އެމްއެންޔޫއެސްޔޫ 9 ވަނަ ދައުރުގެ ހިންގާ ކޮމެޓީއިން މަގާމާއި ހަވާލުވެއްޖެ
އައު ހިންގާ ކޮމެޓީގެ މެމްބަރުންނާއި މަގާމުތައް ހަވާލުކޮށްދެއްވީ އެމްއެންޔޫގެ ވައިސް ޗާންސެލަރ ޑރ. މުހައްމަދު ޝަރީފް
އެމްއެންޔޫއެސްޔޫގެ 9 ވަނަ ދައުރުގެ މެމްބަރުން މަގާމާއި ހަވާލުވުމަށް ބޭއްވުނު ރަސްމިއްޔާތުގެ ތެރެއިން
ދިވެހިރާއްޖޭގެ ގައުމީ ޔުނިވަރސިޓީގެ ދަރިވަރުންގެ ޔޫނިއަން (އެމްއެންޔޫއެސްޔޫ) ގެ 9 ވަނަ ދައުރުގެ ހިންގާ ކޮމެޓީއިން މަގާމާއި ހަވާލުވެއްޖެ އެވެ.
ގައުމީ ޔުނިވަރސިޓީގެ ފެކަލްޓީ އޮފް އެޑިއުކޭޝަން (އެފްއީ) އޮޑިޓޯރިއަމްގައި ބޭއްވުނު ރަސްމިއްޔާތެއްގައި އައު ހިންގާ ކޮމެޓީގެ މެމްބަރުންނާއި މަގާމުތައް ހަވާލުކޮށްދެއްވީ އެމްއެންޔޫގެ ވައިސް ޗާންސެލަރ ޑރ. މުހައްމަދު ޝަރީފް އެވެ.
މި ރަސްމިއްޔާތުގައި އެމްއެންޔޫގެ އިސްވެރިންނާއި، ޖަމިއްޔާތަކުގެ ރަޖިސްޓަރ އަހުމަދު އިރާޝް ވަނީ ބައިވެރިވެވަޑައިގަންނަވާފައެވެ. މީގެ އިތުރުން އެމްއެންޔޫއެސްޔޫގެ މެމްބަރުންނާއި، އެހެނިހެން ކޮލެޖް އަދި ޔުނިވަރސިޓީގެ ދަރިވަރުން ވަނީ ބައިވެރިވެފައެވެ.
ރައީސް: އަބްދުﷲ ޝަހުނީޒް
ނައިބު ރައީސް (އިތުރު ހަރަކާތްތައް): ހުސައިން އަލީ
ނައިބު ރައީސް (ގޮފިތައް): ހުސައިން ޒައިދު
ނައިބު ރައީސް (އިލްމީ): އާމިނަތު މިހުދާ މުހައްމަދު
ހަޒާންދާރު: އަހްމަދު ހައްޔާން ރަޝީދު
ސެކެޓްރީ: ފާތިމަތު ނަޝާތު ވަހީދު
އެސިސްޓެންޓް ސެކެޓްރީ: އައިޝަތު އީފާ އިބްރާހީމް
މީޑިއާ ކޯޑިނޭޓަރ: ޝުއައިބް މުހައްމަދު އިގްބާލް
ރައީސް ކަމާއި ހަވާލުވުމަށްފަހު އެމްއެންޔޫއެސްޔޫގެ ރައީސް އަބްދުﷲ ޝަހުނީޒް ބުނީ ކުރިޔަށް އޮތް ދައުރު، ޔޫނިއަންގެ ހަރަކާތްތައް އިތުރަށް ފުޅާ ކުރުމަށް ނިންމާފައިވާ ކަމަށެވެ. އަދި މުޅި ރާއްޖެއަށް ހުޅުވާލައިގެން ޔޫނިއަންގެ ހަރަކާތްތައް މިދައުރުގައި ފެނިގެންދާނެ ކަމަށް އޭނާ ބުންޏެވެ.
މި ރަސްމިއްޔާތުގައި އެމްއެންޔޫއެސްޔޫގެ އެޑްވައިޒަރީ ބޯޑު މެމްބަރު މުހައްމަދު ޝާން އާމިރުގެ އިތުރުން ޑީން އޮފް ސްޓޫޑެންޓްސް ލީލާ އަހުމަދު ވަނީ ވާހަކަދައްކަވައިފައެވެ.
އެމްއެންޔޫއެސްޔޫއަކީ ދިވެހިރާއްޖޭގައި މިވަގުތު އޮތް އެންމެ ހަރަކާތްތެރި އަދި އެންމެ މެމްބަރުން ގިނަ މަދަނީ ޖަމިއްޔާއެވެ. މި ޖަމިއްޔާއަށް 8 އަހަރު ނޮވެމްބަރު 6 ވަނަ ދުވަހު ވެފައިވާއިރު ޔޫނިއަންއުން އަންނަނީ އެމްއެންޔޫގެ ދަރިވަރުން ތަމްރީނުކުރުމާއި ދަރިވަރުން ބާރުވެރި ކުރުމަށް ގިނަ މަސައްކަތްތަކެއް ކުރަމުންނެވެ.
