ރައީސް ނަޝީދުގެ އާދޭސް ޗައިނާ ސަރުކާރަށް: ރާއްޖެއަށް ތިހެން ނުހައްދަވާ!

ކޮވިޑް-19 ގެ ހާލަތާއި ގުޅިގެން ރާއްޖޭގެ އިގްތިސާދު އަނދަވަޅަކަށް ވެއްޓިފައި މިވާ ދަނޑިވަޅުގައި ކުރީގެ ރައީސް އަބްދުﷲ ޔާމީނުގެ ސަރުކާރުން ޗައިނާއިން ނަގާފައިވާ ލޯނުތައް ފަސްކޮށްދިނުމަށް އެދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ޗައިނާއަށް އާދޭސް ދަންނަވައިފި އެވެ.

އަންގާރަ ދުވަހު އެމްޑީޕީ ހަރުގޭގައި ވާހަކަދައްކަވަމުން ރައީސް ނަޝީދު ވަނީ ކޮވިޑާއި ގުޅިގެން އިގްތިސާދު ހީނަރުވެފައި މިވާ ދަނޑިވަޅުގައި ކުރީގެ ސަރުކާރުން ޗައިނާއިން ނަގާފައިވާ ލޯނުތައް، ދެއްކުމުގައި އެއްވެސް ލުޔެއް ނެތުމުގެ ކަންބޮޑުވުން ފާޅުކުރައްވާފަ އެވެ.

Advertisement

ރައީސް ނަޝީދު ވަނީ ރާއްޖެއިން މި ދަނޑިވަޅުގައި ޗައިނާ ފަދަ އިގްތިސާދީ ގޮތުން ކުރިއަރާފައިވާ ގައުމަކަށް އަނބުރާ ދައްކަން ޖެހޭ ފައިސާ ދައްކާނީ ކިހިނެއްތޯ ސުވާލު އުފައްދަވާފައެެވެ.

ޖޯޝާ ފޯރީގައި ވާހަކަދައްކަވަމުން ނަޝީދު ވިދާޅުވީ ޗައިނާއިން ލޯނު ނުނަގާ ކަމަށް ވިދާޅުނުވާނެ ކަމަށާއި މި ހާލަތަކީ ދަރަނި ދެއްކުމަށް އެންމެ ރަނގަޅު ވަގުތު ނޫން ކަމަށެވެ.

އަންނަ އަހަރަށް ލަފާ ކުރާ ދައުލަތުގެ ބަޖެޓުން ކިތަންމެ 'ހުތުރު' މަންޒަރެއް ސިފަވެގެން ދިޔަ ނަމަވެސް އެ ހުތުރު ކަމަކީ މި ސަރުކާރުން ގެނައި ހުތުރު ކަމެއް ނޫން ކަމަށް ރައީސް ނަޝީދު ވިދާޅުވި އެވެ.

ކުރީ ސަރުކާރަށް ބަހުގެ ހޫނު ހަމަލާތަކެއް ރައްދުކުރައްވަމުން ރައީސް ނަޝީދު ވިދާޅުވީ މި ދަނޑިވަޅުގައިވެސް މި ޖެހެނީ އެހެން ބައެއްގެ ދަރަނި ދެއްކުމަށްޓަކައި އަމިއްލަ 'ފައްޓަރު ބައި ވިއްކާލަން ކަމަށެވެ.

އެމްޑީޕީގެ ވެރިކަމެއްގައި ދިވެހި ރާއްޖޭގެ އިގްތިސާދާއި މާލިއްޔަތަށް ގެއްލުމެއް ނުވާނެ ކަމުގެ ޔަގީންކަން ދެއްވަމުން ރައީސް ނަޝީދު ވިދާޅުވީ ރައީސް ޔާމީނުގެ ސަރުކާރުން ނެގި ދަރަނިތައް ކުޑަކޮށް، ދައްކަން ޖެހޭ މުއްދަތުވެސް މި ސަރުކާރުން ފަސްކުރާނެ ކަމަށެވެ.

ޗައިނާ އަށް ރައީސް ނަޝީދު އާދޭސް ދަންނަވާފައިވާއިރު އެ މަނިކުފާނު ގެންދަވަނީ އެކި އެކި ޕްލެޓްފޯމްތަކުގައި އެގައުމަށް ވަރަށް ބޮޑަށް ވިދާޅުވަމުންނެވެ. އެމަނިކުފާނު ވިދާޅުވަމުން ގެންދަވަނީ ޗައިނާ އިން ނަގާ ލޯނުތަކަކީ 'ދަރަނި ދަންތުރަ' އެކެވެ. ނަޝީދު ޗައިނާއާއި ގުޅޭގޮތުން ދައްކަވާ ވާހަކަތަކަށް ޗައިނާ ސަފީރު ގެންދަވަނީ ރައްދުދެއްވަމުންނެވެ. ރައީސް ޔާމީނުގެ ސަރުކާރުގައި ނުކަތާ ވަރަށް ޗައިނާ އިން ލޯނު ނަގާ، ގިނަ މަޝްރޫއުތައް ހިންގައި، ގައުމު ދަރުވާލާފައިވާ ވާކަމަށް އެމްޑީޕީން ދަނީ ތަކުރާރުކޮށް ބުނަމުންނެވެ.