ފުލުހުންތަކެއް މީހަކަށް އަނިޔާކޮށް ބިރުދެއްކި ކަމަށް ބުނާ މައްސަލަ އެޗްއާރްސީއެމުން ބަލަނީ

އައްޑޫ ސިޓީގައި ފުލުހުން ތަކެއް ވެގެން މީހަކަށް އަނިޔާކޮށް ބިރުދެއްކި ކަމުގެ ތުހުމަތު ކުރެވޭ މައްސަލައެއް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރްސީއެމް) އިން ބަލަން ފަށައިފިއެވެ.

އެ މީހާއަށް އަނިޔާކުރި މައްސަލައިގައި އާއިލާގެ މެމްބަރަކު ވަނި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށާއި، އެޗްއާރްސީއެމްއަށް ސިޓީއެއް ފޮނުވާފައެވެ.

އެކަމާއި ގުޅޭ ގޮތުން އެޗްއާރްސީއެމުން ކޮށްފައިވާ ޓްވީޓެއްގައި ބުނީ، އެ މައްސަލަ ބަލަމުންދާ ކަމަށެވެ. މައްސަލަ ބަލަމުން ދަނީ އެންޓި ޓޯޗާ ގާނޫނުގެ ދަށުން ކަމަށްވެސް އެޗްއާރްސީއެމުން ވަނީ ބުނެފައެވެ.

އަނިޔާކުރި މައްސަލަ ބަލައިދޭން މަޖިލީހުގެ ހިއުމަން ރައިޓްސް އެންޑް ޖެންޑާ ކޮމިޓީގައި ވަނީ އެދިފައެވެ. ''ރާއްޖެއެމްވީ'' އާ ވާހަކަ ދައްކަވަމުން އެ ކޮމިޓީގެ މުގައްރިރު، ހިންނަވަރު ދާއިރާގެ މެމްބަރު ޖީހާން މަހްމޫދު ވިދާޅުވީ، އެކަން ސަމާލުކަމަށް އައިސްފައިވާ ކަމަށާއި، ބަންދަށް ފަހު މަޖިލީސް ހުޅުވުމުން ކޮމިޓީން އިތުރަށް ބަލަން ޖެހޭ ކަންތައްތައް ބަަލަމުންދާނެ ކަމަށެވެ. އަދި ހިއުމަން ރައިޓްސް ކޮމިޝަނުން އިސްނަގައިގެން އަނިޔާކުރި މައްސަލަ ބަލަން ފެށުމުން އެކަމާއި މެދު އުފާކުރައްވާ ކަމަށެވެ.

އަނިޔާ ލިބުނު ކަމަށް ބުނާ މީހާގެ އާއިލާއިން ރައީސް ނަޝީދުއަށް އެޑްރެސްކޮށް ފޮނުވާފައިވާ ސިޓީގައި ބުނީ، ހިތަދޫ ޕޮލިސް ސްޓޭޝަނަށް އޭނާގެ ކޮއްކޮ ގެންގޮސް ބިޑި އެޅުވުމަށްފަހު، ގައިގައި ތަޅައި، ޖިސްމާނީ އަނިޔާދީ، އޭނާގެ ކަންފަތް މަތީގައި ތަކުރާރުކޮށް ޖަހާފައިވާ ކަމަށެވެ. އޮފިސަރުން ވަނީ އޭނާގެ ކޮއްކޮ ބެޑް ޝީޓުން އައްސައި އެކޮޅުކޮޅުން ބާއްވާނެ ކަމަށް ބުނެ ބިރުދައްކާފައި ކަމަށާއި އަދި ގައިގައި ޖެހިކަން އެއްވެސް މީހެއްގެ ކައިރީގައި ބުނެފިނަމަ އޭނާއަށް "އަރުވާލާނޭ" ކަމަށް ބުނެ އިންޒާރުދީފައިވާ ކަމަށް ސިޓީގައި ބުންޏެވެ.