މިދިޔަ އަހަރުގެ ތިންވަނަ ކުއާޓަރއަށް ވުރެ މިއަހަރު ތިންވަނަ ކުއާޓަރގައި އެސްޓީއޯގެ ފައިދާ އިތުރު!

ނިމިގެންދިޔަ 2019 ވަނަ އަހަރުގެ ތިން ވަނަ ކުއާޓަރަށްވުރެ މި އަހަރުގެ ތިންވަނަ ކުއާޓަރގައި އެސްޓީއޯއަށް ލިބުނު ފައިދާ އިތުރުވެއްޖެއެވެ.

ބުދަ ދުވަހު އާއްމުކުރި އެ ކުންފުނީގެ މާލީ ރިޕޯޓުން ދައްކާގޮތުން ނިމިގެންދިޔަ ކުއާޓަރގައި އެ ކުންފުޏަށް ފައިދާގެ ގޮތުގައި 100 މިލިއަން ރުފިޔާ ލިބިފައިވާއިރު މިދިޔަ އަހަރުގެ މި ކުއާޓަރގައި ލިބިފައިވަނީ 94 މިލިއަން ރުފިޔާއެވެ.

ކޮވިޑް-19 ގެ ސަބަބުން ބައެއް ދާއިރާ ތަކުން ވިޔަފާރި ދަށްވި ނަމަވެސް، އެސްޓީއޯއަށް ސާފު ފައިދާލިބުމުގައި ކުންފުނީގެ ހިންގުމުގެ ޚަރަދު ކުޑަކުރުން ހިމެނެއެވެ.

އެ ކުންފުންޏަށް މި ކުއާޓަރުގައި ޓެކުހަށް ކެނޑުމުގެ ކުރިން އާމްދަނީގެ ގޮތުގައި 119 މިލިއަން ރުފިޔާ ލިބިފައިވެއެވެ. މި ކުއާޓަރުގައި ވިޔަފާރި ފައިދާއިން ނަގާ ޓެކުހުގެ ގޮތުގައި އެސްޓީއޯއިން 19 މިލިއަން ރުފިޔާ ދައްކާފައިވެއެވެ.

އެސްޓީއޯއަށް އެންމެ ބޮޑު އާމްދަނީއެއް ލިބުނީ ތެލުންކަމަށްވާއިރު އެ ވިޔަފާރިން 818 މިލިއަން ރުފިޔާ ލިބިފައިވެއެވެ. އަދި އެ ނޫން ދާއިރާ ތަކުން އެ ކުންފުންޏަށް އާމްދަނީގެ ގޮތުގައި 727 މިލިއަން ރުފިޔާ ލިބިފައިވެއެވެ. އެ ކުންފުންޏަށް މި މުއްދަތުގައި ޖުމްލަ އާމްދަނީގެ ގޮތުގައި 1.5 މިލިއަން ރުފިޔާ ލިބިފައިވެ އެވެ.

އެސްޓީއޯގެ މާލީ ރިޕޯޓުގައިވާ ގޮތުން އެ ކުންފުނިން މި ކުއާޓަރުގައި 1.2 ބިލިއަން ރުފިޔާގެ ވިޔަފާރިކޮށްފައިވެއެވެ.