ޕްރޯ ލައިސަންސް ނެގުމަށް ސުޒޭނާއި އިންމަ ހޮވައިފި

ފުޓްބޯޅައިގެ އެންމެ މަތީ ކޯޗިންގ ލައިސަންސް ކަމަށްވާ އޭއެފްސީ ޕްރޯ ލައިސަންސް ގައުމީ ފުޓްބޯޅަ ޓީމުގެ އެސިސްޓަންޓް ކޯޗު އަލީ ސުޒޭނާއި ދަ ގްރާންޑޭ ސްޕޯޓްސް ކުލަބުގެ ކޯޗު އިސްމާޢީލް މަހަފޫޒް (އިންމަ) ހޮވިއްޖެއެވެ.

އޭއެފްސީ ޕްރޯ ލައިސަންސަކީ ޔުއެފާ ޕްރޯ ލައިސަންސާ އެއް ފެންވަރެއްގެ ސެޓްފިކެޓެކެވެ. މިއީ އޭ ލައިސަންސަށްފަހު ދެން އޮންނަ، އަދި ފުޓްބޯޅައިގައި މިވަގުތު ނެގެން އޮންނަ އެންމެ މަތީ ލައިސަންސެވެ.

މީގެ ކުރިން ރާއްޖޭގެ ދެ ކޯޗަކު ވަނީ މި ލައިސަންސް ނަގާފައެވެ. އެގޮތުން އެންމެ ފުރަތަމަ މި ލައިސަންސް ނެގީ ޓީސީ ސްޕޯޓްސް ކުލަބުގެ ކޯޗު މުޙައްމަދު ޝާޒްލީ (ޝާޒް) އެވެ. އޭގެ ފަހުން މި އަހަރުގެ ޖޫން މަހުގެ ތެރޭގައި ކުލަބު އީގަލްސްގެ ކޯޗު މުޙައްމަދު ޝިޔާޒް (މޯހަން) ވަނީ މި ލައިސަންސް ހާސިލުކޮށްފައެވެ.

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް، މިދިޔަ ޖުލައި މަހު ދެވަނަ ދައުރަކަށް އިންތިޚާބުވެވަޑައިގަތުމަށްފަހު، ކުރިއަށް އޮތް ދައުރުގައި ރާއްޖޭގެ ޕްރޯ ލައިސަންސް ކޯޗުންގެ އަދަދު ފަހަކަށް އެރުވުމަށް ވަނީ ވައުދުވެވަޑައިގެންފައެވެ. އެހެންކަމުން ހުކުރު ދުވަހު ބައްސާމް ކުރެއްވި ޓްވީޓެއްގައި ވިދާޅުވީ އެ އަމާޒަށް ވާސިލުވުމަށް މަސައްކަތްކުރަމުން އަންނަ ކަމަށާއި އެހެންކަމުން އަންނަ އަހަރު ޕްރޯ ލައިސަންސް ނެގުމަށް ސުޒޭނާއި އިންމަ ހޮވާފައިވާ ކަމަށެވެ.

ޕްރޯ ލައިސަންސް ނެގުމަށް އެފްއޭއެމުން ސުޒޭން ހޮވިއިރު، އޭނާ ވަނީ މި އަހަރުގެ ފެބްރުއަރީ މަހު ގައުމީ ފުޓްބޯޅަ ޓީމުގެ އެސިސްޓަންޓް ކޯޗުގެ މަގާމާ ހަވާލުވެފައެވެ. މިއީ ސުޒޭން ގައުމީ ޓީމުގެ އެސިސްޓަންޓް ކޯޗެއްގެ ގޮތުގައި މަސައްކަތްކުރާ ދެވަނަ ފަހަރެވެ. އޭނާ ވަނީ 2005 ވަނަ އަހަރުގެ ސާފް ޗެމްޕިއަންޝިޕުގައި ގައުމީ ފުޓްބޯޅަ ޓީމުގެ އެސިސްޓަންޓް ކޯޗެއްގެ ގޮތުގައި މަސައްކަތްކޮށްފައެވެ. އަދި 2007 ވަނަ އަހަރު 23 އަހަރުން ދަށުގެ ގައުމީ ޓީމުގެ ކޯޗުގެ މަގާމުވެސް އަދާކުރިއެވެ.

މީގެ އިތުރުން ރާއްޖޭގެ އެންމެ މޮޅު ކޯޗުގެ މަގާމުވެސް ހޯދާފައިވާ ސުޒޭން ވަނީ ކުލަބު ކޯޗިންގ ކެރިއަރުގައި ގިނަ ކާމިޔާބީތަކެއް ހޯދާފައެވެ. އެގޮތުން ރާއްޖޭގައި ބާއްވާ ހުރިހާ މުބާރާތެއްގެ ތަށި ސުޒޭން ކޯޗެއްގެ ގޮތުގައި ކާމިޔާބުކޮށްފައިވާއިރު، އޭނާ އަކީ ރާއްޖޭގައި އުފެދުނު އެންމެ ކާމިޔާބު ކޯޗެވެ.

މީގެ އިތުރުން ޕްރޯ ލައިސަންސް ނެގުމަށް ހޮވި އިންމަ މިހާރު އިރުޝާދު ދެމުން އަންނަނީ ފުރަތަމަ ޑިވިޝަނުގައި ވާދަކުރަމުން އަންނަ ދަ ގްރާންޑޭއަށެވެ. ގައުމީ ފުޓްބޯޅަ ޓީމުގެ އެސިސްޓަންޓް ކޯޗެއްގެ ގޮތުގައި ގިނަ އަހަރުތަކެއް ވަންދެން މަސައްކަތް ކޮށްފައިވާ އިންމަ ވަނީ އޭރު ދެ ފަހަރެއްގެ މަތިން ގައުމީ ފުޓްބޯޅަ ޓީމުގެ ހެޑް ކޯޗެއްގެ ޒިންމާވެސް އުފުލާފައެވެ. ކުލަބު ކޯޗިންގ ކެރިއަރުގައި އިންމަގެ ހަމައެކަނި ކާމިޔާބީއަކީ މާޒިޔާ ސްޕޯޓްސް އެންޑް ރެކްރިއޭޝަނާއެކު 2012 ވަނަ އަހަރުގެ އެފްއޭ ކަޕް ކާމިޔާބުކުރުމެވެ.