ޖަރުމަނުގެ ކޮވިޑް-19 ޕޮޒިޓިވް ކޭސްތަކުގެ އަދަދު 430,000 އަށް ވުރެ މައްޗަށް
ބަލިޖެހުނު މީހުންގެ ތެރެއިން 10,125 މީހުން ވަނީ މަރުވެފައި
ޖަރުމަނުގައި މިހާރު ބައްޔަށް ފަރުވާ ހޯދަމުން ދަނީ 103,218 މީހުން
އެއްދުވަހާ ފެނުނު 11،000 އަށް ވުރެ ގިނަ ކޭހާއި އެކު ޖަރުމަނުގެ ކޮވިޑް-19 ގެ ކޭސްތަކުގެ އަދަދު 430،000 އަށް ވުރެ މައްޗަށް އަރައިފިއެވެ.
އެގޮތުން އާދިއްތަ ދުވަހު 11،100 އަށް ވުރެ ގިނަ އައު ކޮވިޑް-19 ކޭސް ޖަރުމަނުން ފެނިފައިވާ އިރު، އެ ގައުމުން ބައްޔަށް ޕޮޒިޓިވްވި މީހުންގެ ޖުމްލަ އަދަދު ވަނީ 430,343 އަށް އަރާފައެވެ. ޖަރުމަނުން ބަލި ޖެހުނު މީހުންގެ ތެރެއިން 10,125 މީހުން މަރުވެފައިވާ އިރު، ބަލި ޖެހުނު 317,000 މީހުން ވަނީ ބަލިން ރަނގަޅުވެފައެވެ.
މިހާރު ޖަރުމަނުގައި 103,218 މީހުން ބައްޔަށް ފަރުވާ ހޯދަމުންދާ އިރު، ސީރިއަސް ހާލަތުގައި ނުވަތަ ކްރިޓިކަލް ކޮންޑިޝަންގައި ފަރުވާ ހޯދަމުން ދަނީ 1,203 މީހުންނެވެ. މިހާތަނަށް އައި އިރު ޖަރުމަނުން ވަނީ ކޮވިޑް-19 އަށް ޓެސްޓް ކުރުމަށް 20 މިލިއަނަށް ވުރެ ގިނަ ސާމްޕަލް ނަގާފައެވެ.
ޖަރުމަނުގެ ސަރުކާރުން ވަނީ ކޮވިޑް ފެތުރުން ކޮންޓްރޯލް ކުރުމުގެ ގޮތުން އެ ގައުމުގެ ސްކޫލްތަކާއި، ރެސްޓޯރެންޓްތަކާއި ޕާކުތައް އަދި ޖިމްތައް ކުރިޔަށް އޮތް ދެ ހަފްތާއަށް ބަންދު ކޮށްފައެވެ. އަދި ކޮވިޑް ކޮންޓްރޯލް ކުރުމަށް އެ ގައުމުގެ ސަރުކާރުން ގިނަ މަސައްކަތްތަކެއް ކުރަމުން އަންނަ އިރު، މިހާރު އަޅާފައިވާ ފިޔަވަޅުތައް ހަރުކަށި ކުރާނެ ކަމަށް ވަނީ ބުނެފައެވެ.
ޖަރުމަނުގެ އިތުރުން ޔޫރަޕްގެ ގިނަ ގައުމުތަކަކުން ފާއިތުވެދިޔަ ދެ ހަފްތާ ކޮވިޑަށް މީހުން ޕޮޒިޓިވްވަމުން އަންނަ މިންވަރު ވަނީ އިތުރުވެފައެވެ.
