ބޮއިކޮޓް ކުރަން ގޮވާލުމަކީ ހަމައެކަނި ހައްލެއް ނޫން: އިލްޔާސް

ކީރިތި ރަސޫލާގެ ކާޓޫން ކުރެހި މައްސަލާގައި ފްރާންސްއާ ދެކޮޅަށް މަގުމަށްޗަށް ނިކުމެ އަޑު އުފުލައި އެ ގައުމުގެ އުފެއްދުންތައް ބޮއިކޮޓް ކުރަން ގޮވާލުމަކީ އެއީ އެންމެ ރަނގަޅު ގޮތެއް ނޫން ކަމަށް ރާއްޖޭގެ މަޝްހޫރު ދީނީ އިލްމުވެރިޔާ ޝޭއިހް އިލްޔާސް ހުސައިން ވިދާޅުވެއްޖެއެވެ.

ކާޓޫނުގެ މައްސަލައިގައި ފްރާންސްއާ މުސްލިމް ގައުމުތަކާއި އޮންނަ ގުޅުން ވަނީ ވަރަށް ބޮޑަށް ނުތަނަވަސްވެފައެވެ. އަދި ކާޓުން ކުރާހާ މީހުންނަށް ހިތްވަރުދީ އެ މީހުން ދިފާއު ކުރުމުން ފްރާންސުގެ ރައީސް އެމަނުއަލް މެކްރޯން ހޫނުފެނަށް ވެއްޓި، އެ މަނިކުފާނަށް އިންތިހާއަށް ފާޑުކިޔުންތައް ދަނީ އަމާޒުވަމުުންނެވެ.

ރާއްޖެޓީވީއާއި އަދާލަތު ޕާޓީއާއި ގުޅިގެން ގެނެސްދިން ''އެންމެ ވަރުގަދަ ޝަހްސިއްޔަތު'' ޕެނަލް ޑިސްކަޝަންގައި، އެ މައްސަލައަށް އިޝާރާތް ކުރައްވާ އިލްޔާސް ވިދާޅުވީ، ފްރާންސްގެ ރައީސް އެހެން ވިދާޅުވި ނަމަވެސް އޭގެ ބަދަލުގައި ރާއްޖެއަށް އަންނަ ފްރާންސް މީހުން މަރަން ޖެހޭ ކަމަށް ބުނެ ފަތުވާ ނެރުމަކީ އެއީ އިސްލާމް ދީނުގެ ދިފާއުގައި ނުކުތުން ކަމަށް ބަލައިނުގަނެވޭނެ ކަމަށެވެ.

''ކުށެއް ކުރި މީހެއްގެ ސަޒާ އެހެން މީހަކަށް ނުލިބޭނެ'' ދީނީ އިލްމުވެރިޔާ އިލްޔާސް ވިދާޅުވިއެވެ.

އިލްޔާސް ވިދާޅުވީ، ކާޓުން ކުރެހި މީހުން ނުވަތަ އިސްލާމް ދީނާ ދެކޮޅަށް މަސައްކަތްކުރާ މީހުންނާ ދެކޮޅަށް މުޒާހަރާ ކުރުމުގެ ބަދަލުގައި އެ މީހުންނަށް ދައްކަންވީ އިސްލާމް ދީނުގެ ރީތި ނަމޫނާ ކަމަށެވެ.

އިލްޔާސް ސިފަކުރާ ގޮތުގައި ދީނަށް ނަސްރު ދެވޭނީ މަގުމައްޗަށް ނިކުމެ މުޒާހަރާކޮށް ކަމަށް ގަބޫލުކުރާ ގަބޫލުކުރުމަކީ ''އޮޅުވާލުމެއް'' އެވެ.

ޢައިރު މުސްލިމުންނަކީ ރަސޫލާގެ ޝަހްސިއްޔަތު ކަތިލުމަށް އަބަދު ވެސް މަސައްކަތްކުރާ ބަޔަކަށްވާއިރު، އެ ކަލޭގެފާނުގެ ރިސާލަތުގައި ހިފައިގެން މުސްލިމުން ކުރިޔަށްދާން ފެށުމުން އެކަމަށް ހަސަދަވެރިވެ އެކަމުން ދުރުކުރުމަށް އެ މީހުން އަބަދު ވެސް މަސައްކަތްކުރާނެކަން އިލްޔާސް ފާހަގަކުރެއްވިއެވެ. ހަމައެކަނި ސޯޝަލް މީޑިއާގައި އައިލަވްް ޕްރޮފެޓް ޖެހުމަކުން ނުފުދޭނެ ކަމަށާއި، އޭގެ ބަދަލުގައި ރަސޫލާ ދެކެ ލޯބިވާ މިންވަރު އެ މީހާގެ އަމަލުން ވެސް ދައްކަން ޖެހޭ ކަމަށް އޭނާ ވިދާޅުވިއެވެ.