އައްޑޫ އިކުއިޓޯރިއަލް ހޮސްޕިޓަލުގެ ސީއީއޯ އަކަށް ޑރ. ސޯލިހު
15 އަހަރުވަންދެން ސިއްހީ ދާއިރާގެ ހިންގުމުގެ މަތީ ފަންތީގައި މަސައްކަތްކުރައްވާފައިވާ ބޭފުޅެއް
އައްޑޫ އިކުއިޓޯރިއަލް ހޮސްޕިޓަލުގެ ސީއީއޯ އަކަށް އައްޔަން ކުރެއްވި ޑރ. މުހައްމަދު ސޯލިހު
ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު، އައްޑޫ އިކުއިޓޯރިއަލް ހޮސްޕިޓަލުގެ ޗީފް އެގްޒެކެޓިވް އޮފިސަރުގެ މަގާމަށް ބޭފުޅަކު ސ. ހުޅުދޫ، ކުއްޅަވައްގެ، ޑރ. މުހައްމަދު ސޯލިހު އައްޔަންކުރައްވައިފިއެވެ.
ރައީސް އޮފީހުން މައުލޫމާތު ދީފައިވާ ގޮތުގައި ޑރ. ސޯލިހު އެ މަގާމަށް އައްޔަންކުރައްވާފައި ވަނީ މިނިސްޓަރުންގެ ނައިބުންނާއި އެއް ފެންވަރުގައެވެ. އައްޑޫ އިކުއިޓޯރިއަލް ހޮސްޕިޓަލަށް ސީއީއޯއެއް އައްޔަންކޮށްފައި މި ވަނީ، އެ ހޮސްޕިޓަލް ޓާޝަރީ ހޮސްޕިޓަލަކަށް ބަދަލުކުރުމާއި ގުޅިގެންނެވެ.
ސޯލިހަކީ 15 އަހަރު ވަންދެން ސިއްހީ ދާއިރާގެ ހިންގުމުގެ މަތީ ފަންތީގައި މަސައްކަތް ކުރައްވާފައިވާ ބޭފުޅުކެވެ. އަދި އޭނާ ވަނީ 26 އަހަރު ދުވަހު ކްލިނިކަލް ކެއާގެ ދާއިރާއިން ވެސް ތަޖުރިބާ ހޯއްދަވާފައެވެ.
ނޭޕާލުގެ ތްރިބުވަން ޔުނިވަސިޓީ ޓީޗިން ހޮސްޕިޓަލުން މާސްޓާ އޮފް ސަރޖަރީ ހާސިލު ކުރައްވާފައިވާ ސޯލިހު ވަނީ އިނގިރޭސިވިލާތުގެ ނޮޓިންގްހަމް ޔުނިވާސިޓީން މާސްޓާ އިން ބިޒްނަސް އެޑްމިނިސްޓްރޭޝަން ވެސް ހާސިލު ކުރައްވާފައެވެ.
އިކުއިޓޯރިއަލް ހޮސްޕިޓަލުގެ ސީއީއޯއަށް އައްޔަންކުރެއްވުމުގެ ކުރިން ސޯލިހު ވަނީ މެޑިކާ ހޮސްޕިޓަލުގެ ޗީފް ސަރޖަންއެއްގެ މަގާމާއި، މެނޭޖިންގ ޑިރެކްޓާ އަދި ޗީފް އެގްޒެކެޓިވް އޮފިސަރުގެ މަގާމު ވެސް އަދާކުރައްވާފައެވެ. އޭގެ އިތުރުން، އައިޖީއެމް ހޮސްޕިޓަލުގެ އިތުރު އެހެން ސިއްހީ ހިދުމަތްދޭ އިދާރާތަކުގެ އިސް މަގާމުތައް ވެސް އޭނާ ވަނީ ފުރުއްވާފައެވެ.
ޑރ ސޯލިހަކީ މޯލްޑިވްސް އެންޓި ޑޯޕިން އެސޯސިއޭޝަންގެ ރައީސްއެވެ. އަދި އެ މަނިކުފާނަކީ މޯލްޑިވްސް މެޑިކަލް އެސޯސިއޭޝަން އާއި، މޯލްޑިވްސް އޯތޯޕީޑިކް އެސޯސިއޭޝަން އަދި މޯލްޑިވިއަން މެޑިކަލް ސްޓޫޑެންޓްސް އެސޯސިއޭޝަންގެ އެއް ބާނީއެވެ.
