މެންބަރު ސައުދު ރައީސް ނަޝީދާ ބައްދަލުކުރައްވައިފި
ބައްދަލުކުރެއްވީ އަވައްޓެރި ލަންކާގައި
މެންބަރު ސައުދާއި ރައީސް ނަޝީދު ބައްދަލުކުރެއްވުން
ވިލިނގިލީ ދާއިރާގެ މެމްބަރު ސައުދު ހުސައިން، ރައީސް މުހައްމަދު ނަޝީދާ ހޮނިހިރު ދުވަހުގެ ރޭ ބައްދަލު ކުރައްވައިފިއެވެ.
އެ ދެ ބޭފުޅުން ބައްދަލުކުރެއްވީ ސްރީ ލަންކާގެ ކޮލަމްބޯގައެވެ. މިއީ ސައުދު ރައީސް ނަޝީދާ ބައްދަލުކުރެއްވި ފުރަތަމަ ފަހަރެވެ.
ކުރީގެ ރައީސް މައުމޫން އަބްދުލް ގައްޔޫމުގެ ފެކްޝަނާ ގުޅިވަޑައިގެންފައިވާ ސައުދު ކުރެއްވި ޓްވީޓެއްގައި ވިދާޅުވީ، މި ބައްދަލުވުމުގައި ރައީސް ނަޝީދާއެކު ރާއްޖޭގެ ސިޔާސީ މަޝްރަހާއި، ގައުމީ މައްސަލަތަކާ ބެހޭ ގޮތުން މަޝްވަރާކުރެއްވި ކަމަށެވެ.
ރައީސް މައުމޫން ފެކްޝަނާއި ގުޅިވަޑައިގަތުމާއިއެކު، ޕީޕީއެމްގެ މުސްތަޝާރު ފެކްޝަނުގެ ސުލޫކީ ކޮމިޓީއިން ވަނީ ސައުދު އެ ޕާޓީން ވަކިކޮށްފައެވެ. ރައީސް މައުމޫން ފެކްޝަންގެ ކައުންސިލުން މުއްދަތެއްނެތް ގޮތަށް ސަސްޕެންޑްކޮށްފައިވާ މި ސުލޫކީ ކޮމިޓީއިން ސައުދު ޕާޓީން ވަކިކުރަން ނިންމި ނަމަވެސް، ސައުދުވެސް އަދި ޕީޕީއެމްގެ އިންތިޚާބީ ރައީސް، އަލްއުސްތާޛް މައުމޫން ޢަބްދުލްޤައްޔޫމްވެސް ވަނީ އެއީ ބާތިލް ނިންމުމެއް ކަމަށާ، އެ ނިންމުން ބަލައި ނުގަންނާނެކަން ހާމަކުރައްވާފައެވެ.
ސައުދު ޕާޓީން ވަކި ކުރުމާއެކު، ސަރުކާރުން ވަނީ، ސަރުކާރުގެ އެކި މަޤާމުތަކުގައި ތިބި ސައުދާ ގާތް ފަރާތްތައް ވަޒީފާއިންވެސް ވަކިކޮށްފައެވެ.
ސަރުކާރުގެ މި އަމަލުތަކާއި އެކު، ކުރިން ސަރުކާރަށް ބޮޑު ތާޢީދެއް އޮތް، ސައުދު ތަމްޞީލު ކުރައްވާ ގއ. ވިލިނގިލި ދާއިރާގެ ތާޢީދު މިހާރު ވަނީ ސަރުކާރާއި ދެކޮޅަށް އެނބުރިފައެވެ.
