ރާއްޖޭގެ ގާނޫނުތައް ހުރި ގޮތުން ކުރީގެ ރައީސް މުހައްމަދު ނަޝީދަށް އިންތިހާބުގައި ވާދަކުރެއްވުމުގެ ފުރުސަތު ނެތް ކަން ދޭހަވާ ގޮތަށް ރައީސް އަބްދުﷲ ޔާމީން ދެއްކެވި ވާހަކަފުޅުން ރައީސް މުހައްމަދު ނަޝީދަށް އިންތިހާބުގައިވާދަކުރެވޭނެކަން ޔަޤީންވެގެންދާ ކަމަށް އެމަނިކުފާނުގެ ޤާނޫނީ ވަކީލް ހަސަން ލަތީފް ވިދާޅުވެއްޖެ އެވެ.
އައްޑޫ ސިޓީ ރައްޔިތުންތަކެއް، ޕީޕީއެމްއަށް ސޮއިކުރިކަމަށް ބުނެ، އެކަން ފާހަގަކުރުމަށް ބޭއްވި ހަފްލާ ޝަރަފުވެރިކޮށްދެއްވާ ވާހަކަފުޅުދައްކަވަމުން ރައީސް އަބްދުﷲ ޔާމީން ބުދަ ދުވަހު ވިދާޅުވީ، ރާއްޖޭގެ ގާނޫނުތައް ހުރި ގޮތުން ކުރީގެ ރައީސް މުހައްމަދު ނަޝީދަށް އިންތިހާބުގައި ވާދަކުރެއްވުމުގެ ފުރުސަތު ނެތް ކަމަށެވެ.
" އަޅުގަނޑަކަށް ނުވިސްނޭ ދިވެހި ރާއްޖޭގެ ގާނޫނުތައް މިހާރު ހުރި ގޮތުން އެއްގޮތަކަށް ވެސް މި ސަޖިދަކުރެވޭނެ ގޮތެއް،" ރައީސް ވިދާޅުވި އެވެ.
ރައީސް އަބްދުﷲ ޔާމީންގެ އެ ވާހަކަތަކާ ގުޅިގެން ރާއްޖެޓީވީގެ ފަލަސުރުހީ ޕްރޮގްރާމްގައި ހަސަން ލަތީފް ވިދާޅުވީ، ރައީސް ޔާމީން އެފަދަ ވަހަކަފުޅެއް ވިދާޅުވެއްޖެ ނަމަ އެ އުޅުއްވަނީ ރައީސް މުހައްމަދު ނަޝީދު ދޫކޮށްލެއްވުމަށް ކަމަށެވެ. މީގެކުރީގައިވެސް ކަންތައްތައް ހިނގަފައިވަނީ އެފަދަ ގޮތަކަށް ކަމަށް އޭނާ ވިދާޅި އެވެ.
"އެންމެ ފުރަތަމަ ރައީސް އަބްދުﷲ ޔާމީން އެފަދަ ވާހަކަފުޅެއް ވިދާޅުވީ ރައީސް ނަޝީދު ޖަލުގައި އިންނަވަނިކޮށް. އެގޮތުން އެމަނިކުފާނު ގެޔަށް ބަދަލުކުރާ ވާހަކަ އަޅުގަނޑުމެން ސިޓީއަކުން ދަންނަވާ، ހެދީމަ، ޓީވީގައި ވަރަށް ބާރަށް ވިދާޅުވީ ޖަލުގައި އެހެން ތިބޭ މީސް މީހުން ރަމަޟާން މަސްވިޔަސް ގެޔަށް އެންމެންނެއް ބަދަލެއް ނުކުރެވޭނެއޭ. މިހެންނޭ އެހެންނޭ، ބައިވަރު ވާހަކަދެއްކެވި. ހަފްތާއެއް ނުވެ ގެޔަށް ބަދަލުކުރެއްވި" ހަސަން ލަތީފް ވިދާޅުވި އެވެ.
ރައީސް ނަޝީދުގެ ބޭސް ފަރުވާގެ ކަންކަންވެސް ދިޔައީ އެގޮތަށްކަމަށާއި ބޭސްފަރުވާއަސް ނުފޮނުވާނެކަމަށް ވިދާޅުވެ ރައީސް ޔާމީން ގަދަބަސް ވިދާޅުވި ކަމަށާއި، ނަމަވެސް އެންމެ ފަހު ވަގުތު ޖެހުނީ އެމަނިކުފާނު ރާއްޖެއިން ބޭރަށް ފޮނުއްވުމަށް ކަމަށް ހަސަން ލަތީފު ވިދާޅުވި އެވެ. ރިޔާސީ އިންތިހާބުގައި ރައީސް ނަޝީދަށް ކުރިމަތިނުލެއްވޭނެ ކަމަށް ރައީސް ޔާމީން ވިދާޅުވާނަމަ، އެ ވިދާޅުވަނީ ރައީސް ނަޝީދަށް ކުރިމަތިލެއްވޭނެ ވާހަކަ ކަމަށް ހަސަން ލަތީފް ވިދާޅުވި އެވެ.
