ދުނިޔޭގެ ފުޓްބޯޅަ އިދާރާއިން ކޮންމެ އަހަރަކު ހޮވާ "ފީފާ ޕްރޯ ވޯލްޑް އިލެވެން" އަށް ވާދަކުރާ ކުޅުންތެރިން އިއުލާނު ކޮށްފިއެވެ.

"ފީފާ ޕްރޯ ވޯލްޑް އިލެވެން" އަކީ ކޮންމެ އަހަރަކު އެއްފަހަރު ފުޓުބޯޅަ ކުޅުންތެރިންގެ ތެރެއިން ފީފާއިން ހޮވާ އެންމެ މޮޅު އެގާރަ ކުޅުންތެރިންގެ ޓީމެކެވެ. މި ޓީމު އެކުލެވިގެން ވަނީ ގޯލްކީޕަރަކާއި ހަތަރު ޑިފެންޑަރުންނާއި ތިން މިޑްފީލްޑަރުންގެ އިތުރުން ތިން ފޯވާޑުންގެ މައްޗަށެވެ.

މި ޓީމު ހޮވުމަށްޓަކައި ދުނިޔޭގެ އެކި ކަންކޮޅުތަކުން 24000 ޕްރޮފެޝަނަލް ކުޅުންތެރިން ވޯޓު ލާނެއެވެ. މިއީ "ފީފާ ޕްރޯ ވޯލްޑް އިލެވެން" ހޮވާ ނުވަވަނަ ފަހަރެވެ. މިއަހަރުގެ ޓީމަށް އެންމެ ގިނައިން ނޮމިނޭޓް ވެފައިވަނީ މިދިޔަ ސީޒަނުގައި ޔުއެފާ ޗެމްޕިއަންސް ލީގާއި ސްޕެނިޝް ލަލީގާ ކާމިޔާބު ކުރި ރެއާލް މެޑްރިޑްގެ ކުޅުންތެރިންނެވެ. އެގޮތުން އެ ޓީމުގެ 13 ކުޅުންތެރިޔަކު ނޮމިނޭޓްވެފައިވާއިރު ބަޔާން މިއުނިކާއި ބާސެލޯނާގެ 8 ކުޅުންތެރިޔަކު ވަނީ ނޮމިނޭޓް ވެފައެވެ. އަދި ފްރާންސްގެ ޕީއެސްޖީގެ ހަ ކުޅުންތެރިޔަކު ވެސް ވަނީ ނޮމިނޭޓްވެފައެވެ.

ދުނިޔޭގެ އެންމެ ވަރުގަދަ ލީގު ކަމަށް ގިނަ ބަޔަކު ބުނާ އިނގިރޭސި ޕްރިމިއާ ލީގުން މި ލިސްޓަށް ނޮމިނޭޓްވެފައި ވަނީ ރެއާލް މެޑްރިޑާއި އެއް އަދަދަކަށް 13 ކުޅުންތެރިންނެވެ. މިކަމާއި ވިދިގެން ގިނަ ބަޔަކު އަންނަނީ ޕްރިމިއާ ލީގަށް ފާޑު ކިޔަމުންނެވެ. ރިޕޯޓުތައް ބުނާގޮތުން ޕްރިމިއާ ލީގުން ނޮމިނޭޓްވި ކުޅުންތެރިންގެ އަދަދު ދަށްވެފައި ވަނީ ޔުއެފާ ޗެމްޕިއަންސް ލީގުގައި ޕްރިމިއާ ލީގުގެ ޓީމުތަކަށް ނާކާމިޔާބިއާ ކުރިމަތިލާން ޖެހުމާ ވިދިގެންނެވެ. 

މި ލިސްޓުގައި ހިމެނިފައިވާ އެންމެ ޒުވާން ކުޅުންތެރިޔަކީ ދާދި ފަހުން 180 މިލިއަން ޔޫރޯގެ ލޯނު އެއްބަސްވުމެއްގެ ދަށުން ޕީއެސްޖީއަށް ބަދަލުވި 18 އަހަރުގެ ފޯވާޑް ކިލިއަން އެމްބާޕޭއެވެ. އޭނާއަށް މި ލިސްޓުން ޖާގަ ލިބިފައި ވަނީ މިދިޔަ ސީޒަނުގައި މޮނާކޯގައި ދެއްކި މޮޅު ކުޅުމާއި ވިދިގެންނެވެ. އެގޮތުން އޭނާވަނީ މިދިޔަ ސީޒަނުގައި މޮނާކޯއަށް ކުޅުނު 60 މެޗުގައި 27 ލަނޑު އެ ޓީމަށް ކާމިޔާބު ކޮށްދީފައެވެ.

މި ޓީމަށް ހޮވޭ ކުޅުންތެރިން އިއުލާނު ކުރެވިގެން ދާނީ އޮކްޓޯބަރު މަހުގެ 23 ވަނަ ދުވަހު ލަންޑަންގައި ބާއްވާ "ފީފާ ދަ ބެސްޓް" އެވޯޑް ހަފްލާގައެވެ.