"މިއީ އަޅުގަނޑުމެންގެ އަތްތަކުން ގެއްލުންތަކެއް ދިން އިރުވެސް ވަކިވާން ބޭނުންނުވީ މިސްކިތެއް"

ރާއްޖޭގައި ހަމައެކަނި ކަޅުވަކަރުން ހަދާފައި ހުރި މާލޭގެ ކަޅުވަކަރު މިސްކިތަކީ އެކި ތަންތަނަށް އެކި ގޮތްގޮތަށް ބަދަލު ކުރެވުނުއިރުވެސް ވަކިވާން ބޭނުންނުވި ރާއްޖޭގެ މުހިއްމު ތަރިކައެއް ކަމަށް ރައީސް އިބްރާހިމް މުހައްމަދު ސާލިހު ވިދާޅުވެއްޖެއެވެ.

ރައިސް ސޯލިހު އެހެން ވިދާޅުވީ، ރައީސް އަބްދުﷲ ޔާމީންގެ ސަރުކާރުގައި ''ގެއްލުވާލި'' ކަޅުވަކަރު މިސްކިތް މި ސަރުކާރުން އަލުން ރާވާއި އެ މިސްކިތް ހުޅުވުމަށް އަންގާރަ ދުވަހު ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.

އެގޮތުން ކަޅުވަކަރު މިސްކިތަކީ ދިވެހިންގެ އަމިއްލަވަންތަ އެތައް ސިފަތަކެއް ޖަމާވެ ރައްކާ ކުރެވިފައިވާ ހަޒާނާއެއް ގޮތަށް ރައީސް ވަނީ ސިފަކުރައްވާފައެވެ.އަދި ވިދާޅުވީ، އަލުން މިސްކިތް ރާވާއި ހުޅުވިގެން ދިޔުމަކީ ތާރީހުގެ އަނދިރިކަމުގެ ތެރެއަށް ކަޅުވަކަރު މިސްކިތް ފަހުނޭވާ ދޫކުރަމުން ދަނިކޮށް އަލުން އަނބުރާ ސަލާމަތް ކުރުމުގެ ނިމުން ކަމަށެވެ.

ރައީސް އިޝާރާތް ކުރެއްވީ ޔާމީންގެ ސަރުކާރުގައި ވިންޓަރ ޕާކެއް ހަދަން ކަމަށް ބުނެ 2016 ވަނަ އަހަރުގެ އޮގަސްޓް މަހުގެ މިސްކިތް ރޫޅާލި ރޫޅާލުމަށެވެ. އެއަށް ފަހު އެ މިސްކިތް އެއްވެސް ތަނެއްގައި އާންމުންނަށް ފެންނާނެހެން ބަހައްޓާފައެއް ނުވެއެވެ. އަދި އެ މިސްކިތް ގދ. ތިނަދޫގައި ބަހައްޓަން އުޅޭކަމުގެ ވާހަކަތަކަކާއި ހުޅުމާލޭ ފޭސް ދޭއްގައި ބަހައްޓަން އުޅޭކަމުގެ ވާހަކަތަކެއް ވެސް އަޑު އިވިގެން ދިޔައެވެ.

އެކަމާއި ދެކޮޅަށް އެންމެ ބޮޑަށް ވަކާލާތު ކުރެއްވި ބޭފުޅުންގެ ތެރޭގައި މިހާރުގެ އެންވަޔަރަމެންޓް މިނިސްޓަރު ޑރ. ހުސެއިން ރަޝީދުގެ އިތުރުން ހެރިޓޭޖް މިނިސްޓްރީގެ ސްޓޭޓް މިނިސްޓަރު މުހައްމަދު ތޯރިގު (މަނަދޫ ތޯރިގު) ހިމެނެއެވެ. މިސްކިތް އެތަނުން ނެގި މައްސަލަ ކޯޓަށް ވެއްދުމުން، ކޯޓުން ނިންމީ މައްސަލަ ބެލޭނެ ހައިސިއްޔަތެއް ނެތް ކަމަށެވެ.

އެ ދެ ފަރާތަށް ޝުކުރު އަދާކުރައްވަމުން ރައީސް ވަނީ މިސްކިތް އަލުން ރޭވުމުގައި ހެރިޓޭޖް މިނިސްޓްރީން ކުރި މަސައްކަތަށް ޝުކުރު އަދާކުރައްވާފައެވެ. ރައީސް ވިދާޅުވީ، ވާނުވާ ނޭގޭ އަނދިރިކަމެއްގައި ވަނިކޮށް ސަރުކާރުން މި މިސްކިތް އަލުން ބިނާކުރީ ގާނޫނީ ގޮތުންވެސް ފުރިހަމަ ހިމާޔަތާއި ރައްކާތެރިކަން ކަށަވަރުކޮށްދީފައި ކަމަށެވެ.

ކަޅުވަކަރު މިސްކިތަކީ ހިރިގަލުން ބިނާކުރެވިފައިވާ ދިވެހިންގެ ގަލުވަޑާމާއި ލާފެންކުރުމުގެ ފަންނުވެރިކަން ދައްކުވައިދޭ ރީތި މިސްކިތެކެވެ. ހިރިގަލާއި ކަޅުވަކަރުގައި ކުރެހުންތައް ކަނޑާނެގިފައިވާ އަދި މިސްކިތުގެ އެތެރޭގެ ބައިތައް ލާފެންކުރެވިފައިވާ ފުރިހަމަ މިސްކިތެކެވެ.

ކަޅުވަކަރު މިސްކިތުގެ ނަމުން މި މިސްކިތަށް ނަން ދެވިފައިވަނީ މިސްކިތުގެ މަސައްކަތްތަކުގައި ކަޅުވަކަރު ބޭނުންކޮށްފައިވާތީއެވެ. ރާއްޖޭގައި ކަޅުވަކަރު ބޭނުންކޮށްފައިވާ އެހެން މިސްކިތެއް ހުރި ކަމެއް އެނގޭކަށް ނެތެވެ. ނަމަވެސް ނަން މޮޅު ހައިވަކަރު ބައެއް މިސްކިތަކުގައި ބޭނުންކޮށްފައިވެއެވެ.

ކަޅުވަކަރު މިސްކިތުގައިވާ ހިރިގަލުތަކުގައިވާ ލިޔުންތަކުން އެނގޭ ގޮތުގައި މިސްކިތް ބިނާ ކުރެވުނީ އައްސުލްޠާން ޙަސަން ނޫރައްދީން އިސްކަންދަރު ކައްތިރި ބަވަނަ މާހަރަދުންގެ ރަސްކަމުގެ 10 ވަނަ އަހަރުގައެވެ. މި ރަދުން ރަސްކަން ކުރެއްވީ މީލާދީން 1179 ވަނަ އަހަރުން ފެށިގެން 1799 ވަނަ އަހަރާ ހަމައަށެވެ. އެހެންކަމުން މި މިސްކިތަކީ 200 އަހަރަށްވުރެ ގިނަދުވަސްވެފައިވާ ދިވެހިންގެ ތަރިކައެކެވެ.