ސިދުރަތުﷲ ގެ ހަށިގަނޑުގެ ޕޯސްޓް މޯޓަމް ހަދަން އިންޑިއާއަށް ފޮނުވައިފި

ހުސްވި އޮކްޓޫބަރު މަހުގެ 23 ވަނަ ދުވަހު، އައިޖީއެމް ހޮސްޕިޓަލާ ދިމާލު މޫދުގައި މަރުވެފައި އޮއްވައި، ފެނުނު ގދ. ވާދޫ، ރިމެމްބަރކަދާވަޑު، އުމުރުން 31 އަހަރުގެ މުހައްމަދު ސިދުރަތުﷲ އަހްމަދުގެ ހަށިގަނޑު ޕޯސްޓް މޯޓަމް ހަދަން އިންޑިއާއަށް ފުރުވާލައިފިއެވެ.

މީޑިއާތަކަށް ފޮނުވި މެސެޖެއްގައި ފުލުހުން ބުނީ، އޭނާގެ ހަށިގަނޑުގެ ޕޯސްޓް މޯޓަމް ހަދަން ހަމަޖެހިފައިވަނީ ތްރިވަނަންތަޕޫރަމްގައި ހުންނަ މެޑިކަލް ހޮސްޕިޓަލުގައި ކަމަށެވެ. ސިދުރަތުﷲ ގެ ހަށިގަނޑު ބާއްވައިފައި އޮތީ، ގަލޮޅު ސަހަރާގެ މޯޗަރީގައެވެ.

ސިދުތަރުﷲ ގެ މަރާ ގުޅިގެން އޭނާގެ ހަށިގަނޑު ޕޯސްޓްމޯޓަމް ހަދަން ފުލުހުން ނިންމީ އެއީ ގުދުރަތީ މަރެއްކަން ކަށަވަރު ނުކުރެވޭތީއެވެ. މަރުވެފައި އޮއްވައި ފެނުނު ސިދުރަތުﷲ ގެ ހަށިގަނޑުގައި ޒަހަމްތަކެއް ހުރިކަމަށް އާއިލާއިންވެސް ފާހަގަކޮށްފައިވާއިރު އާއިލާއިންވެސް ތުހުމަތު ކުރަނީ، ސިދުރަތުﷲ މަރާލާފައިވާ ކަމަށެވެ.

ފުލުހުންގެ އިދާރާއިން ވަނީ، މި މަހުގެ 22 ވަނަ ދުވަހުގެ ހެނދުނު، 9:00 އާއި 10:00 އާއި ދެމެދު ސިދުރަތުﷲ ރަސްފަންނާއި ދިމާއަށް މޫދަށް އެރެން ދާ މަންޒަރު ފެންނަ ސީސީޓީވީ ފުޓޭޖުވެސް އާއްމުކޮށްފައެވެ.