އީސީގެ ނައިބް ރައީސް އަކްރަމް މަޤާމުން ވަކިކުރަން ނިންމައިފި
18 ނޮވެމްބަރު 2020 | ބުދަ 19:37ކޮމިޝަނަރެއްގެ ހުންނަންޖެހޭ ސުލޫކީ މިންގަނޑުތަކަށް އޭނާ އަމަލުތައް ނުފެތޭ
އީސީގެ ނައިބް ރައީސް އަހުމަދު އަކްރަމް
އިލެކްޝަންސް ކޮމިޝަންގެ ނައިބް ރައީސް އަހުމަދު އަކްރަމް މަޤާމުން ވަކިކުރަން ރައްޔިތުންގެ މަޖިލީހުގެ މިނިވަން މުއައްސަސާތަކާއި ބެހޭ ކޮމިޓީން ނިންމައިފިއެވެ.
ރާއްޖެ އެމްވީއަށް މައުލޫމާތު ދެއްވަމުން މިނިވަން މުއައްސަސާތަކާއި ބެހޭ ކޮމިޓީގެ މުޤައްރިރު ރޮޒައިނާ އާދަމް ވިދާޅުވީ އަކުރަމް ވަކިކުރަން ނިންމީ އޭނާގެ މައްޗަށް ޖިންސީ ފުރައްސާރައިގެ ތުހުމަތުކޮށް އެކޮމިޝަންގެ އަންހެން މުވައްޒަފުންތަކެއް ހުށަހެޅި މައްސަލައަކާއި ގުޅިގެން ކޮމިޝަނަރެއްގެ ހުންނަންޖެހޭ ސުލޫކީ މިންގަނޑުތަކަށް އޭނާ އަމަލުތައް ނުފެތޭ ކަމަށް ކޮމިޓީއަށް ޤަބޫލުކުރެވޭތީ ކަމަށެވެ.
ކޮމިޝަންގެ މުވައްޒަފުން ދިން މައުލޫމާތުގެ އިތުރުން އަކްރަމާއި ކޮމިޝަނުގެ އެހެން މެމްބަރުން ވެސް ކޮމިޓީއަށް ހާޒިރުކޮށް ވަނީ މައުލޫމާތު އޮޅުން ފިލުވާފައެވެ.
އޭނާ ވަކިކުރަން ފާސްކޮށްފައިވަނީ ބުދަ ދުވަހުގެ ބައްދަލުވުމުގައި ބައިވެރި މެންބަރުންގެ ތެރެއިން އެއް މެންބަރަކު ފިޔަވާ އެހެން ހުރިހާ މެންބަރުންގެ ތާއީދާއި އެކުގައި ކަމަށް ރޮޒައިނާ ވިދާޅުވިއެވެ.
އިލެކްޝަން ކޮމިޝަންގެ މެމްބަރުކަމަށް އަކްރަމް ދެވަނަ ދައުރަކަށް އައްޔަން ކޮށްފައިވަނީ މިއަހަރުގެ މާރޗް މަހުގައެވެ. އިތުރު ދައުރަކަށް އޭނާ މަޤާމަށް އައްޔަން ކޮށްފައިވަނީ މަޖިލީހުގެ 77 މެމްބަރަކު ވޯޓާއި އެކުގައެވެ.
