އެމްޕީއެލް އިން ބާ ދޯންޏެއް ގަތް ކަމަށް ބުނާ މައްސަލައިގެ ތަހުގީގު ނުނިމޭ: އޭސީސީ

އަގާ ނުބައްދަލު ބާ ދޯންޏެއް މީހަކަށް ނާޖައިޒު ފައިދާ ލިބޭ ގޮތަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ގަތް ކަމަށް ބުނާ މައްސަލައިގެ ތަހުގީގު ނުނިމޭ ކަމަށް އެންޓި ކޮރަޕްޝަން ކޮމިޝަން (އޭސީސީ)އިން ބުނެފިއެވެ.

އެމްޕީއެލްއިން އަގާ ނުބައްދަލު ބާ ދޯންޏެއް ގަތް ކަމަށް ބުނާ މައްސަލަ އޭސީސީ އަށް ހުށަހަޅާފައި ވަނީ ޖެނުއަރީ މަހުގެ ތެރޭގައެވެ.

ރާއްޖެއެމްވީ އަށް މައުލޫމާތު ދެއްވަމުން އޭސީސީ ރައީސް ހަސަން ލުތުފީ ވިދާޅުވީ އެމްޕީއެލް އިން ބާ ދޯންޏެއް ގަތް ކަމަށް ބުނާ މައްސަލައިގެ ތަހުގީގު އަދި ނުނިމޭ ކަމަށާއި އެ މައްސަލައިގެ ތަހުގީގު މިހާރު ވެސް ކުރިއަށްދާ ކަމަށެވެ.

ބާ ދޯންޏެއް ފަސް މިލިއަން ރުފިޔާ އަށް ގަތް ކަމަށް ބުނާ މައްސަލަ ފެންމަތިވުމާ އެކު އެމްޕީއެލް އިން ވަނީ އެކަން ދޮގުކޮށްފަ އެވެ. އެ ކުންފުނިން ނެރުނު ބަޔާނެއްގައި ބުނެފައިވަނީ ދޯނި ގަނެފައިވަނީ އޮންނަ އުސޫލުތަކާއި ހަމަތަކުގެ ތެރެއިން ކަމަށެވެ.

އެ ކުންފުނިން ބުނެފައިވާ ގޮތުގައި އެ ދޯނި ގަނެފައިވަނީ ފަސް މިލިއަން ރުފިޔާ އަށް ވުރެ ކުޑަ އަގެއްގަ އެވެ. ނަމަވެސް، ދޯނި ގަތް ސީދާ އަގެއް އެ ކުންފުނިން ހާމަކޮށްފައި ނުވެއެވެ.

އޭސީސީ އަށް ހުށަހަޅާފައިވާ މައްސަލައިގައި އެ ދޯނީގެ ދިގުމިނަކީ 40 ފޫޓު ކަމަށް ބުނެފައިވީ ނަމަވެސް، އެމްޕީއެލް އިން ބުނެފައިވާ ގޮތުގައި އެ ދޯނީގެ ދިގުމިނަކީ 65 ފޫޓެވެ.

ރާއްޖެއެމްވީ އަށް މައުލޫމާތު ލިބިފައިވާ ގޮތުގައި އޭސީސީން ކުރަމުންދާ ތަހުގީގަށް، އެމްޕީއެލްގެ ކުރީގެ ސީއީއޯ މުހައްމަދު ޖުނައިދު ހާޒިރުކޮށް ސުވާލު ކޮށްފައި ވެއެވެ.

ޖުނައިދު ވަނީ މިދިޔަ ފެބްރުއަރީ 28 ވަނަ ދުވަހު އެމްޕީއެލްގެ ސީއީއޯގެ މަގާމުން އިސްތިއުފާ ދެއްވާފަ އެވެ. އެމްޕީއެލްގެ ސީއީއޯގެ މަގާމުގައި މިހާރު ހުންނެވީ އެމްއާރްޑީސީގެ ކުރީގެ މެނޭޖިން ޑިރެކްޓަރު އަބްދުލްރައްޒާގް ހަލީމް އެވެ.

ބާދޯންޏެއް ގަތް ކަމަށް ބުނާ މައްސަލައިގެ އިތުރުން، އެމްޕީއެލް އަށް ތެޔޮ ގަތުމަށް މެރީޑިއަމާއެކު ހެދި އެއްބަސްވުމެއްގެ މައްސަލަ ވެސް އޭސީސީން ދަނީ ތަހުގީގު ކުރަމުންނެވެ.