މެދު ކެނޑުމަކަށްފަހު، ފްލައި ދުބާއީ އިން ރާއްޖެއަށް ދަތުރުތައް ފަށައިފި

ޔޫއޭއީގެ ފްލައި ދުބާއީ އިން ރާއްޖެއަށް ކުރަމުންދިޔަ ވައިގެ ދަތުރުތައް 2018 ވަނަ އަހަރުގެ ތެރޭގައި ހުއްޓާލުމަށްފަހު އަލުން އެ ދަތުރުތައް ފަށައިފިއެވެ.

ފްލައި ދުބާއީގެ ދަތުރުތައް ރާއްޖެއާއި ދެމެދު އަލުން ފަށާފައިވަނީ މި ހަފްތާގެ އަންގާރަ ދުވަހުއެވެ. މޯލްޑިވްސް އެއަރޕޯޓްސް ކޮމްޕެނީ ލޓޑ. (އެމްއޭސީއެލް) އިން ހާމަކޮށްފައިވާ ގޮތުގައި ފްލައި ދުބާއީ އިން ހަފްތާއަކު ހަތަރު ދަތުރު ރާއްޖެއަށް ކުރާނެއެވެ. އެގޮތުން، އެ އެއާރލައިނުން ރާއްޖެއަށް ދަތުރުތައް ކުރުމަށް ހަމަޖެހިފައިވަނީ އަންގާރަ، ބުރާސްފަތި، ހުކުރު އަދި ހޮނިހިރު ދުވަހު އެވެ.

ފްލައި ދުބާއީގެ އިތުރުން ޔޫއޭއީގެ އެމިރޭޓްސް އެއާރލައިނުން އަންނަނީ ރާއްޖެއާއި ދުބާއީ އާއި ދެމެދު ދަތުރު ކުރަމުންނެވެ.

ކޮވިޑް-19 އާއި ގުޅިގެން ރާއްޖޭގެ ބޯޑަރު މި އަހަރުގެ މާރޗު މަހުގެ 27 ވަނަ ދުވަހު ބަންދު ކޮށްފައި އޮތުމަށްފަހު ޖުލައި 15 ވަނަ ދުވަހު އަލުން ބޯޑަރު ހުޅުވާލި ފަހުން ގިނަ އެއާރ ލައިން ތަކުން އަންނަނީ ރާއްޖެއަށް ދަތުރު ފެށުމަށް ތައްޔާރުވަމުންނެވެ.

އަދި ބައެއް ގައުމުތަކުގެ އެއަރ ލައިންތަކުން މިހާރުވެސް އަންނަނީ ރާއްޖެއަށް ދަތުރު ކުރަމުންނެވެ. އެ އާއި ގުޅިގެން ރާއްޖެއަށް ފަތުރުވެރިން އަންނަ މިންވަރުވެސް ދަނީ އިތުރު ވަމުންނެވެ.

މި މަހުގެ 21 ވަނަ ދުވަހު އިމިގްރޭޝަނުން ހާމަކޮށްފައިވާ ތަފާސް ހިސާބުގައި ވާ ގޮތުން ޖުލައި މަހު ރާއްޖޭގެ ބޯޑަރު ހުޅުވާލި ފަހުން، ފަތުރުވެރިން އައި އަދަދު އުޅެނީ، 27،000 (ހަތާވީސް ހާސް) އިން މަތީގައެވެ. އެގޮތުން ޖުލައި މަހު، 1752 (އެއްހާސް، ހަތް ސަތޭކަ ފަންސާސް ދޭއް) ފަތުރުވެރިން ރާއްޖެ އައިސްފައިވާއިރު، ޖެހިގެން އައި އޮގަސްޓް މަހު، 7628 (ހަތްހާސް، ހަ ސަތޭކަ އަށާވީސް) ފަތުރުވެރިން އަދި ސެޕްޓެމްބަރު މަހު، 9538 (ނުވަހާސް، ފަސްސަތޭކަ ތިރީސް އަށެއް) ފަތުރުވެރިން ވަނީ ރާއްޖެ އައިސްފައެވެ.

އަދި މި މަހުގެ 15 ވަނަ ދުވަހާ ހަމައަށް 8350 (އަށްހާސް، ތިންސަތޭކަ ފަންސާސް) ފަތުރުވެރިން ވަނީ ރާއްޖެއަށް އައިސްފައެވެ.