ރައީސް ސޯލިހްގެ ވެރިކަމުގެ ކުދި ފިޔަވަޅުތަކުން ހެދިބޮޑުވާ ގަހާއި މޭވާ ރަނގަޅަށް ފެންނާނެ: ޝާހިދު
މި މަޝްރޫއުގެ ދަށުން ރާއްޖެ އުތުރުން ދެކުނުގެ ރަށްތަކަށް ފައިދާ ކުރާނެ
ފޮރިން މިނިސްޓަރ އަބްދުﷲ ޝާހިދު
ރައީސް އިބްރާހިމް މުހައްމަދު ސޯލިހްގެ ވެރިކަމުގައި ކުދި ފިޔަވަޅުތަކެއް އެޅިނަމަވެސް އެފިޔަވަޅުތަކުން ހެދިބޮޑުވާ ގަހާއި މޭވާ ފެންނަން ހުންނާނެ ކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެ އެވެ.
ރާއްޖޭގެ 67 ރަށެއްގައި ކުޑަކުދިންގެ ޕާކު އެޅުމަށް ބޭނުންވާ ސާމާނު ހަވާލުކުރަމަށް ބޭއްވި ހާއްސަ ހަފްލާގައި ވާހަކަ ދައްކަވަމުން މިނިސްޓަރ ވިދާޅުވީ ތުއްތުކުދިންގެ ޕާކަކީ އެޕާކަކަށް ކުދިން ޒިޔާރަތްކޮށް އެއްކުއްޖަކު އަނެއްކުއްޖަކާއި އިޖްތިމާއީ ގޮތުން ބައްދަލުވެ ދިރިއުޅުމުގެ ވައްޓަފާޅި ދަސްކޮށް ހިޔާލުފާޅު ކުރުމާއި ހިޔާލުތަފާތުވެގެން އެކުގައި އުޅުމާއި ޑިމޮކްރަސީގެ މަތިވެރި ނަމޫނާތައް ހިތުގައި އަށަގެންނެވުމަށް މަގުފަހިކޮށްދޭ ތަނެއް ކަމަށެވެ.
މި ހަފްލާގައި ވާހަކަދައްކަވަމުން އިންޑިއާގެ ފޮރިން ސެކްރެޓަރީ ހާރްޝް ވަރްދަން ޝްރިންގްލާ ވަނީ ރާއްޖޭގެ 67 ރަށެއްގައި ކުޑަކުދިންގެ ޕާކު ގާއިމްކުރުމަށް ބޭނުންވާ ސާމާނު ހަދިޔާކުރުން މިއީ އިންޑިއާ އާއި ރާއްޖެއާ ދެމެދު މިއޮންނަ ގުޅުމަކީ ހުރިހާ ދާއިރާއަކުންވެސް ފައިދާކުރަނިވި ގުޅުމެއްކަން ދައްކައިދޭ ކަމެއް ކަމަށް ވިދާޅުވެފަ އެވެ.
މި މަޝްރޫއުގެ ދަށުން ރާއްޖެ އުތުރުން ދެކުނުގެ ރަށްތަކަށް ފައިދާ ކުރާނެ ކަމަށް ފޮރިން ސެކްރެޓަރީ ވިދާޅުވި އެވެ.
އިންޑިއާގެ ސަރުކާރުގެ ފަރާތުން ޕާކުތައް ތަރައްގީކުރުމަށް ހަދިޔާ ކުރާ ސާމާނުތައް ދިވެހި ސަރުކާރާއި ހަވާލުކޮށްދެއްވީ އިންޑިއާގެ ފޮރިން ސެކްރެޓަރީ ހާޝް ޝްރިންގްލާއެވެ. ދިވެހި ސަރުކާރުގެ ފަރާތުން މި ސާމާނުތަކާއި ހަވާލުވީ ކުޅިވަރާއި ބެހޭ ވަޒީރު އަހުމަދު މަހުލޫފްގެ އިތުރުން ހާރިޖީ ވަޒީރު އަބްދުﷲ ޝާހިދުއެވެ.
