ގޮވާލާ ކޮންމެ ގޮވާލުމަކަށް އެންމެ ފުރަތަމަ އިޖާބަ ދެނީ އިންޑިއާއިން: ޝާހިދު
9 ނޮވެމްބަރު 2020 | ހޯމަ 16:18އިންޑިއާ އާއި ރާއްޖެއާ ދެމެދު އޮންނަ ގުޅުމަކީ ރައްޔިތުންނާއި ރައްޔިތުންގެ ގުޅުމެއް
ފޮރިން މިނިސްޓަރ އަބްދުﷲ ޝާހިދު
ރާއްޖެއިން ގޮވާލާ ކޮންމެ ގޮވާލުމަކަށް އެންމެ ފުރަތަމަ އިޖާބަދެނީ އިންޑިއާއިން ކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.
މިިނިސްޓަރ ޝާހިދު މިހެން ވިދާޅުވީ ގްރޭޓަރ މާލެ ކޮނެކްޓިވިޓީ ޕްރޮޖެކްޓްއަށް ދޭ 100 މިލިއަން ޑޮލަރުގެ ގްރާންޓް އެއްބަސްވުމާއި އިތުރު ތިން އެއްބަސްވުމެއްގައި އިންޑިއާ އާއި އެކު ސޮއިކުރުމަށް ބޭއްވި ހާއްސަ ރަސްމިއްޔާތުގައި ވާހަކަފުޅުދައްކަވަމުންނެވެ.
އެގޮތުން މި ރަސްމިއްޔާތުގައި މިނިސްޓަރ ވަނީ މި އަހަރުގެ ނޮވެމްބަރ އެއްވަނަ ދުވަހު ރާއްޖެ އާއި އިންޑިއާއާ ދެމެދު އޮތް ޒަމާންވީ ޑިޕްލޮމެޓިކް ގުޅުމަށް 55 އަހަރު ފުރުމުގެ މުނާސަބަތު ފާހަގަކޮށްފައިވާއިރު، އިންޑިއާއަކީ ރާއްޖޭގެ މިނިވަންކަން ބަލައިގެން އެންމެ ފުރަތަމަ ބަލައިގެން އެއް ގައުމުކަމަށް ވިދާޅުވެފައެވެ. އެހެންނަމަވެސް ދެ ގައުމުގެ ރައްޔިތުންގެ މެދުގައި އޮތް ގުޅުން، ޑިޕްލޮމެޓިކް ގުޅުމަކަށް ވުރެ ވަރުގަދަ ކަމަށް ވެސް މިނިސްޓަރ ފާހަގަކުރެއްވިއެވެ.
މިނިސްޓަރ ޝާހިދު ވިދާޅުވީ އިންޑިއާ އާއި ރާއްޖެއާ ދެމެދު އޮންނަ ގުޅުމަކީ ރައްޔިތުންނާއި ރައްޔިތުންގެ ގުޅުމެއް ކަމަށާއި މި ގުޅުން ބުނާވެގެން ވަނީ ދެގައުމުގެ ރައްޔިތުންގެ ވެސް ގަބޫލުކުރާ އެތްގޮތް މިންގަނޑުތަކެއް މައްޗަށްކަމަށެވެ. އަދި ދެ ގައުމުގެ ރައްޔިތުންގެ ދެމެދުގައި އޮންނަ މިގުޅުމަކީ ދެ ސަރުކާރުގެ ދެމެދުގައި އޮންނަ ގުޅުން އިތުރަށް ހަރުދަނާ ކޮށްދޭ ސަބަބުކަމަށްވެސް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ރާއްޖެއަށް ދިމާވާ ގޮންމެ ގޮންޖެހުމެއްގައި ވެސް ރާއްޖެއާ އެކު އޮންނަ ގައުމަކީ އިންޑިއާ ކަމަށާއި އެހީއަށް އެދި ގޮވާލާ ކޮންމެ ފަހަރަކު އެންމެ ފުރަތަމަ އިޖާބަދެނީ އަބަދުވެސް އިންޑިއާއިން ކަމަށެވެ.
މީގެ އިތުރުން މިނިސްޓަރ ވަނީ ރާއްޖެ އާއި އިންޑިއާއާ ދެމެދު އޮތް ގުޅުން ރައީސް އިބްރާހިމް މުހައްމަދު ސޯލިހްގެ ވެރިކަމުގައި ފާއިތުވި ދެ އަހަރު އިތުރަށް ހަރުދަނާވެގްނެ ގޮސްފައިވާކަން ފާހަގަކުރައްވާފައެވެ.
