ގައުމީ ފިރިހެން ފުޓުބޯޅަ ޓީމުގެ އެސިސްޓެންޓް ކޯޗުގެ މަގާމު ދޫކޮށް، އިސްމާއިލް މަހުފޫޒް (އިންމަ) މާޒިޔާ ސްޕޯޓްސް އެންޑް ރެކްރިއޭޝަންގެ ކޯޗުކަމާ ހަވާލުވެއްޖެއެވެ.

އިންމަ މާޒިޔާގެ ކޯޗު ކަމަށް ގެނެސްފައި ވަނީ އެޓީމުގެ ކޯޗު މަރްޖާން ސެކުލޮވްސްކީ އެ ކްލަބާއެކު ހަދާފައިވާ އެއްބަސްވުން އާނުކުރަން ނިންމުމުންނެވެ.

އަންނަ އަހަރުގެ ނިޔަލަށް މާޒިޔާގެ ކޯޗުކަމާ ހަވާލުވުމަށް ފަހު، ނޫސްވެރިންނަށް މައުލޫމާތު ދެމުން އިންމަ ބުނީ އަލުން މާޒިޔާގެ އާއިލާއާ ގުޅުމުން ވަރަށް އުފާވާ ކަމަށާއި، މާޒިޔާ އަނބުރާ ކުރިން އޮތް ފޯމަށް ގެނައުމަށް ބުރަ މަސައްކަތް ކުރާނެ ކަމަށެވެ.

އިންމަ ބުނީ ރާއްޖެ ފުޓުބޯޅައަށް ވަރަށް ބޮޑެތި ބަދަލުތަކެއް އައިސްފައިވާ ކަމަށާއި، ކުރިއަށްވުރެ އޭނާ ވެސް އިންޕްރޫވްވެފައިވާ ކަމަށެވެ.

އިންމަ ވަނީ އެކްލަބަށް މީގެކުރިން ގިނަ އަހަރުތަކެއް ވަންދެން ކޯޗުކަން ކޮށްދީފައެވެ. އެގޮތުން އޭނާ ވަނީ 2006 ވަނަ އަހަރު މާޒިޔާ ފުރަތަމަ ޑިވިޝަނަށް ކޮލިފައިވި ހިސާބުން ފެށިގެން 2014 ވަނަ އަހަރުގެ ނިޔަލަށް އެ ކްލަބަށް ކޯޗުކޮށްދީފައެވެ. މީގެއިތުރުން އޭނާ ވަނީ މާޒިޔާ އަށް 2012 ވަނަ އަހަރު އެފްއޭކަޕްވެސް ކާމިޔާބުކޮށްދީފައެވެ.

ގައުމީ ޓީމުގެ އެސިސްޓެންޓް ކޯޗުކަން އެންމެ ފަހުން ފުރަމުން އައި އިންމަ ވަނީ ދެފަހަރު މަތިން ހެޑްކޯޗުކަންވެސްކޮށްފައެވެ. އެގޮތުން އޭނާ ވަނީ ގައުމީ ޓީމު ވޯލްޑްކަޕް ކޮލިފައިންގައި ރަށުން ބޭރުގައި ޗައިނާއާ ދެކޮޅަށް ކުޅުނު މެޗު އަދި އޭޝިއަން ކަޕް ކޮލިފައިންގައި ޔަމަންއާ ދެކޮޅަށް ކުޅުނު މެޗުގައިވެސް އިރުޝާދު ދީފައެވެ.

އިންމަގެ އިރުޝާދުގެ ދަށުން މާޒިޔާ އެންމެ އަވަހަށް ކުޅޭނީ އުރީދޫ ދިވެހި ޕްރިމިއާ ލީގުގައި ށ.މިލަންދޫއާ ދެކޮޅަށް އަންނަ ހޮނިހިރު ދުވަހު ކުޅޭ މެޗުގައެވެ.

ލީގުގެ ޕޮއިންޓް ތާވަލަށް ބަލާއިރު، މާޒިޔާ އޮތީ 23 ޕޮއިންޓާއެކު ޕޮއިންޓް ތާވަލުގެ ތިންވަނައިގައެވެ. އެއްވަނައިގައި 30 ޕޮއިންޓާއެކު ނިއު ރޭޑިއަންޓް ސްޕޯޓްސް ކްލަބް އޮތްއިރު، ދެވަނައިގައި 26 ޕޮއިންޓާއެކު އޮތީ ޓީސީ ސްޕޯޓްސް ކްލަބެވެ.