އުރީދޫ ދިވެހި ޕްރިމިއާ ލީގުގައި ގްރީން ސްޓްރީޓްސް ބަލިކޮށް އިސްމާއިލް މަހުފޫޒް (އިންމަ) ގެ އިރުޝާދުގެ ދަށުން މާޒިޔާ އިން ފުރަތަމަ މޮޅު ހޯދައިފިއެވެ.

އިންމަގެ އިރުޝާދުގެ ދަށުން މާޒިޔާ އެންމެ ފުރަތަމަ ކުޅުނު މެޗު އެއްވަރުވިއިރު، އާދިއްތަ ދުވަހުގެ ރޭ ގްރީން ސްޓްރީޓް އަތުން އެ ޓީމު މޮޅުވެފައިވަނީ 3-0 ގެ ނަތީޖާ އަކުންނެވެ.

ގްރީން ސްޓްރީޓްގެ ބިދޭސީ ކުޅުންތެރިން ޓީމުގައި ނުހިމަނައި އެ ޓީމުން ކުޅުނު މި މެޗުގައި މާޒިޔާއިން ވަނީ ރަނގަޅު ކުޅުމެއް ދައްކައި ލަނޑު ޖެހުމަށް ގިނަ ފުރުސަތުތަކެއް ތަނަވަސް ކޮށްފައެވެ. މެޗުގެ ފުރަތަމަ ހާފުގެ އިތުރު ވަގުތުގެ ތެރޭގައި މާޒިޔާއަށް ލީޑު ނަގައިދިނީ އެ ޓީމުގެ ބިދޭސީ ކުޅުންތެރިޔާ މިހަލޮވިޗް ބޮޔާންއެވެ. މި ލަނޑަކީ އެ ޓީމުގެ މޫސާ ޔާމީން ނަގައިދިން ހުރަހެއް ބޮލުން ގޯލުގެ ތެރެއަށް ވައްދާލައިގެން އޭނާ ކާމިޔާބު ކޮށްދިން ލަނޑެކެވެ.

އެއް ލަނޑުގެ ލީޑެއްގައި އޮވެ މާޒިޔާއިން ފުރަތަމަ ހާފު ނިންމާލިއިރު ދެވަނަ ހާފުގައި ގްރީން އިން ވަނީ އެ ޓީމުގެ ކުޅުން ރަނގަޅުކޮށްފައެވެ. އެހެނަސް ގްރީންގެ ކުޅުން ރަނގަޅުކުރިތާ މާ ގިނައިރުތަކެއް ނުވަނީސް މާޒިޔާއިން ވަނީ އެ ޓީމުގެ ދެވަނަ ލަނޑު ޖަހައި މެޗުގެ ލީޑު ފުޅާ ކޮށްފައެވެ. މި ލަނޑަކީ މެޗުގެ 53 ވަނަ މިނެޓުގައި އެ ޓީމުގެ ބިދޭސީ ފޯވާޑް ކެރިޗްއަށް ގްރީންގެ އޭރިއާ ތެރެއިން ފައުލް ކުރުމާއި ވިދިގެން ރެފްރީ ދިން ޕެނަލްޓީއަކުން އިސްމާއިލް (އީސާ) ޖަހައިދިން ލަނޑެކެވެ. މާޒިޔާގެ ތިންވަނަ ލަނޑު މެޗުގެ 71 ވަނަ މިނެޓުގައި ޖަހައިދިނީ ތަޖުރިބާކާރު މިޑްފީލްޑަރު އައްސަދު އަލީ (އަޑުބަރޭ) އެވެ. 

މި މެޗުން މޮޅުވުމާއެކު މާޒިޔާއިން ވަނީ ކުޅުނު 13 މެޗުން 27 ޕޮއިންޓް އެއްކޮށް ލީގުގެ ތިން ވަނައިގައި ހަމަޖެހިލާފައެވެ. މި މެޗުން ބަލިވި ގްރީން އޮތީ ކުޅުނު 13 މެޗުން ލިބުނު 16 ޕޮއިންޓާއެކު ތާވަލުގެ ހަތަރު ވަނައިގައެވެ. އެހެނަސް އެ ޓީމަށް ލީގުގެ ގަދަ ހަތަރަކުން ޖާގަ ލިބުމުގެ ފުރުސަތު ވަނީ ވަރަށް ބޮޑަށް ކުޑަވެފައެވެ. އެއީ ހޯމަ ދުވަހުގެ ހަވީރު ކުޅޭ މެޗުން ތިނަދޫ މޮޅުވެއްޖެ ނަމަ އެ ޓީމަށް ގްރީން ފަހަތަށް ޖައްސާލެވޭނެތީއެވެ.