އޮކްޓޯބަރު މަހު ރާއްޖެ އައި ޕްރައިވެޓް ޖެޓްގެ އަދަދު ބޮޑުތަނުން އިތުރުވެއްޖެ
އޮކްޓޯބަރ މަހު 126 ޖެޓް އައިސްފައިވޭ
އެއަރޕޯޓްގެ ދެ ދިމާލެއްގައި ހަދާފައިވާ ދެ އޭޕްރަންގައި ވެސް ގިނަ އަދަދެއްގެ ޕްރައިވެޓް ޖެޓްތައް ވަނީ ޕާކްކޮށްފައި
އޮކްޓޯބަރު މަހު ރާއްޖެ އައި ޕްރައިވެޓް ޖެޓްގެ އަދަދު ބޮޑުތަނުން އިތުރުވެއްޖެ ކަމަށް ވެލާނާ އިންޓަނޭޝަނަލް އެއާޕޯޓް (ވީއައިއޭ) އިން ބުނެފިއެވެ.
ވީއައިއޭގެ ޓްވިޓާރ އެކައުންޓުން އާންމުކޮށްފައިވާ ފޮޓޯތަކުން ފެންނަ ގޮތުގައި އެއާޕޯޓްގެ ދެ ދިމާލެއްގައި ހަދާފައިވާ ދެ އޭޕްރަންގައި ވެސް ގިނަ އަދަދެއްގެ ޕްރައިވެޓް ޖެޓްތައް ވަނީ ޕާކްކޮށް ފުރާލާފައެވެ.
މީގެ އިތުރުން ވީއައިއޭއިން ނެރެފައިވާ ޕްރައިވެޓްޖެޓް އެރައިވަލްގެ ސްޓެޓިސްޓިކްއިން ދައްކާ ގޮތުގައި، ޖުލައި 15 ވަނަ ދުވަހު ބޯޑަރު ހުޅުވާލި ފަހުން އެންމެ ގިނަ ޕްރައިވެޓް ޖެޓް އައިސްފައިވަނީ އޮކްޓޯބަރ މަހުއެވެ. އެގޮތުން އޮކްޓޯބަރ މަހު 126 ޖެޓް އައިސްފައިވާ ކަމަށް ދައްކައެވެ.
އޮކްޓޯބަރ މަހަށް ފަހު އެންމެ ގިނަ ޕްރައިވެޓް ޖެޓް އައިސްފައިވަނީ ސެޕްޓެމްބަރ މަހުއެވެ. އެއީ 60 ޕްރައިވެޓް ޖެޓެވެ. ސްޓެޓިސްޓިކްސް އިން ދައްކާ ގޮތުގައި ދެން އެންމެ ގިނަ ޕްރައިވެޓްޖެޓް އައިސްފައިވަނީ އޮގަސްޓް މަހުއެވެ. އެގޮތުން އެމަހު 59 ޖެޓް އައިސްފައިވާ ކަމަށް ދައްކައެވެ. މިއިން ކޮންމެ ބޯޓަކުން ވެސް ރާއްޖެއަށް ޒިޔާރަތް ކުރަނީ ރާއްޖެއަށް ޗުއްޓީ ހޭދަކުރަން އަންނަ މުއްސަނދިންނާއި އެ މީހުންގެ އާއިލާ ތަކުންނެވެ.
ޕްރައިވެޓް ޖެޓްގެ އިތުރުން ރާއްޖެއަށް އަންނަ އެއާލައިންތަކުގެ އަދަދު ވެސް އަންނަނީ މަޑުމަޑުން އިތުރުވަމުންނެވެ. އެހެންކަމުން ކުރިއަށް އޮތް ދެ މަހު ޓޫރިސްޓުންގެ އަދަދު ވެސް ނިސްބަތުން ރަނގަޅު މިންވަރަކަށް މައްޗަށް ހިނގައިދާނެ ކަމަށް ދާއިރާގެ ބައެއް ތަޖުރިބާކާރުން ލަފާކުރެ އެވެ.
ކޮންމެ އަހަރެއްގެވެސް އައު އަހަރާއި ދިމާކޮށް ވެލާނާ އިންޓަރނޭޝަނަލް އެއަރޕޯޓަށް އަންނަ ޕްރައިވެޓް ޖެޓްތަކުގެ އަދަދު ވަރަށްބޮޑަށް އިތުރުވެގެންދެއެވެ.
