އިންޑިއާ އަސްކަރިއްޔާއާ ގުޅުވައި ދިވެހިންގެ ހިތްތަކުގައި ބިރުވެރިކަން އުފެދޭ ގޮތަށް ވާހަކަ ދައްކަނީ ހަގީގަތް ނޭނގޭ މީހުން: ހައި ކޮމިޝަނަރ
ނޮވެމްބަރ 3 ގެ ހާދިސާގައި ރާއްޖޭގެ ދިފާއުގައި އިންޑިއާއިން ނުކުތް ނުކުތުން ދުނިޔޭގެ ލީޑަރުން ވަނީ ފާހަގަކޮށްފައި
އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ހައި ކޮމިޝަނަރ ސަންޖޭ ސުދީރު
އިންޑިއާ އަސްކަރިއްޔާއާ ގުޅުވައި މީހުންގެ ހިތްތަކުގައި ބިރުވެރިކަން އުފެދޭ ގޮތަށް ވާހަކަ ދައްކަނީ ހަގީގަތް ނޭނގޭ މީހުންކަމަށް އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ހައި ކޮމިޝަނަރ ސަންޖޭ ސުދީރު ވިދާޅުވެއްޖެއެވެ.
ހައި ކޮމިޝަނަރ ސަންޖޭ މިހެން ވިދާޅުވެފައި ވަނީ އިންޑިއާގެ ފޮރިން ސެކްރެޓަރީ ރާއްޖެއަށް ކުރެއްވި ދަތުރުފުޅާއި ގުޅުވައި "ރާއްޖެއެމްވީ" އަށް ދެއްވި ހާއްސަ އިންޓަވިއުއެއްގައެވެ. އިންޑިއާގެ އަސްކަރިއްޔާއިން ރާއްޖެއަށް ވެދީފައިވާ އެހީއަކީ ރިކޯޑް ކުރެވިފައިވާ ތާރީހު ކަމަށާއި އެހެންކަމުން އިންޑިއާ އަސްކަރިއްޔާއާ ގުޅުވައި މީހުންގެ ހިތްތަކުގައި ބިރުވެރިކަން އުފެދޭ ގޮތަށް ވާހަކަ ދައްކަނީ ހަގީގަތް ނޭގޭ އަދި ހަގީގަތް އޮޅުވާލުމަށް ނުބައި މަގުސަދެއްގައި މަސައްކަތްކުރާ މީހުންކަމަށް ހައި ކޮމިޝަނަރ ވިދާޅުވިއެވެ.
އެގޮތުން ނޮވެމްބަރ 3، 1988 ވަނަ އަހަރުގައި ހިނގައިދިޔަ ހާދިސާގައި ކުޑަ ވަގުތުކޮޅެއްގެ ތެރޭގައި އިންޑިއާއިން ރާއްޖޭގެ ދިފާއުގައި ނުކުތް ނުކުތުމަށް ރާއްޖޭގެ އޭރުގެ ރައީސް އިންޑިއާއަށް ޝުކުރު އަދާކުރައްވާ ދެއްކެވި ވާހަކަފުޅު ވައިރަލްވެފައިވާ އިރު، އެމެރިކާގެ ރައީސް އަދި ޔޫކޭގެ ބޮޑުވަޒީރު ފަދަ ދުނިޔޭގެ ލީޑަރުން އިންޑިއާއިން ރާއްޖޭގެ ދިފާއުގައި ކޮށްދިން ކަންތައްތައް ފާހަގަކުރެއްވި ކަމަށް ހައި ކޮމިޝަނަރ ފާހަގަކުރެއްވިއެވެ. އަދި އެ ފަހަރު އިންޑިއާގެ އަސްކަރިއްޔާއިން ރާއްޖެއިން ފައިބާފައި ވަނީ އެއް އަހަރު ފަހުން، ރާއްޖޭގެ ސަރުކާރުން އެގޮތަށް ބޭނުންވުމުން ކަމަށް ހައި ކޮމިޝަނަރ ސަންޖޭ ސުދީރު ވިދާޅުވިއެވެ.
މީގެ އިތުރުން، ތާރީހަށް ބަލާލުމުން ރާއްޖެއަށް ދިމާވާ ކޮންމެ އިންސާނީ ކާރިސާއެއްގައި ވެސް އިންޑިއާގެ އަސްކަރިއްޔާއިން ރާއްޖެއަށް ފޯރުކޮށްދީފައިވާ އެހީތެރިކަން ފެންނާނެ ކަމަށް ވިދާޅުވެ ހައި ކޮމިޝަނަރ ވަނީ 2004 ވަނަ އަހަރު ކުރިމަތިވި ސުނާމީގެ ކާރިސާގައި ސުނާމީ ރިލީފް އަދި ރިހެބިލިޓޭޝަން އޮޕަރޭޝަންތަކުގައި އަދި 2014 ވަނަ އަހަރު މާލެއަށް ކުރިމަތިވި ފެނުގެ ކާރިސާގައި އިންޑިއާ އަސްކަރިއްޔާއިން ފޮރުކޮށްދީފައިވާ އެހީތެރިކަން ފާހަގަކުރައްވާފައެވެ.
ހައި ކޮމިޝަނަރ ވިދާޅުވީ، ފަހުގެ ތާރީހަށް ބަލާލާނަމަ، ކޮވިޑް-19 ގެ ބަލިމަޑުކަމުގައި އިންޑިއާ އެއަރފޯސް އިން ލޯންޗް ކުރި "އޮޕަރޭޝަމް ސަންޖީވާނީ" ގައި އިންޑިއާއިން ވަނީ ވައިގެ މަގުން އިންޑިއާގެ ހަތަރު ސިޓީއަކުން ރާއްޖެއަށް ބޭނުންވާ ޒާރޫރީ ބޭސް އަދި ރާއްޖޭގެ ފުޑް ސެކިއުރިޓީ ކަށަވަރުކުރުމަށް 580 ޓަނުގެ ކާނާ އިންޑިއާ އަސްކަރިއްޔާގެ އެހީގައި ރާއްޖެއަށް ފޯރުކޮށްދީފައިވާ ކަމަށެވެ.
އިންޑިއާ އަސްކަރިއްޔާއިން 2010 ވަނަ އަހަރު އަދި 2016 ވަނަ އަހަރު ފޯރުކޮށްދީފައިވާ ހެލިކޮޕްޓަރތައް ދަނީ އިންސާނީޔަތައް އެހީތެރިކަން ފޯރުކޮށްދިނުމަށާއީ އީއީޒީ ސަވެއިލަންސް އަދި ސަރޗް އެންޑް ރެސްކިއު އޮޕަރޭޝަންތައް ކުރިއަށް ގެންދިއުމަށް އެމްއެންޑީއެފްގެ ކޮމާންޑް އާއި ކޮންޓްރޯލްގެ ދަށުން ބޭނުން ކުރަމުން ކަމަށައި މިހާތަނަށް 250 އަށް ވުރެ ގިނަ ދިވެހިންގެ ފުރާނަ ވަނީ މެޑިކަލް އިވެކުއޭޝަންތަކުގެ ސަބަބުން ސަލާމަތްކުރެވިފައި ކަމަށް ހައި ކޮމިޝަނަރ ފާހަގަކުރެއްވިއެވެ. އަދި 2020 ވަނަ އަހަރުގެ ސެޕްޓެމްބަރ މަހު ހަދިޔާކުރެވުނު ޑޯނިއަރ އެއަރކްރާފްޓްގެ ސަބަބުން އެމްއެންޑީއެފްއަށް މިފަދަ ކަންތައްތައް ކުރިއަށް ގެންދިއުމުގައި އިތުރު ކުރިއެރުންތަކެއް ލިބިފައިވާކަމަށް ހައި ކޮމިޝަނަރ ސަންޖޭ ސުދީރު ވިދާޅުވިއެވެ.
ސަންޖޭ ވިދާޅުވީ، މިފަދަ އޮޕަރޭޝަންތަކުގައި ހަރަކާތްތެރިވާ އެމްއެންޑީއެފް އޮފިޝަލުންގެ ކެޕޭސިޓީ އިތުރުކުރުމުގެ މަސައްކަތްތައް އިންޑިއާއިން ކުރިއަށް ގެންދާ ކަމަށާއި މިހާރުވެސް ބައެއް ދިވެހިން ޑޯނިއަރ އެއަރކްރާފްޓް ޕައިލެޓުންގެ ގޮތުގައި ޓްރެއިން ކުރެވިފައިވާ ކަމަށެވެ. އަދި ކުރިއަށް އޮތްތަނުގައި އިތުރު ޓްރެއިނިންތައް ކުރިއަށް ގެންދެވޭނެ ކަމަށްވެސް ވިދާޅުވިއެވެ.
ހައި ކޮމިޝަނަރ ވިދާޅުވީ އިންޑިއާ އަސްކަރިއްޔާގެ ގާބިލް ކަމާއި އިންޑިއާ ސަރުކާރުން ރާއްޖެއަށް އެހީތެރިކަން ފޯރުކޮށްދިނުމަށްދޭ އިސްކަމުގެ ސަބަބުން އެތަށް ފަހަރެއްގެ މަތިން ރާއްޖޭގެ ސަލާމާތަށް އަންނާނީ ކޮން ބައެއްކަން ހާމަކޮށްދީފައިވާނެ ކަމަށެވެ.
