ޖަމީލުގެ "ނާޤާބިލް" ކަންކަން އެނގިވަޑައިގަންނަވާނީ ރައީސް ޔާމީނަށް، މަޖިލިސް މެމްބަރުންނަކަށް ނޫން: ޖަމީލްގެ ވަކީލު
19 ނޮވެމްބަރު 2020 | ބުރާސްފަތި 10:42ދައުލަތުގެ ގާނޫނީ ވަކީލުން ވިދާޅުވީ މިމައްސަލަ ސުޕްރީމް ކޯޓަށް ނުބެލޭނެ ކަމަށް
ރައީސް ޔާމީނާއެެކު ޖަމީލް: ޖަމީލަކީ ރައީސް ޔާމީންގެ ފުރަތަމަ ނާއިބު ރައީސް
ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ ފުރަތަމަ ނާއިބު ރައީސް ޑރ. މުހައްމަދު ޖަމީލް އަހުމަދު ނާއިބު ރައީސްކަމުގެ މަގާމުން ވަކިކުރެއްވި މައްސަލަ ދުސްތޫރީ މައްސަލައެއްގެ ގޮތުގައި ސުޕްރީމް ކޯޓަށް ހުށަޙާފައިވާތީ، އެމައްސަލައިގެ އަޑުއެހުމެއް ބާއްވައިފި އެވެ.
އެމައްސަލައާ ގުޅިގެން ބުރާސްފަތި ދުވަހު ސުޕްރީމް ކޯޓުގައި ބޭއްވި އަޑުއެހުމުގައި ޖަމީލްގެ ގާނޫނީ ވަކީލު، އަދި ކުރީގެ ޕްރޮސެކިއުޓަރ ޖެނަރަލް (ޕީޖީ) އަހުމަދު މުއިއްޒު ވިދާޅުވީ، ރައީސުލްޖުމްހޫރިއްޔާގެ ނާއިބު ކަމުގެ މަގާމުން ޖަމީލް ވަކިކުރައްވަން މަޖިލީހަށް ހުށަހަޅުއްވާފައިވާ ގަރާރުގައި މައިގަނޑު ގޮތެއްގައި ފާހަގަކޮށްފައިވަނީ "ނާޤާބިލް" ކަމުންކަމަށް ވިދާޅުވިއިރު، ޖަމީލުގެ "ނާޤާބިލް" ކަންކަން އެނގިވަޑައިގަންނަވާނީ ހުދު އޭރުގެ ރައީސް އަބްދުﷲ ޔާމީންއަށް ކަމަށެވެ. އެކަން މަޖިލީހުގެ މެމްބަރުންނަށް ކަނޑަ ނޭޅުއްވޭނެ ކަމަށެެވެ.
ނާއިބު ރައީސް ކަމުގެ މަގާމުން ޖަމީލް ވަކިކުރަން މަޖިލީހަށް ގަރާރު ހުށަހެޅުއްވީ އޭރު ޕީޕީއެމްގެ ޕާލަމެންޓްރީ ގްރޫޕްގެ ލީޑަރު އަހުމަދު ނިހާނު ހުސައިންމަނިކު އެވެ.
މިމައްސަލައާ ގުޅިގެން، ޖަމީލްގެ ފަރާތުން ވަކާލާތު ކުރައްވަމުން މުއިއްޒު ވަނީ، ޖަމީލްގެ އިތުބާރު ނެތްކަމުގެ މައްސަލާގައި ރައްޔިތުންގެ މަޖިލީހަށް ހުށަހެޅި ގަރާރުގައި ވެސް ވިދާޅުވެދެއްވާފަ އެވެ. އެގަރާރުގައި ފާހަގަ ކުރައްވާފައިވަނީ، ރައީސުލްޖުމްހޫރިއްޔާގެ ނާއިބު ކަމުގެ މަގާމުގައި ހުންނެވި ޑރ. މުހައްމަދު ޖަމީލު އަހުމަދު އާ ހަވާލުކުރެވިފައިވާ މަސްއޫލިއްޔަތުތައް އެކަށީގެންވާ ގޮތެއްގައި އަދާކުރައްވަމުން ނުގެންދަވާތީއާއި އެމަސްއޫލިއްޔަތުތައް އެކަށީގެންވާ އަވަސް މިނެއްގައި ރަނގަޅު ނަތީޖާއެއް ނެރެދެއްވުމަށް މަސައްކަތް ކުރައްވަމުން ނުގެންދަވާ ކަމަށެވެ.
އަދި ލިބިވަޑައިގެންފައިވާ ތައުލީމާއި ހުނަރާއި ތަޖުރިބާޔާ އަޅާބަލާއިރު، އެކަށީގެންވާ މިންވަރަކަށް މަސްއޫލިއްޔަތު އަދާކުރައްވަމުން ހަރަކާތްތެރިވެވަޑައި ނުގަންނަވާތީއާއި ސަރުކާރާއި ސަރުކާރުގެ ސިޔާސަތު ކުރިއެރުވުމަށްޓަކައި ދިފާއު ކުރެއްވުމަށް އެކަށީގެންވާ މިންވަރެއްގެ މަސައްކަތެއް ކުރައްވަމުން ނުގެންދަވާ ކަމަށެވެ. މީގެއިތުރުން ސަރުކާރާ އިދިކޮޅު ބައެއް ފަރާތްތަކާ ގޮތްނޭނގޭ ގުޅުންތަކެއް ބާއްވަމުން ގެންދަވާ ކަމަށް ތުހުމަތު ކުރެވޭތީއާއި އެތުހުމަތުތަކަށް ޖަވާބުދާރީވެވަޑައި ނުގަންނަވާތީއާއި ހަވާލު ކުރެވިފައިވާ މަސްއޫލިއްޔަތުތައް އެކަށީގެންވާ މިންވަރަށް އަދާ ނުކުރައްވާ ހާލުގައި، އެކަމާ ނުބައްދަލު ބޮޑެތި ޚަރަދުތަކެއް ދައުލަތުގެ ބަޖެޓުން ކުރައްވަމުން ގެންދަވާތީއާއި ރައީސުލްޖުމްހޫރިއްޔާގެ ނާއިބުގެ މަގާމުގައި ހުންނެވި ޖަމީލު އޭނާގެ މަސްއޫލިއްޔަތު އަދާކުރުމުގައި ނާޤާބިލްވެފައިވާތީ، ރައީސުލްޖުމްހޫރިއްޔާގެ ނާއިބުކަމުން ވަކިކުރަން ހުށަހަޅުއްވާކަމަށް އެގަރާރުގައި ވެއެވެ.
މުއިއްޒު ވިދާޅުވީ ޖަމީލުގެ ނާޤާބިލްކަމާ ގުޅޭގޮތުން ރައީސް ޔާމީންގެ ފަރާތުން އެއްވެސް ބަޔާނެއް އަދި އެއްވެސް ވާހަކަފުޅެއް ވިދާޅުވެފައި ނުވާއިރު، މަޖިލީހުގެ މެމްބަރުންނަށް ޖަމީލުގެ ނާޤާބިލްކަން ބަޔާންކޮށް މަޖިލީހަށް ގަރާރެއް ހުށަހެޅިދާނެ ކަމަށް ގަބޫލު ނުކުރައްވާ ކަމަށެވެ.
ރައީސުލްޖުމްހޫރިއްޔާގެ ނައިބުގެ މަގާމުގައި ހުންނަވާ ބޭފުޅަކު މަގާމުން ވަކިކުރެވިދާނެ ހާލަތްތަކުގެ ތެރޭގައި "ނާޤާބިލުވުން" ގާނޫނުއަސާސީ ބަޔާންކޮށްފައިވެ އެވެ.
މިމައްސަލައާ ގުޅިގެން ދައުލަތުގެ ފަރާތުން ބަންޑާރަ ނައިބުގެ އޮފީހުގެ ގާނޫނީ ވަކީލު ވިދާޅުވީ، ނާއިބު ރައީސް ކަމުގެ މަގާމުން ޖަމީލް ވަކިކުރި މައްސަލަ ސުޕްރީމް ކޯޓަށް ނުބެލޭނެ ކަމަށެވެ.
ދައުލަތުގެ ވަކީލު ވިދާޅުވީ، މަޖިލީހުގެ ނިންމުންތަކުގެ ސައްހަ ކަމުގެ މައްސަލަ ކޯޓުތަކަށް ނުބެލޭނެ ކަމަށް ގާނޫނުއަސާސީގައި ބުނެފައިވާ ކަމަށާއި އޭގެ ބޭނުމަކީ މަޖިލީހުގެ ނިންމުންތަކަށް ހިމާޔަތް ދިނުން ކަމަށް ދައުލަތުގެ ވަކީލު ވިދާޅުވި އެވެ. އަދި އިތުބާރު ނެތްކަމުގެ ވޯޓަކުން ރައީސަކު ވަކިކުރަން ނިންމާ ނިންމުމަކާ މެދު ސުވާލު އުފެދިއްޖެ ނަމަ ސުޕްރީމް ކޯޓަށް އެ މައްސަލަ ބެލޭނެ ކަމަށް ގާނޫނުއަސާސީގައި ބަޔާންކޮށްފައި ވީނަމަވެސް، ނައިބު ރައީސަކު ވަކި ކުރުމާ ގުޅިގެން އުފެދޭ މައްސަލަތައް ސުޕްރީމް ކޯޓަށް ބެލޭނެ ކަމަށް ގާނޫނުއަސާސީގައި ބުނެފައި ނެތް ކަމަށާއި އެެހެންކަމުން އެމައްސަލަ ބެލޭނެ ހަމައެއް ނެތް ކަމަށް ދައުލަތުގެ ވަކީލު ވިދާޅުވި އެވެ.
މި މައްސަލަ ބައްލަވަނީ އުއްތަމަ ފަނޑިޔާރު އަހުމަދު މުއުތަސިމް އަދުނާނުގެ އިތުރުން ފަނޑިޔާރު ޑރ. އަޒްމިރަލްދާ ޒާހިރާއި ފަނޑިޔާރު އައިޝާ ޝުޖޫން މުހައްމަދުގެ އިތުރުން ފަނޑިޔާރު އަލީ ރަޝީދު ހުސައިން އަދި ފަނޑިޔާރު ޑރ. މުހައްމަދު އިބްރާހިމް އެވެ.
