ވޭން ރޫނީގެ ޑްރައިވިން ލައިސަންސް ދެ އަހަރު ދުވަހަށް ހިފަހައްޓައިފި !

އިނގިރޭސި ކުލަބު އެވަޓަންއަށް ކުޅެމުންއަންނަ ތަޖުރިބާކާރު ފޯވާޑު ވޭން ރޫނީގެ ޑްރައިވިން ލައިސަންސް ދެ އަހަރު ދުވަހަށް ހިފެހެއްޓުމަށް އިނގިރޭސި ވަލާތުގެ މެޖިސްޓްރޭޓް ކޯޓަކުން އޭނާގެ މައްޗަށް އަމުރު އިއްވައިފިއެވެ.

ކޯޓުން ރޫނީގެ މައްޗަށް މިހުކުމް އިއްވާފައިމިވަނީ ސެޕްޓެމްބަރ އެއް ވަނަ ދުވަހުގެ ރޭ، މަސްތުގެ ހާލުގައި ކާރު ދުއްވުމާގުޅިގެންނެވެ.

މި މައްސަލާގައި ރޫނީ ކޯޓަށް ހާޒިރުކުރުމުން ކޯޓުގައި އެކަމަށް އޭނާ ވަނީ އެއްބަސްވެވެފައެވެ. އަދި އެކަން އެގޮތަށް ދިމާވުމުން ރޫނީ ވަނީ އޭނާގެ ސަޕޯޓަރުންނާއި އާއިލާގެ އިތުރުން ކްލަބުގެ ކިބައިން މައާފަށް ވެސް އެދިފައެވެ. ވޭން ރޫނީގެ ލައިސަންސް ދެ އަހަރަށް ހިފަހައްޓަން ކޯޓުން ހުކުމް ކުރި ނަމަވެސް މި ހުކުމުގައި ވާގޮތުން ރޫނީ ސްޕެޝަލިސްޓު ޑްރައިވިން ޓެސްޓުތަކެއް ފުރިހަމަަ ކޮށްފި ކަމުގައި ވަނީނަމަ އޭނާގެ ހުކުމުގެ މުއްދަތު 24 ހަފްތާއަށް ކުޑަވެގެން ދާނެވެ.

މެންޗެސްޓާގެ ސްޓޮކްޕާޓް ޓައުންގައި ހުންނަ މެޖިސްޓްރޭޓް ކޯޓުން ވަނީ، އެ ކުށް އޭނާގެ މައްޗަށް ސާބިތު ވުމުން، ލައިސެންސް ބާތިލު ކޮށް، ކޯޓުން ކަނޑައަޅާ ވަގުތު ފުރިހަމަ ވަންދެން ހިލޭ ސާބަހަށް މަސައްކަތް ކުރުމަށް އަމުރު ކޮށްފަ އެވެ. އެގޮތުން އެއް އަހަރަށް ދެމިގެންދާ ގޮތަށް 100 ގަޑިއިރު ވަންދެން އިޖުތިމާއީ މަސައްކަތް ހިލޭ ސާބަހަށް ކުރުމަށް ރޫނީގެ މައްޗަށް އަމުރު ކޮށްފައި ވެއެވެ. މި މައްސަލާގައި ވޭން ރޫނީ ހުއްޓުވާފައިވަނީ ހުއްދަ ދުވެއްޔަށް ވުރެ ތިން ގުނަ ބާރު ސްޕީޑުގައި ކާރު ދުއްވާފައިދަނިކޮށް ލަންޑަންގެ ޓްރެފިކް ފުލުހުންނެވެ. އެއައްފަހު ހެދި ޓެސްޓު ތަކުން އޭނާ އެގައުމުގައި ހުއްދަކުރާ ވަރަށްވުރެ އިތުރަށް ރާ ބޮއެ މަސްތުވެގެން ހުރިކަމަށް ވަނީ ޕޮޒިޓިވްވެފައެވެ. މިއާއި އެކު އޭނާ ކުޑަވަގުތު ކޮޅަކަށް ހައްޔަރު ކުރި ކަމުގައިވީ ނަމަވެސް މައްސަލައިގެ ބަޔާން ނަގައި ހެދުމަށްފަހު އޭނާ ވަނީ ދޫކޮށްލާފައެވެ.