރް)ގައި ސޮއިކޮށްފައިވާ ގައުމެއް ކަން ފާހަގަކުރައްވަމުން ޖެންސަރ ވިދާޅުވީ، ނަޝީދުގެ މައްސަލަ މިހާރު ކުރިއަށް ދަނީ އދ. ގެ އިންސާނީ ހައްގުތަކާ ބެހޭ ކޮމިޓީގައި ކަމަށެވެ.
ރައީސް ނަޝީދަށް 13 އަހަރުގެ ޖަލު ހުކުމެއް އިއްވާފައިވާ ވުމުގެ ސަބަބުން 2018 ވަނަ އަހަރު އޮންނަ ރިޔާސީ އިންތިހާބުގައި އެމަނިކުފާނަށް ބައިވެރިނުވެވޭކަން ޖެންސާ ވަނީ ފާހަގަކުރައްވާފައި ވެއެވެ. ނަމަވެސް ރައީސް ނަޝީދު ރާއްޖެއަށް އެނބުރި ވަޑައިގެން މަސައްކަތް ކުރިއަށް ގެންދެވުމަށް ބޭނުންވެ ވަޑައިގަންނަވާ ކަން އޭނާ ވިދާޅުވިއެވެ.
"އާބިޓްރަރީ ދައުވާއަކާއި ޝަރީއަތަކާއި ހުކުމެއްގެ ސަބަބުން ރައީސް ނަޝީދަށް އިންތިހާބުގައި ބައިވެރި ނުވެވުމަކީ އެއާ އެއްވަރަށް އާބިޓަރްރީ ކަމެއް" ކަމަށް ޖެންސަރ ފާހަގަކުރެއްވިއެވެ. އަދި އޭގެ ސަބަބުން ރައީސް ނަޝީދަށް "ސިޔާސީ ހަރަކާތްތަކުގައި ބައިވެރިވުމުގެ ހައްގު ގެއްލޭ" ކަން ވެސް އޭނާ ފާހަގަކުރެއްވިއެވެ.
މީގެ އިތުރުން، ރައީސް ނަޝީދަށް މިވަގުތު އެމަނިކުފާނުގެ އަމިއްލަ ސިޔާސީ ޕާޓީ ލީޑްކުރުމުގެ ހައްގު ވެސް ނެތް ކަން ކަމަށާއި، އޭގެ ސަބަބުން ވެސް ހައްގުތައް ގެއްލިގެންދާ ކަމަށް ޖެންސަރ ވިދާޅުވިއެވެ.
ޖެންސަރ ވިދާޅުވީ އިންސާނީ ހައްގުތަކާ ބެހޭ ކޮމިޓީގައި ރައީސް ނަޝީދުގެ މައްސަލަ ރައީސް ނަޝީދާ އެއްކޮޅަށް ނިމުމުގެ ބޮޑު އުއްމީދެއް އެބައޮތް ކަމަށެވެ.
ޔުނިވަރސިޓީ އޮފް މިޝިގަންގައި ބޭއްވި ޕެނަލްގައި ވެސް ޖެންސަރ ވަނީ ރައީސް ނަޝީދުގެ ޝަރީއަތުގައި ގާނޫނާ ހިލާފަށް ކުރިއަށް ދިޔަ ބައެއް ކަންކަން ފާހަގަކުރައްވާފައެވެ.
"ބައެއް ފަހަރު މިފަދަ ސަަރުކާރުތަކަށް ކަންތައް ކުރަން އޮންނަ އިޖްރާއަތްތަކެއް ނޭނގޭތީ ކުރެވެނީ އެބިއުޒެއްކަން ނޭނގޭ. އެހެންވެ، ގޯސްކަމެއް ކުރެވޭކަން ނޭނގި، ލަދެއް ނެތި އެކަންކަން ކުރަނީ،" ޖެންސަރ ވިދާޅުވިއެވެ.
ރައީސް ނަޝީދުގެ ގާނޫނީ ޓީމުން މި މައްސަލަ އދ. ގެ ވަރކިންގ ގްރޫޕް އޮން އާބިޓްރަރީ ޑިޓެންޝަން (ޔޫއެންޑަބްލިއުޖީއޭޑީ)އަށް 2015 ވަނަ އަހަރު ހުށަހަޅާފައިވާ އިރު، ޔޫއެންޑަބްލިއުޖީއޭޑީން، އޮކްޓޯބަރ 2015 ގައި ވަނީ ނަޝީދުގެ ހުކުމް "އާބިޓްރަރީ"ކަމަށް ކަނޑައަޅާ އެމަނިކުފާނު ވަގުތުން މިނިވަން ކުރުމަށް ގޮވާލާފައެވެ. ނަމަވެސް ދިވެހި ސަރުކާރުން ބުނީ ޔޫއެންޑަބްލިއުޖީއޭޑީގެ ނިންމުން ބަލައިނުގަންނަ ކަމަށެވެ.
