10،000 މެމްބަރުން ހަމަނުވާ ޕާޓީތަކަށް ދައުލަތުން ފައިސާ ލިބޭ އިސްލާހެއް ހުށައަޅައިފި
1 ނޮވެމްބަރު 2020 | އާދީއްތަ 17:51ފައިސާ ލިބެނީ އެންމެ ތިން ޕާޓީއަށް
އީސީގެ މެމްބަރު ފުއާދު ތައުފީގް
10,000 މެމްބަރުން ހަމަނުވާ ޕާޓީތަކަށް ވެސް ދައުލަތުން ފައިސާ ލިބޭ ގޮތަށް އިސްލާހު ހުށައަޅާފައިވާނެ ކަމަށް އިލެކްޝަން ކޮމިޝަން (އީސީ) އިން ބުނެފިއެވެ.
ރާއްޖެޓީވީގެ 'ފަލަސުރުހީ' ޕްރޮގްރާމްގައި ވާހަކަދައްކަވަމުން އީސީގެ މެމްބަރު ފުއާދު ތައުފީގް ވިދާޅުވީ ސިޔާސީ ޕާޓީތަކަށް ދިމާވެފައިވާ އެންމެ ބޮޑު ގޮންޖެހުމަކީ މާލީ ދަތިކަން ކަމަށެވެ. އަދި މިހާރު ގާނޫނުގައިވާ ގޮތުން، ދައުލަތުގެ ބަޖެޓުން ޕާޓީތަކަށް ދޭ ފައިސާ ލިބެނީ ހަމައެކަނި 10،000 މެމްބަރުން ތިބޭ ޕާޓީތަކަށް އެކަނި ކަމަށެވެ.
އެހެންކަމުން ކުދި ޕާޓީތަކަށް އެއްވެސް ފައިސާއެއް ނުލިބި މާލީ ގޮތުން ދަތިވާކަމަށް ފުއާދު ފާހަގަކުރެއްވިއެވެ. މިހާރު ދައުލަތުން ފައިސާ ލިބެނީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)، ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އަދި ޖުމްހޫރީ ޕާޓީ (ޖޭޕީ) އަށެވެ.
މިހާރު ދައުލަތުގެ ފައިސާ ލިބެނީ މި ތިން ޕާޓީއަށްކަން ފާހަގަކުރައްވާ ފުއާދު ވިދާޅުވީ ގިނަ ޕާޓީތަކަށް ދައުލަތުގެ ފައިސާ ލިބޭ ގޮތަށް ގާނޫނަށް އިސްލާހު ގެނައުމަކީ ދައުލަތަށް ބުރަ ބޮޑު ވާނެ ކަމެއް ނޫން ކަމަށެވެ. ރެޖިސްޓަރ ކޮށްގެން 10 ޕާޓީ ހިންގަމުން އަންނައިރު، ޕާޓިތަކުގެ ހިންގުން ކުރިއެރުވުމަށް އެ ހުރިހާ ޕާޓީތަކަށް ފައިސާ ބެހުމުގެ ވިސްނުން ގެންގުޅުއްވާކަމަށް އޭނާ ވިދާޅުވިއެވެ.
ސިޔާސީ ޕާޓީތަކުގެ ޤާނޫނަށް އިލެކްޝަންސް ކޮމިޝަނުން ވަނީ 54 އިސްލާހެއް ހުށަހަޅާފައެވެ. އިލެކްޝަންސް ކޮމިޝަނުން ސިޔާސީ ޕާޓީތަކުގެ ޤާނޫނަށް ގެނައުމަށް ހުށަހަޅާ މައިގަނޑު އިސްލާހުތަކުގެ ތެރޭގައި ސިޔާސީ ޕާޓީތައް ސަސްޕެންޑް ކުރުމުގެ ބާރާއި، ސިޔާސީ ޕާޓީތަކުގެ މައި ދަފްތަރަކީ އީސީއިން ބަލަހައްޓާ ދަފްތަރަކަށް ހެދުން ހިމެނެއެވެ. އަދި ސިޔާސީ ޕާޓީތަކުގެ ލީޑަރޝިޕް 33 ޕަސެންޓް އަންހެނުންނަށް ހާއްސަ ކުުރުންވެސް ހިމެނެއެވެ.
