ކުޑަ އިންމަ ވެސް ގައުމީ ޓީމަށް ކުޅުން ހުއްޓާލައިފި

ގައުމީ ފުޓުބޯޅަ ޓީމުގެ ދެވަނަ ކީޕަރު މުހައްމަދު އިމްރާން (ކުޑަ އިންމަ) ވެސް ގައުމީ ޓީމަށް ކުޅުން ހުއްޓާލައިފިއެވެ.

އުމުރުން 32 އަހަރުގެ ކުޑަ އިންމަ ގައުމީ ޓީމަށް ކުޅުން ހުއްޓާލާފައި ވަނީ އަންގާރަ ދުވަހު އޮމާން އަތުން ރާއްޖެ 1-3 ގެ ނަތީޖާއިން ބަލިވި މެޗަށް ފަހުއެވެ.

ގައުމީ ޓީމުން 2012 ވަނަ އަހަރު ފުރަތަމަ ފަހަރަށް ޖާގަ ހޯދި ކުޑަ އިންމަ ފުރަތަމަ ފަހަރަށް ވާދަވެރި މެޗެއް ކުޅުނީ 2015 ވަނަ އަހަރު ވޯލްޑްކަޕް ކޮލިފައިންގައެވެ. އޭނާ އަށް އެފަހަރު ޓީމުން ފުރުސަތު ލިބުނީ އެއް ނަމްބަރު ކީޕަރު އިމްރާން މުހައްމަދަށް ލިބުނު އަނިޔާއާ ގުޅިގެންނެވެ. އެގޮތުން ކުޑަ އިންމަ ވަނީ ބޫޓާން، ޗައިނާ އަދި ހޮންކޮންއާ ދެކޮޅަށް ކޮލިފައިންގައި ކުޅެފައެވެ.

ގައުމީ ޓީމުގެ ކީޕަރުންނާ މެދު ސުވާލު އުފެދިފައިވާ ދަނޑިވަޅެއްގައި ކުޑަ އިންމަ ރިޓަޔާކޮށްފައިވާއިރު، ޓީމަށް ދެން ނަގާނީ ކޮން ކުޅުންތެރިއެއްކަން އަދި ނޭނގެއެވެ. ގައުމީ ކޯޗުކަމާ ޑަރެން ސްޓެވާޓް ހަވާލުވި ފަހުން ކުޑަ އިންމައަށް ފުރުސަތެއް ނުލިބެއެވެ. ގައުމީ ޓީމުގެ އެއް ނަމްބަރު ކީޕަރަކީ ފައިސަލްއެވެ.

ރާއްޖެއެމްވީ އަށް މައުލޫމާތު ލިބިފައިވާ ގޮތުގައި އޭޝިއަން ކަޕް ކޮލިއިންގައި އޮމާން އަތުން ރާއްޖެ 1-3 ގެ ނަތީޖާއިން ބަލިވި މެޗަށް ގައުމީ ޓީމުގެ ތިން ނަމްބަރު ކީޕަރު ޒިޔަޒަން ނަގާފައިވަނީ މެޗު ކުޅެން އެންމެ ދުވަހަކަށް ވެފައިވަނިކޮށެވެ. މައުލޫމާތު ލިބޭގޮތުގައި ޒިޔަޒަން ޓީމަށް ނަގާފައި ވަނީ ބެންޗުގައި ތިން ކީޕަރުން ތިބެން ޖެހުމާއެކު، ރަޖިސްޓްރީކޮށްފައިވާ ތިން ކީޕަރުން ތެރޭގައި އޭނާގެ ނަން ހިމެނޭތީއެވެ.

ރާއްޖޭގައި މޮޅެތި ޒުވާން ކީޕަރުން އަންނަނީ ކުރިއަރަމުންނެވެ. އެގޮތުން ދިވެހި ޕްރިމިއާ ލީގުގައި ކުޅޭ ބައެއް ދިވެހި ކީޕަރުންނަށް އަންނަނީ އެތައް ބަޔަކު ތައުރީފްކުރަމުންނެވެ. އެ ކީޕަރުންނަށް ގައުމީ ޓީމުން ފުރުސަތު ނުދޭތީ ގިނަ ބަޔަކު ދަނީ ފާޑުކިޔަމުންނެވެ.