މޯލްޑިވްސް އޯޓިޒަމް ސެންޓަރުގެ އާ އިމާރާތް ހުޅުވަނީ
އިމާރާތް ރަސްމީކޮށް ހުޅުވުމަށް ހަމަޖެހިފައިވަނީ 24 ޖުލައި ވާ ހޯމަ ދުވަހުގެ ރޭ
އޯޓިޒަމް އެސޯސިއޭޝަންގެ މެނޭޖިންގ ޑައިރެކްޓަރ އިފްހާމް ހުސެއިން
މޯލްޑިވްސް އޯޓިޒަމް އެސޯސިއޭޝަން ސެންޓަރުގެ އާ އިމާރާތް ހުޅުވަން ނިންމައިފިއެވެ.
މި އިމާރާތް ރަސްމީކޮށް ހުޅުވުމަށް ހަމަޖެހިފައިވަނީ 24 ޖުލައި ވާ ހޯމަ ދުވަހުގެ ރޭ އަށެއް ޖަހާއިރުއެވެ.
އޯޓިޒަމް އެސޯސިއޭޝަންގެ މެނޭޖިންގ ޑައިރެކްޓަރ އިފްހާމް ހުސެއިން ވިދާޅުވީ މޯލްޑިވްސް އޯޓިޒަމް އެސޯސިއޭޝަނަކީ 2010 ވަނަ އަހަރުން ފެށިގެން އޯޓިޒަމް ހުންނަ ކުދިންނަށް ތެރަޕީ ދެމުންދާ ތަނެއްކަމަށާއި އެ އެސޯސިއޭޝަންގެ ދަށުން ހިންގަމުންދާ މޯލްޑިވްސް އޯޓިޒަމް ސެންޓަރުގައި ވޭތުވެދިޔަ 7 އަހަރު ކުދިންނަށް ތެރަޕީ ދެމުންދިޔައީ ތަފާތު ގޮންޖެހުންތަކާއިއެކީ ކަމަށެވެ. އަދި ތަނުގެ ޖާގައިގެ ދަތިކަން ތަޙައްމަލް ކުރަމުން އައިސް 2017 ވަނަ އަހަރު މިކަންތައްތަކަށް ހައްލެއް ލިބިފައިވާ ކަމަށެވެ.
މޯލްޑިވްސް އޯޓިޒަމް އެސޯސިއޭޝަން ސެންޓަރު ރަސްމީކޮށް ހުޅުވި ތެރަޕީ ދޭން ފެށުމުން މިހާރު ޖާގަ ބޭނުންވެ، ތެރެޕީގެ ޙިދުމަތް ނުލިބި ތިބި ގިނަ ކުދިންނަށް ތެރަޕީ ލިބިގެންދާނެކަމަށާއި ސެންޓަރު ހުޅުވުމުން 300 ކުދިންނަށް ޖާގަ ލިބިގެންދާނެކަމަށްވެސް އިފްހާމް ފާހަގަކުރެއްވިއެވެ.
މާލޭގެ ސެންޓަރުގައި 50 އަށްވުރެ ގިނަކުދިން ތެރަޕީ ނަގަމުންދާކަމަށާއި ތަޖުރިބާކާރު 19 ތެރަޕިސްޓުން އޯޓިޒަމް އެސޯސިއޭޝަންގައި ހަރަކާތްތެރިވަމުންދާކަމަށްވެސް އިފްހާމް ވިދާޅުވިއެވެ.
މި ސެންޓަރު ޤާއިމުކުރެވިފައިވަނީ ހުޅުމާލޭގައެވެ.
އޯޓިޒަމް އެސޯސިއޭޝަންގެ ފަރާތުންވަނީ ކުޑަކުދިންގެ ދުވަހު އޯޓިޒަމް ހުންނަ ކުދިންނާއެކު ހަވީރެއް ބާއްވާފައެވެ. މި ހަވީރުގައި އޯޓިޒަމް ހުންނަ ކުދިންވަނީ ތަސްވީރު ކުރަހައި، ކުލަޖައްސާ ހަދާފައެވެ.
