އައިޝާ އަށް މަގާމު ދެއްވީ ގާބިލްކަން އެނގިގެން: ގާސިމް
އަނބިކަނބަލުންނަށް ގާސިމް ވަރަށް ބޮޑަށް ތައުރީފްކުރެއްވި
ޓްރާންސްޕޯޓް މިނިސްޓަރު އައިޝަތު ނަހުލާ
ރައީސް އިބްރާހިމް މުހައްމަދު ސޯލިހު، ޓްރާންސްޕޯޓް މިނިސްޓަރުކަމުގެ މަގާމު އައިޝަތު ނަހުލާ އައްޔަން ކުރެއްވީ އެކަމަނާ އަކީ ގާބިލް ބޭފުޅަކަށްވާތީ ކަމަށް ފިރިކަލުން އަދި ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެ އެވެ.
ގާސިމް ވަނީ ނަހުލާއާ ގުޅުވައިގެން ދެކެވޭ ވާހަކަތަކަށް ވަރުގަދަ ރައްދެއް ދެއްވާއި އަނބިކަނބަލުންގެ ދިފާއު ކުރައްވާފަ އެވެ.
މިނިސްޓަރު ކަމަށް ނަހުލާ އައްޔަން ކުރައްވާފައިވަނީ ގާސިމްގެ އަނބިކަނބަލުންނަށް ވެގެން ނޫން ކަމަށް ''ދިވެހިރާއްޖޭގެ އަޑުން'' ގެނެސްދިން ޕްރޮގްރާމެއްގައި އެކަމަނާ ވަނީ ވިދާޅުވެފައެވެ. ނަހުލާ އެހެން ވިދާޅުވުމުން ސޯޝަލް މީޑިއާގައި އެކި ފަރާތްތަކުގެ މަލާމާތުގެ ބަސްތައް އެކަމަނާއަށް ވަނީ އަމާޒުވެފަ އެވެ.
ޖޭޕީގެ މީޑިއާ ގްރޫޕަށް ގާސިމް ފޮނުއްވި ދިގު މެސެޖެއްގައި ކޯފާ އިސްކުރައްވަމުން ގާސިމް ވިދާޅުވީ، އޭނާގެ އަނބިކަނބަލުންނަށް ވެގެން ވަޒީފާ އެއް ދެއްވަން ޖެހޭ ގޮތަށް ގާނޫނެއް ވެސް އުސޫލެއްވެސް އަދި ގަވާއިދެއްވެސް ނެތް ކަމަށެވެ.
ނަހުލާ އަށް ތައުރީފް ކުރައްވަމުން ގާސިމް ވިދާޅުވީ، މިނިސްޓަރު ކަމަށް ނަހުލާ އައްޔަން ކުރައްވަން ރައީސް އަށް ހުށައެޅުއްވީ އެކަމަނާއަކީ ގާބިލު ބޭފުޅެއް ކަމަށް ރައްޔިތުން ގަބޫލު ކުރާތީ ކަމަށެވެ.
ގާސިމް ވިދާޅުވި ގޮތުގައި އައިޝާގެ ނަން ރައީސަށް ހުށަހެޅުއްވީ ރިޔާސީ އިންތިހާބު ތެރޭގައި އެކަމަނާ ކުރެއްވި މަސައްކަތްތަކުން އެކަމަނާ ރައްޔިތުންގެ ލޯބި ހޯދާފައިވާތީ ކަމަށެވެ.
އެ މަގާމަށް ނަހުލާ އައްޔަން ކުރެއްވީ ވަކި މީހެއްގެ އަންބަކަށް ވެގެން ނޫން ކަމަށް ވިދާޅުވެ، ގާސިމް އެވާހަކަ ތަކުރާރު ކުރެއްވިއެވެ. އަދި އެކަމަނާއާ ގުޅުވައިގެން އެކި ގޮތް ގޮތަށް ވާހަކަ ނުދައްކަން ގާސިމް ނަސޭހަތްތެރިވި އެވެ.
