ސައުދީ އަރަބިއްޔާގެ ރަސްގެފާނު ސަލްމާން ބިން އަބްދުލް އަޒީޒު ނެރުއްވި "ކުއްލި ޝާހީ އަމުރަކުން" އެޤައުމުގެ ކެބިނެޓާއި ސަރުކާރަށް ބޮޑެތި ބަދަލުތަކެއް ގެންނަވއިފިއެވެ.
ހޮނިހިރު ދުވަހުގެ ރޭ ކުއްލި ގޮތަކަށް ސަލްމާން ރަސްގެފާނު ނެރުއްވި ޝާހީ އަމުރުގައި އެންމެ ފާހަގަކޮށްލެވޭ ބަދަލަކަށް ހިމެނިފައިވަނީ އެމެރިކާ ސަފީރުގެ މަގާމަށް ރަސްގެފާނުގެ ދަރިކަލުން ޕްރިންސް ޚާލިދު ބިން ސަލްމާން ހަމަޖެއްސުމެވެ.
މީގެ އިތުރުން ސައުދީގެ ސިވިލް ސާވިސް މިނިސްޓަރުގެ މަގާމުގައި ހުރި ޚާލިދު އަލް އަރާޖް މަޤާމުން ވަކިކޮށް، ތުހުމަތު ކުރެވޭ ކޮރަޕްޝަނުގެ މައްސަލައެއް ބެލުމަށް ވަޒީރުންގެ ފެންވަރުގެ ކޮމިޓީއެއް އެކުލަވާލާފައިވެއެވެ.
ސަލްމާން ރަސްގެފާނުގެ ޝާހީ އަމުރުގައި ދެން ފަހަގަކުރެވޭ އަނެއްކަމަކީ ދާޚިލީ ވުޒާރާއާ އެއްވަރުގެ ބާރުތައް ލިބޭ އިދާރާއެއްގެ ގޮތުގައި ނެޝަނަލް ސެކިއުރިޓީ ކައުންސިލެއް އުފެއްދެވުމެވެ.
އިދާރާގެ ވެރިއަކަށް ހަމަޖެއްސެވީ މުހައްމަދު ބިން ސާލިޙް އަލްޣުފައިލީއެވެ. އޭނާއަކީ ގައުމީ ސަލާމަތާބެހޭ ކަންކަމުގައި ރަސްގެފާނަށް ލަފާދޭ މުސްތަޝާރު މުހައްމަދު ބިން ނާޔިފް އާ ޚިޔާލު ތަފާތު ބޭފުޅެކެވެ.
ރަސްގެފާނުގެ މި ނިންމެވުމުގެ ފަހަތުގައި އެހެން ކަމެއްވެސް އޮތް ކަމަށް ދިރާސާކުރާ ފަރާތްތަކުން ދެކެއެވެ. އެގޮތުން ރަސްގެފާނުގެ އެ ނިންމެވުމަކީ ދަރިކަލުން މުހައްމަދު ބިން ސަލްމާނަށް ރަސްކަން ލިބިވަޑައިގަންނަވާގޮތަށް ކަންކަން ކުރެއްވުން ކަމަށް މުރާސިލުން ދެކެއެވެ.
ސައުދީގެ ރަސްކަމުގެ އުސޫލުތައް އޮންނަ ގޮތުން ސަލްމާން ރަސްގެފާނަށްފަހު، އެގައުމުގެ ރަސްކަން ވާރުތަވާ ފަރާތަކީ ރަސްގެފާނަށް ބޮޑުބޭބެ ވިދާޅުވާ މުހައްމަދު ބިން ނާޔިފްއަށެވެ.
މުހައްމަދު ބިން ނާޔިފް އަކީ މިހާރު ސައުދީ އަރަބިއްޔާގެ ވަލީއުލްއަހްދުގެ މަގާމުގައި ހުންނެވި ބޭފުޅާވެސް މެއެވެ. ރަސްގެފާނުގެ އަމުރާއިއެކު މުހައްމަދު ބިން ނާޔިފްވަނީ ބާރުތަކުން ވަރަށް ބޮޑަށް އެކަހެރި ކުރެވިފައެވެ.
ސައުދީ ސަރުކާރަށް ކުއްލިއަކަށް ގެނެވުނު އެހެން ބަދަލުތަކުގެ ތެރޭގައި ސަފީރުންނާއި އަމީރުންގެ މަގާމުތަކަށް ބަދަލު ގެނެސްފައިވެއެވެ.
ކެބިނެޓަށް ގެނައި އެހެނިހެން ބަދަލުތަކުގެ ތެރޭގައި ރަސްގެފާނުގެ ދަރިކަލުން އަބްދުލް އަޒީޒް ބިން ސަލްމާން މިނިސްޓަ އޮފް ސްޓޭޓް ފޯ އެނާޖީ އެފެއާޒްގެ މަގާމަށް ހަމަޖެއްސުމާއި، ކަލްޗާ އެންޑް އިންފޮމޭޝަން މިނިސްޓަރުގެ މަގާމަށް އަވާދު އަލް އަވާދު ހަމަޖެއްސުން ހިމެނެއެވެ.
މީގެ އިތުރުން ކޮމިއުނިކޭޝަން މިނިސްޓަރުގެ މަގާމަށް މުހައްމަދު އަލް ސަވާހާ ހަމަޖައްސަވާ، ސިވިލް ސާވިސް މިނިސްޓަރުގެ މަގާމުގައި އީސާމް ބިން ސައީދު ހަމަޖެއްސެވުން ހިމެނެއެވެ.
