މުޅި ދުނިޔެއިން ކޮވިޑް-19 ޖެހުނު 72 އިންސައްތަ މީހުން ބަލިން ރަނގަޅުވެއްޖެ

މުޅި ދުނިޔެއިން ކޮވިޑް-19 ޖެހުނު މީހުންގެ ތެރެއިން 72 އިންސައްތަ މީހުން ބަލިން ރަނގަޅުވެފައިވާ ކަމަސް ތަފާސްހިސާބުތަކުން ދައްކައިފިއެވެ.

ވޯލްޑްމީޓާސް އިން އާންމުކޮށްފައިވާ އެންމެ ފަހުގެ ތަފާސްހިސާބުތައް ދައްކާގޮތުން މުޅި ދުނިޔެއިން ކޮވިޑް-19 އަށް ޕޮޒިޓިވްވެފައިވާ 47.8 މިލިއަން މީހުންގެ ތެރެއިން 34.3 މީހުން ވަނީ މިހާރު ބަލިން ރަނގަޅުވެފައެވެ.

ބަލި ޖެހިގެން މިހާތަނަށް ރިކޯޑް ކުރެވުނު ކޭސްތަކުގެ ތެރެއިން 35.5 މިލިއަން ކޭސް މިހާރު ކްލޯސް ކޮށްފައިވާ އިރު، ކްލޯސް ކުރެވުނު ކޭސްތަކުގެ ތެރެއިން 97 އިންސައްތަ ކޭސްތަކަކީ ބަލިން ރަނގަޅު ވުމުން ކްލޯސް ކުރެވުނު ކޭސްތަކެވެ. އަދި އަނެއް ތިން އިންސައްތަ ކޭސް އަކީ ބަލިޖެހުމަށްފަހި ބަލީގައި މަރުވި މީހުންނެވެ. އެއީ 1.2 މިލިއަން މީހުންނެވެ.

މީގެ އިތުރުން މިވަގުތު އެކްޓިވް ކޭސްގެ ގޮތުގައި 12.3 މިލިއަން މީހުން ތިބި އިރު، މީގެ ތެރެއިން 99 އިންސައްތަ މީހުންގެ ހާލު އަންނަނީ ރަނގަޅުވަމުންނެވެ. އެހެންނަމަވެސް ބައްޔަށް ފަރުވާ ހޯދަމުންދާ މީހުންގެ އެއް އިންސައްތަ މީހުންނަކީ ކްރިޓިކަލް ކޮންޑިޝަންގައި ތިބި މީހުންނެވެ. އެގޮތުން 12.2 މިލިއަން މީހުގެ ހާލު ރަނގަޅު އިރު، ކްރިޓިކަލް ކޮންޑިޝަންގައި ފަރުވާ ހޯދަމުން ދަނީ 87,965 މީހުންނެވެ.

މިހާތަނަށް އައި އިރު އެންމެ ގިނަ އަދަދެއްގެ ބަޔަކު ބައްޔަށް ޕޮޒިޓިވްވެފައި ވަނީ އެމެރިކާ އިންނެވެ. އެއީ 9.7 މިލިއަން މީހުންނެވެ. ދެވަނަ އަށް އެންމެ ގިނަ މީހުން ޕޮޒިޓިވްވެފައިވާ އިންޑިއާ އިން މިހާތަނަށް އައި އިރު 8.3 މިލިއަން މީހުން ވަނީ ކޮވިޑް-19 އަށް ޕޮޒިޓިވްވެފައެވެ. އަދި ބަލި އެންމެ ފުރަތަމަ ފެނުނު ޗައިނާ އިން މިހާތަނަށް އައި އިރު ޕޮޒިޓިވްވެފައި ވަނީ 86,070 މީހުންނެވެ.