ދިވެހިން މިވަނީ ރަނގަޅު މިސްރާބަކަށް އަމާޒު ހިފާފައި: ޕޮމްޕެއޯ
30 އޮކްޓޯބަރު 2020 | ހުކުރު 10:09މި ސަރުކާރުން ރައްޔިތުން ބޭނުންވާ ގިނަ ކަންތައްތަކެއް ކުރަމުން އެބަ ގެންދޭ
އެމެރިކާގެ ސެކެޓްރީ އޮފް ސްޓޭޓް މައިކް ޕޮމްޕެއޯ
ދިވެހި ރައްޔިތުން މިވަނީ ރަނގަޅު މިސްރާބަކަށް އަމާޒު ހިފާފައިކަމަށާއި މިކަމުގެ ސަބަބުން އެމެރިކާ އާއި ރާއްޖެ އާއި ދެމެދު އޮތް ގުޅުން އިތުރަށް ހަރުދަނާވެގެންދާނެ ކަމަށް އެމެރިކާގެ ސެކެޓްރީ އޮފް ސްޓޭޓް މައިކް ޕޮމްޕެއޯ ވިދާޅުވެއްޖެއެވެ.
ޕޮމްޕެއޯ މިހެން ވިދާޅުވެފައި ވަނީ ރާއްޖެޓީވީއަށް ދެއްވި ހާއްސަ އިންޓަވިއުއެއްގައިއެވެ.
މި އިންޓަވިއުގައި ޕޮމްޕެއޯ ވަނީ ރާއްޖެއަށް ރަނގަޅު ބޮޑެތި ބަދަލުތަކެއް އަންނަން ފަށާފައިވާ ކަމަށާއި އެމެރިކާއިން މިކަން ގަބޫލު ނުކުރާ ނަމަ މިއަދު ރާއްޖޭގައި އެމެރިކާގެ އެމްބަސީއެއް ގާއިމްކޮށް އެމްބެސެޑަރެއް ރާއްޖެއަށް ހާއްސަކުރުމުގެ މަޝްވަރާތައް ނުކުރާނެ ކަމަށް ވިދާޅުވެފައެވެ. މި ސަރުކާރުން ރައްޔިތުން ބޭނުންވާ ގިނަ ކަންތައްތަކެއް ކުރަމުން ގެންދާ ކަމަށާއި އިގްތިސާދީ ގޮތުން ވެސް އަދި ރައްޔިތުންގެ ދިރިއުޅުމުގެ ހާލަތަށް ބަލާލި ނަމަވެސް މި ބަދަލުތައް ފެންނަން ފަށާފައިވާ ކަމަށް ޕޮމްޕެއޯ ވަނީ ފާހަގަކުރައްވާފައެވެ.
މީގެ އިތުރުން އަންހެނުންގެ ހައްގުތައް ރައްކާތެރިކޮށް ކަށަވަރުކުރުމަށް މިހާރުގެ ސަރުކާރުން ކުރަމުން އަންނަ ކަންތައްތަވެސް ޕޮމްޕެއޯ ވަނީ ފާހަގަކުރައްވާފައެވެ.
ޕޮމްޕެއޯ ވަނީ ޑިމޮކްރެޓިކް ގައުމުތަކުން އެކުގައި މަސައްކަތް ކުރުމުގެ މުހިންމުކަން ފާހަގަކުރައްވާ އެމެރިކާ އާއި ރާއްޖެއިން މިއޮތް ގުޅުން ބަދަހިވެ އެކުގައި މަސައްކަތް ކުރުމުން އެމެރިކާގެ އިންވެސްޓަރުން ރާއްޖޭގައި އިންވެސްޓް ކުރުމާއި ދިވެހި ދަރިވަރުންނަށް އެމެރިކާއަށް ގޮސް ކިޔަވުމުގެ ފުރުސަތުފަދަ ފައިދާ ކުރަނިވި ފުރުސަތުތައް ހުޅުވިގެންދާނެ ކަމަށް ވިދާޅުވެފައެވެ. ހަމަ މިގޮތަށް ރާއްޖޭގެ ސިފައިންނަށް އެމެރިކާއަށް ގޮސް ފަރިތަކުރުން ތަކުގައި ބައިވެރިވުމުގެ ފުރުސަތު ލިބިގެންދާނެ ކަމަށް ޕޮމްޕެއޯ ފާހަގަކުރެއްވިއެވެ.
މިފަދަ ކަންކަމަކީ ދެ ގައުމަށް ވެސް ފައިދާކުރާނެ ކަންތައްތައް ކަމަށާއި މީގެ ސަބަބުން ދެ ގައުމު ވެސް ވަރުގަދަ ވެގެން ދާނެ ކަމަށްވެސް ޕޮމްޕެއޯ ވިދާޅުވިއެވެ.
ޕޮމްޕެއޯ ވަނީ މި ދަތުރަކީ ފާހަގަކޮށްލެވޭ ދަތުރެއް ކަމަށާއި މިއީ ރާއްޖެ އާއި އެމެރިކާ އާއި ދެމެދު ގުޅުން އިތުރަށް ބަދަހިކުރަން އެޅުނު މުހިންމު ފިޔަޅެއްކަން ފާހަގަކުރައްވާފައެވެ. މީގެ ސަބަބުން ދެގައުމުގެ ދެމެދުގައި އޮތް ޑިޕްލޮމެޓިކް ގުޅުމާއި، އިގްތިސާދީ ގުޅުން އިތުރަށް ވަރުގަދަވެ ގައުމުގެ ރައްޔިތުންނަށް ވެސް ގިނަ ފައިދާތަކެއް ކުރާނެ ކަމަށް ޕޮމްޕެއޯ ވިދާޅުވިއެވެ.
