މަންޓާ އެއަރގެ ހަތްވަނަ ސީޕްލޭން ރާއްޖެ ގެނެސްފި

ހުކުރު ދުވަހު މަންޓާ އެއަރ އޮޕަރޭޝަނަށް 7 ވަނަ ސީޕްލޭން ރާއްޖެ ގެނެސްފިއެވެ.

މަންޓާ އެއަރއިން ބުނީ, އެ އެއަރލައިނުން މި ފަހަރު ގެނައި ސީޕްލޭންއަކީ ޑީއެޗްސީ 6 ޓްވިން އޮޓަރ މަރުކާގެ ބޯޓެއް ކަމަށާއި ހުކުރު ދުވަހު ގެނައި ބޯޓާއެކު އެ ކުންފުނީގެ އުދުހުންތަކަށް ވަރަށް ބޮޑެތި ލުއިތަކެއް ލިބިގެންދާނެ ކަމަށެވެ.

މި ސީޕްލޭން ރާއްޖެއަށް އައިސްފައިވަނީ ކެނެޑާއިން ފުރައިގެން 7 ދުވަހުގެ ދަތުރެއް ކުރުމަށްފަހުއެވެ. އެއީ 16،000 ކިލޯ މީޓަރުގެ ދަތުރެއް ކަމަށް މަންޓާ އެއަރއިން ވަނީ ބުނެފައެވެ.

މަންޓާ އެއަރގެ ސީޕްލޭން އޮޕަރޭޝަނަށް އިތުރުކުރެވުނު ފްލައިޓާއެކު، އެ އެއަރލައިނުގެ ފްލީޓުގައި ހިމެނޭ މަތިންދާބޯޓުތަކުގެ އަދަދުވަނީ 10 އަކަށް އަރާފައެވެ. އޭގެ ތެރޭގައި ހިމެނެނީ އެތެރޭގެ އުދުހުންތަކުގައި ބޭނުންކުރާ އޭޓީއާރު މަރުކާރުގެ ތިން މަތިންދާބޯޓާއި، ހަތް ސީޕްލޭންއެވެ.

ކޮވިޑް-19 އާއި ގުޅިގެން ބޯޑަރު ބަންދު ކުރުމަށްފަހު އަލުން ހުޅުވާލި ފަހުން މަންޓާ އެއަރއިން މިހާރު ދަތުރު ކުރަމުން ގެންދަނީ ރިސޯޓުތަކަށާއި ދ. ކުޑަހުވަދޫއަށް އެކަންޏެވެ. އެހެނިހެން މަންޒިލްތަކަށް ކުރާ އެތެރޭގެ އުދުހުންތައް އެ ކުންފުނިން ވަނީ ވަގުތީ ގޮތުން ހުއްޓާލާފައެވެ. އެ ކުންފުނިން ސީ ޕްލޭންގެ ޙިދުމަތް ދޭން ފަށާފައިވާ 2019 ވަނަ އަހަރުގެ ނޮވެމްބަރ މަހުގެ 17 ވަނަ ދުވަހުއެވެ.