ހދ. ހަނިމާދޫ އެގްރިކަލްޗާ ރިސާޗް ސެންޓަރު ތަރައްގީކުރުމަށް އިންޑިއާ ސަރުކާރުން 1.7 މިލިއަން ރުފިޔާގެ ހިލޭ އެހީ ދީފިއެވެ.

އިންޑިއާގެ ފޮރިން ސެކްރެޓަރީ ހަރްޝް ޝްރިންގްލާ ރާއްޖެއަށް ކުރެއްވި ރަސްމީ ދަތުރުފުޅުގެ ތެރޭގައި ހަނިމާދޫ އެގްރިކަލްޗާ ރިސާޗް ސެންޓަރު ތަރައްގީކުރުމާ ގުޅޭ އެމްއޯޔޫގައި ވަނީ ސޮއިކުރައްވާފައެވެ.

ރާއްޖޭގައި ހުންނަ އިންޑިއާގެ ހައި ކޮމިޝަނުން ބުނީ ހަނިމާދޫ އެގްރިކަލްޗާ ރިސާޗް ސެންޓަރު ތަރައްގީކުރުމުގެ ގޮތުން ސޮއިލް އެނެލިސިސް އަދި ޕްލާންޓް ޓިޝޫ ޓެސްޓިން ލެބޯޓަރީއެއް ސެންޓަރުގައި ގާއިމުކުރެވޭނެ ކަމަށެވެ. އަދި އެ ލެބޯޓަރީގެ ސަބަބުން 8،000 ށްވުރެ ގިނަ ދަނޑުވެރިންނަށް ސޮއިލް އަދި ޕްލާންޓް ޓިޝޫ ޓެސްޓިންނާ ގުޅޭ ގިނަ ޚިދުމަތްތައް ފޯރުކޮށްދެވޭނެ ކަމަށްވެސް ބުންޏެވެ.

އަދި ކްރޮޕް ފޯކަސްޑް ޕެކޭޖުތަކާއި، ކޮމްޕޯސްޓް ޓެސްޓިން ދިރާސާ އަދި ތައުލީމުގެ ބޭނުމަށް ކުރެވޭ ބޭސިކް ސޮއިލް ޓެސްޓިން، ކާބަން އެނެލިސިސް، ފުލް އަދި ނިއުޓްރިއެންޓް އައިސީޕީ ސްކޭނުގެ ޚިދުމަތް ފޯރުކޮށްދެވޭނެ ކަމަށްވެސް އިންޑިއާގެ ހައި ކޮމިޝަނުން މައުލޫމާތުދެއެވެ.

މި މަޝްރޫއަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު 2018 ވަނަ އަހަރުގެ ޑިސެމްބަރު މަހު އިންޑިއާއަށް ކުރެއްވި ރަސްމީ ދަތުރުފުޅުގެ ތެރޭގައި ސޮއިކުރެވުނު އެގްރިކަލްޗާ އެމްއޯޔޫގެ ފްރޭމްވޯކުގައި ހިމެނޭ މަޝްރޫއެކެވެ. މަޝްރޫއުގެ އިމްޕްލިމެންޓިން އޭޖެންސީ އަކީ މިނިސްޓްރީ އޮފް ފިޝަރީޒް، އެގްރިކަލްޗާ އެންޑް މެރިން ރިސޯސަސްއެވެ. އަދި މި މަޝްރޫއުގެ ސަބަބުން ދިވެހި ދަނޑުވެރިންގެ ހިންގުންތެރިކަން އިތުރުކުރުމަށް ބޭނުންވާ ސައިންޓިފިކް އުކުޅުތަކާއި ދިރާސީ މައުލޫމާތު ފޯރުކޮށްދެވޭނެ ކަމަށް އިންޑިއާއިން މައުލޫމާތުދެއެވެ.