އައްޑޫ އަދި ފުވައްމުލަކު ބަޔޮސްފިޔަރ ރިޒާވްގެ ގޮތުގައި ކަނޑައަޅައިފި
28 އޮކްޓޯބަރު 2020 | ބުދަ 13:54ބަޔޮސްފިޔަރ ރިޒާވްގެ ގޮތުގައި ކަނޑައެޅީ ބުދަ ދުވަހު
ފުވައްމުލަކު ސިޓީ، ނޭޗަރ ޕާކު
އައްޑޫ ސިޓީއާއި ފުވައްމުލަކު ސިޓީ ބަޔޮސްފިޔަރ ރިޒާވްގެ ގޮތުގައި ކަނޑައަޅައިފިއެވެ.
މި ދެ ސިޓީ ނިސްބަތްވާ އަތޮޅުތައް ބަޔޮސްފިޔަރ ރިޒާވްގެ ގޮތުގައި ކަނޑައެޅިކަން ޔުނެސްކޯއިން އިއުލާން ކުރީ ބުދަ ދުވަހު ކުރިއަށް ގެންދިޔަ އިންޓަނޭޝަނަލް ކޯޑިނޭޓިން ކައުންސިލް އޮފް ދަ މޭން އެންޑް ދަ ބަޔޮސްފިއާ ޕްރޮގްރާމްގައެވެ.
މިކަމާ ގުޅިގެން އައްޑޫ އަދި ފުވައްމުލަކުގެ ރައްޔިތުންނަށް މަރުހަބާ ދަންނަވާ ރައީސް އިބްރާހިމް މުހައްމަދު ސޯލިހު ވިދާޅުވީ މި ނިންމުން ވެގެންދާނީ ރާއްޖޭގެ ގުދުރަތީ ވަސީލަތްތައް ހިމާޔަތް ކުރުމަށް އެޅިގެންދާ މުހިންމު ފިޔަވަޅަކަށެވެ.
އެންވަޔަރަންމެންޓް މިނިސްޓަރު ޑރ. ހުސައިން ރަޝީދު ވެސް ވަނީ ފުވައްމުލަކާއި އައްޑޫގެ ރައްޔިތުންނަށް މަރުހަބާ ދަންނަވާފައެވެ. އަދި ދެމެހެއްޓެނިވި ތަރައްގީގެ ތަސައްވުރުގެ ދަށުން، މެދުވެރިއެއްގެ ރޯލު އަދާކޮށްގެން މި މަސައްކަތް ކޮށްދެވުމަކީ ލިބިވަޑައިގެންނެވި ފަހުރެއް ކަމަށް ވިދާޅުވިއެވެ.
މިކަމާ ގުޅޭ ގޮތުން މީގެ ކުރިން ރައީސް އޮފީހުން ބުނެފައި ވަނީ މި ދެ އަތޮޅަކީ ބައިނަލްއަޤްވާމީ ގޮތުން ފާހަގަކުރެވޭ، ދެ އަތޮޅު ކަމަށެވެ. އަދި ބަޔޮސްފިއަރ ރިޒާވެއްގެ ގޮތުގައި ކަނޑައެޅުމަށް ޔުނެސްކޯއަށް ފޮނުވުމުގެ އެންމެބޮޑު ބޭނުމަކީ ދެމެހެއްޓެނިވި ގޮތުގައި ދިރޭތަކެތީގެ ބޭނުން ހިފުމުގައްޔާއި ދެމެހެއްޓެނިވި ތަރައްޤީ ގެނައުމުގައި ޔުނެސްކޯގެ ބަޔޮސްފިޔަރ ރިޒާވް މޮޑެލްއަކީ ތިމާވެށީގެ، އިޖްތިމާއީ އަދި އިޤްތިސާދީ ގިނަ ފައިދާތަކެއް އެކުލެވިގެންވާ މޮޑެލްއަކަށް ވާތީ ކަމަށެވެ.
އެގޮތުން މި ދެ އަތޮޅު ބަޔޮސްފިޔަރ ރިޒާވްގެ ގޮތުގައި ހަމަޖެހުމުން، މިދެ އަތޮޅުގައި މިހާރު ހިމާޔަތްކޮށްފައިވާ ސަރަހައްދުތަކުން ލިބޭ އިގްތިސާދީ ފައިދާ އިތުރުވުމުގެ ފުރުސަތު ހުޅުވިގެންދާނެ ކަމަށެވެ.
މި ދެ އަތޮޅު ބަޔޮސްފިޔަރ ރިޒާވްގެ ގޮތުގައި ކަނޑައެޅޭއިރު ބަޔޮސްފިޔަރ ރިޒާވެއްގައި ހިމެނޭ ސަރަހައްދުތައް ބެހިފައި ވަނީ މައިގަނޑު ތިން ބަޔަކަށެވެ. އެއީ ކޯ އޭރިޔާ، ބަފަރޒޯން އަދި ޓްރާންޒިޝަނަލް ނުވަތަ މަލްޓި ޔޫޒް އޭރިޔާއެވެ.
