ގެސްޓްހައުސްތައް ހުޅުވާލި ފަހުން ރަސްދޫއަށް އައި ފުރަތަމަ ފަތުރުވެރިންނަށް ހޫނު މަރުހަބާއެއް
އާދިއްތަ ދުވަހު ރަސްދޫއަށް 6 ފަތުރުވެރިން ވަނީ އައިސްފަ
އާދިއްތަ ދުވަހު އއ. ރަސްދޫއަށް އައިސްފައިވާ ފަތުރުވެރިން، އެރަށު ބަނދަރު ސަރަހައްދުގައި
ކޮވިޑް-19 ގެ ބަލިމަޑުކަމާ ގުޅިގެން ގެސްޓްހައުސްތަކަށް ފަތުރުވެރިން ގެނައުން ހުއްޓާލާފައި އޮތުމަށްފަހު، އަލުން އެ ހިދުމަތް ދިނުމަށް ޓޫރިޒަމް މިނިސްޓްރީން ހުއްދަ ދިނުމާއެކު އއ. ރަސްދޫއަށް ފަތުރުވެރިން އަންނަން ފަށައިފިއެވެ.
ރަސްދޫ ކައުންސިލް މެންބަރު އަބްދުﷲ އަނީލް "ރާއްޖެއެމްވީ" އަށް މައުލޫމާތު ދެއްވަމުން ވިދާޅުވީ، ޓޫރިޒަމް މިނިސްޓްރީން ލޯކަލް ޓޫރިޒަމްގެ ވިޔަފާރި ކުރަމުންދާ ރަށްތަކަށް ފަތުރުވެެރިން އައުމަށް ހުޅުވާލި ފުރުސަތުގައި އާދިއްތަ ދުވަހު އެރަށަށް 6 ފަތުރުވެރިން އައިސްފައިވާ ކަމަށެވެ. އޭގެ އިތުރުން މި ހަފްތާގައި ދެ ގެސްޓް ހައުސްއަކަށް އިތުރު ފަތުރުވެރިން އައުމަށް ހަމަޖެހިފައިވާ ކަމަށް ވިދާޅުވިއެވެ.
ރަސްދޫއަށް ފަތުރުވެރިން އައުމުން އެރަށު ކައުންސިލާއި އާންމު ރައްޔިތުން ވަނީ އެ ފަތުރުވެރިންނަށް ރަށު ފެންވަރުގައި ހޫނު މަރުހަބާއެއް ކިޔާފައެވެ. އެގޮތުން ރަސްދޫ ބަނދަރު ސަރަހައްދުގައި ވަނީ ފަތުރުވެރިންނަށް މަރުހަބާ ކިއުމަށް ހާއްސަ ހަރަކާތެއްވެސް ކުރިއަށް ގެންގޮސްފައެވެ.
ރަސްދޫއަކީ ލޯކަލް ޓޫރިޒަމަށް ފައްކާވެފައިވާ ރަށަކަށްވާއިރު، ކޮވިޑް-19 އާއި ގުޅިގެން މި ފާއިތުވި ދުވަސްތަކުގައި ފަތުރުވެރިކަމުން މަންފާ ހޯދަމުން އައި ފަރާތްތަކަށް އެކަމުގެ ގެއްލުން ވަރަށް ބޮޑަށް ކޮށްފައިވާ ކަމަށް އަނީލް ވިދާޅުވިއެވެ. ނަމަވެސް އަލުން ފަތުރުވެރިން އަންނަން ފެށުމުން ރަށުގެ އާންމު ހާލަތު ކުރިއަށްވުރެ ރަނގަޅު ވެގެންދާނެ ކަމަށް އުންމީދުކުރާ ކަމަށްވެސް އޭނާ ވިދާޅުވިއެވެ.
ލޯކަލް ޓޫރިޒަމަށް ހުއްދަ ދޭ ރަށްރަށުގައި ކޮވިޑަށް ޓެސްޓްކުރެވޭނެ ވަސީލަތްތައް ގާއިމުކޮށްފައި ހުންނަންޖެހޭއިރު، އެކަމުގެ ހުރިހާ ތައްޔާރީތަކެއް ރަސްދޫގައި ހަމަޖެހިފައިވާ ކަމަށް އަނީލް ވިދާޅުވިއެވެ. އަދި އާންމުކޮށް މީހުން ގޮސް އުޅޭ ކެފޭ ރެސްޓޯރަންޓްތަކާއި އެހެނިހެން ތަންތަންވެސް އެޗްޕީއޭގެ ގައިޑްލައިނާ އެއްގޮތަށް ހުރިތޯ ބަލާފައިވާނެ ކަމަށް އަނީލް ވިދާޅުވިއެވެ.
ކޮވިޑް-19 އާ ގުޅިގެން ގެސްޓްހައުސްތައް ބަންދު ކުރުމަށް ފަހު އަލުން މި ވިޔަފާރި ފެށުމަށް ސަރުކާރުން ހުއްދަ ދީފައިވަނީ އޮކްޓޫބަރު މަހުގެ 15 ވަނަ ދުވަހުއެވެ.
ގެސްޓްހައުސްތައް އަލުން ހުޅުވާލުމުގެ ހުއްދަދެނީ، އެޗްޕީއޭއިން މިކަމާއި ގުޅިގެން އެކުލަވާލާފައިވާ ގައިޑްލައިނަށް ފެތޭތޯ ބެލުމަށްފަހުއެވެ. އަދި ގެސްޓްހައުސް އޮޕަރޭޓް ކުރާ ރަށަކުން ގެސްޓްހައުސް އޮޕަރޭޓް ނުކުރާ ރަށަކަށް އާންމު އުސޫލުން ދަތުރު ކުރާނަމަ 14 ދުވަހުގެ ކަރަންޓީން މުއްދަތު ފުރިހަމަ ކުރަންޖެހެއެވެ.
