ހަނިމާދޫ އާއި އައްޑޫ އެއަރޕޯޓު އަޕްގްރޭޑު ކުރުމުގެ މަޝްރޫއު އަންނަ އަހަރު ފަށަނީ
9 ނޮވެމްބަރު 2020 | ހޯމަ 13:07މި މަޝްރޫއުތައް ފެށުމަށް 2021 ވަނަ އަހަރުގެ ބަޖެޓުގައި ހިމެނިފައިވޭ
އައްޑޫ އިންޓަރނޭޝަނަލް އެއަރޕޯޓު: އަންނަ އަހަރު އަޕްގްރޭޑް ކުރުމުގެ މަސައްކަތް ކުރިއަށްދާނެ
ހދ. ހަނިމާދޫ އިންޓަރ ނޭޝަނަލް އެއަރޕޯޓާއި އާއި އައްޑޫ އިންޓަނޭޝަނަލް އެއަރޕޯޓު އަޕްގްރޭޑު ކުރުމުގެ މަޝްރޫއު އަންނަ އަހަރު ފެށުމަށް އަންނަ އަހަރަށް ލަފާކުރާ ދައުލަތުގެ ބަޖެޓްގައި ހިމަނައިފިއެވެ.
ރައްޔިތުންގެ މަޖިލީހަށް، 2021 ވަނަ އަހަރަށް ލަފާކުރާ ދައުލަތުގެ ބަޖެޓް ހުށަހަޅުއްވާ ދެއްވަމުން ފިނޭންސް މިނިސްޓަރު އިބްރާހިމް އަމީރު ވިދާޅުވީ ސަރުކާރުގެ ސަރަހައްދީ ތަރައްޤީގެ ތަސައްވުރުގެ ތެރެއިން ހދ. ހަނިމާދޫ އިންޓަނޭޝަނަލް އެއާޕޯޓާއި އައްޑޫ އިންޓަނޭޝަނަލް އެއާޕޯޓު އަޕްގްރޭޑު ކުރުމުގެ މަޝްރޫއުތައް ފެށުމަށް 2021 ވަނަ އަހަރުގެ ބަޖެޓުގައި ހިމެނިފައިވާ ކަމަށެވެ.
މިނިސްޓަރު ވިދާޅުވީ ރާއްޖޭގެ އުތުރާއި ދެކުނުގައި، ފެންވަރު ރަނގަޅު އެއަރޕޯޓްތަކެއް ގާއިމު ވެގެންދިއުމަކީ އުތުރާ ދެކުނުގެ ފަތުރުވެރިކަމުގެ ސިނާއަތް އިތުރަށް ފުޅާވެ، އިޤްތިސާދީ ހަރަކާތްތައް އިތުރުވެ، ވަޒީފާގެ ފުރުޞަތުތައް އެ ސަރަހައްދުތަކުގައި ތަނަވަސްވެގެން ދާނެ ކަމަށެވެ. މީގެ އިތުރުން ޑޮމެސްޓިކް ގިނަ އެއާޕޯޓުތައް ތަރައްޤީ ކުރުމަށް ވެސް ބަޖެޓުގައި ރޭވިފައިވާ ކަމަށް މިނިސްޓަރު އަމީރު ވިދާޅުވިއެވެ.
ދުނިޔޭގެ ފަތުރުވެރިކަމުގެ މާކެޓުގައި ވާދަވެރިކަން އިތުރުވެގެންދާ މިދަނޑިވަޅުގައި ރާއްޖޭގެ ފަތުރުވެރިކަން މާކެޓުކޮށް ޕްރޮމޯޓުކުރުމަށް ހާއްސަ އިސްކަމެއް ދީފައި ވާނެ ކަމަށާއި އެގޮތުން ފަތުރުވެރިކަން މާކެޓު ކުރުމަށް 224 މިލިއަން ރުފިޔާ ބަޖެޓުގައި ކަނޑައަޅާފައި ވާނެ ކަމަށް މިނިސްޓަރު ވިދާޅުވިއެވެ.
ފަތުރުވެރިކަން ކުރިއެރުވުމަށް އެންމެ މުހިންމު އެއް ދާއިރާއަކީ ވައިގެ ދަތުރުފަތުރުގެ ނިޒާމު ކަމަށާއި އަންނަ އަހަރުގެ ބަޖެޓުގައި ވެލާނާ އިންޓަނޭޝަނަލް އެއާޕޯޓު ތަރައްޤީ ކުރުން ބާރު ސްޕީޑެއްގައި ކުރިއަށް ގެންދިއުމަށް 2.2 ބިލިއަން ރުފިޔާ ބަޖެޓުކޮށްފައި ވާނެ ކަމަށް ވެސް އަމީރު ވިދާޅުވިއެވެ.
ސަރުކާރުގެ އަމާޒަކީ، ދުނިޔޭގެ ދަތުރުފަތުރުގެ ނިޒާމް އަލުން ރިކަވަރވާ އިރަށް އެ މަޝްރޫއުތައް ނިމި، އެ ވަސީލަތްތަކުގެ އިޤްތިސާދީ ފައިދާ ލިބި ރާއްޖޭގެ ފަތުރުވެރިކަމުގެ ސިނާއަތް އިތުރު ހަރުފަތަކަށް ގެންދިއުން ކަމަށް ވެސް ފިނޭންސް މިނިސްޓަރު އަމީރު ވިދާޅުވިއެވެ.
