ނާގޯށި ތަރައްގީކުރަން އިންވެސްޓަރަކަށް ދޭން ނިންމުމަށް ފަހު އަނެއްކާ އެމްޓީޑީސީއަށް!

ހދ. ނާގޯށި ތަރައްގީކުރަން އަމިއްލަ އިންވެސްޓަރަކަށް ދިނުމަށް ނިންމުމަށްފަހު، އަނެއްކާ ވެސް އެރަށް މޯލްޑިވްސް ޓޫރިޒަމް ޑިވެލޮޕްމެންޓް ކޯޕަރޭޝަން(އެމްޓީޑީސީ)އާ ހަވާލުކޮށްފި އެވެ.

އެމްޓީޑީސީން ސަބްލީސްކޮށްގެން ތަރައްގީކުރާ ރަށްތަކުގެ ތެރެއިން އެންމެ ބޮޑު އަދި އެންމެ ގިނަ އެނދު ހިމެނޭ ރިސޯޓުގެ ގޮތުގައި ނާގޯށި ތަރައްގީ ކުރުމަށް އެމްޓީޑީސީން ހަވާލުކުރީ ރާއްޖޭގެ ކުންފުންޏެއް ކަމަށްވާ ތްރީ ކޭ އިންޓަނޭޝަނަލްއާ އެވެ. އެ ރަށް ހިންގުމުގެ އެއްބަސްވުމެއްގައި ދުނިޔޭގެ މަޝްހޫރު ހޮޓެލް ޗެއިން ކާލްސަންއާ އެކު ތްރީ ކޭއިން 2011 ގައި ސޮއިކުރުމަށް ފަހު ބުނެފައިވަނީ 2012 ގައި އެ ރިސޯޓް ހުޅުވޭނެ ކަމަށެވެ. ނަމަވެސް، އަދިވެސް އެ ރަށުގެ މަސައްކަތް ނުނިމޭއިރު، މިހާރު މަސައްކަތް ވަނީ ހުއްޓިފައެވެ.

މައުލޫމާތު ލިބިފައިވާ ނާގޯށި އަލުން އެމްޓީޑީސީއާ ހަވާލުކޮށްފައިވަނީ މިދިޔަ މަހުގެ ތެރޭގަ އެވެ. އިންވެސްޓަރަކު ހަމަޖެހިފައިވަނިކޮށް ރަށް، ތަރައްގީ ކުރުން އެމްޓީޑީސީއާ ހަވާލުކުރި ސަބަބެއް ހާމައެއް ނުކުރެއެވެ.

ސަރުކާރާއި ރައްޔިތުން ހިއްސާވާ ގޮތަށް އުފެއްދި އެމްޓީޑީސީ އަށް ގިނަ އަދަދެއްގެ ރަށް ދިނެވެ. ނަމަވެސް، އެއިގެ ތެރެއިން ތަރައްގީ ކުރެވުނީ ވަރަށް މަދު ރަށެކެވެ.

މިދިޔަ އަހަރުގެ އޮކްޓޯބަރު 25 ވަނަ ދުވަހު ހދ. ނެއްލައިދޫ ބަނދަރު ހުޅުވުމަށް ބޭއްވި ރަސްމިއްޔާތުގައި ރައީސް އަބްދުﷲ ޔާމީން ވިދާޅުވެފައިވަނީ އެމްޓީޑީސީގެ އަތުން އެ ރަށް ނެގުމަށް ފަހު އަމިއްލަ އިންވެސްޓަރަކާ ހަވާލު ކުރުމަށް ނިންމާފައިވާ ކަމަށެވެ.

ރައީސް ޔާމީން ވިދާޅުވީ ނާގޯށި ތަރައްގީކުރުމުގެ މަސައްކަތް މަޑުޖެހިފައިވާ ކަމަށެވެ. އެހެންކަމުން، އެމްޓީޑީސީ އަށް ދިގު މުއްދަތަކަށް ދޫކޮށްފައިވާ އެ ރަށް ތަރައްގީ ކުރެވޭނެ ގޮތަކަށް، އަމިއްލަ އިންވެސްޓަރުން ހޯދުމަށް ސަރުކާރުން ނިންމާފައިވާ ކަމަށް އެމަނިކުފާނު ވިދާޅުވި އެވެ.

ރައީސް ވިދާޅުވީ ނާގޯށި ތަރައްގީކުރާނެ އަމިއްލަ އިންވެސްޓަރެއް އެބަހުރި ކަމަށެވެ. އެ ރަށް ތަރައްގީކުރުމުގެ ގާބިލްކަން އެ ފަރާތުގެ ކިބައިގައި އެބަހުރި ކަމަށް ވެސް އެމަނިކުފާނު ވިދާޅުވި އެވެ. ނަމަވެސް، އެ އިންވެސްޓަރާ ގުޅޭ އެއްވެސް މައުލޫމާތެއް ރައީސް ނުދެއްވަ އެވެ.