ލަންކާއިން ކޮވިޑް-19 އަށް ޕޮޒިޓިވްވި މީހުންގެ އަދަދު 8000 އަށް އަރައިފި
27 އޮކްޓޯބަރު 2020 | އަންގާރަ 04:02ހޯމަ ދުވަހު 280 މީހަކު ވަނީ ޕޮޒިޓިވް ވެފައި
މި ފަހުން ފެންނަ ކޭސްތަކުގެ ތެރެއިން އެންމެ ގިނައިން ރިޕޯޓް ކުރެވިފައިވާ ކޭސްތަކަކީ ކޮލަމްބޯ އޮންނަ ހުޅަނގު ޕްރޮވިންސްގެ ޕެލިޔަގޮޑައިގެ މަސް މާރުކޭޓްއާ ގުޅުން ހުރި ކްލަސްޓާތަކެއް
ސްރީލަންކާއިން ކޮވިޑް-19 އަށް ޕޮޒިޓިވްވި މީހުންގެ އަދަދު 8000 އަށް އަރައިފިއެވެ.
އެންމެ ފަހުގެ ރިޕޯޓްތައް ބުނާގޮތުން ލަންކާގައި މިހާތަނަށް ޕޮޒިޓިވްވި މީހުންގެ އަދަދު ވަނީ 8152 އަށް އަރާފައެވެ. އެގައުމުން ހޯމަ ދުވަހުވެސް 280 މީހަކު ވަނީ ޕޮޒިޓިވް ވެފައެވެ.
މި ފަހުން ފެންނަ ކޭސްތަކުގެ ތެރެއިން އެންމެ ގިނައިން ރިޕޯޓް ކުރެވިފައިވާ ކޭސްތަކަކީ ކޮލަމްބޯ އޮންނަ ހުޅަނގު ޕްރޮވިންސްގެ ޕެލިޔަގޮޑައިގެ މަސް މާރުކޭޓްއާ ގުޅުން ހުރި ކްލަސްޓާތަކެެވެ. ހޯމަ ދުވަހު ޕޮޒިޓިވްވި މީހުންގެ ތެރެއިން 265 މީހުންނަކީ އެ ކްލަސްޓާރ އާ ގުޅުން ހުރި ކޭސްތަކެވެ.
އިތުރަށް ޕޮޒިޓިވްވި 15 މީހުންނަކީ ކަރަންޓީން ސެންޓަރުތަކުގައި ތިބި މީހުންކަމަށް އާމީ ކޮމާންޑަރ ވަނީ ވިދާޅުވެފައެވެ.
މިނުވަންގޮޑާ-ޕެލިޔަގޮޑާ ކްލަސްޓަރ އާއި ގުޅިގެން ޕޮޒިޓިވްވި މީހުންގެ އަދަދު ވަނީ 4678 އަށް އަރާފައެވެ.
ލަންކާއިން ކޮވިޑް ޖެހުނު މީހުންގެ ތެރެއިން 130 މީހަކު ހޯމަ ދުވަހު ވަނީ ބަލިން ފެސޭހަވެ ހޮސްޕިޓަލުން ޑިސްޗާޖް ކޮށްފައެވެ.
އެއާއި އެކު މިހާތަނަށް ބަލިން ފަސޭހަވި މީހުންގެ އަދަދު ވަނީ 3933 އަށް އަރާފައެވެ.
ލަންކާގައި ހަލުވިކަމާއި އެކު ކޮވިޑް ފެތުރެންފެށުމާއި ގުޅިގެން ވެރިރަށް ކޮލަމްބޯގެ ޕެޓާ، ފޯޓްގެ އިތުރުން ބޮރެއްލާ ގައި ކާފިއު ހިންގަން ވަނީ ފަށާފައެވެ. އެ ސަރަހައްދު ތަކުގެ ކާފިއު އަށް ލުޔެއް ދޭން ނިންމާފައިވަނީ ތިން ދުވަހުން ތިން ދުވަހުން އިތުރަށް ބެލުމަށް ފަހުއެވެ.
