ސީޝެލްސްގެ އިންތިހާބު 43 އަހަރަށް ފަހު އިދިކޮޅުން ކާމިޔާބު ކޮށްފި
ރަމްކަލަވަން، އިންތިހާބު ކާމިޔާބު ކުރެއްވީ ވޯޓުލީ މީހުންގެ 54.9 އިންސައްތަ ވޯޓު ހޯދައިގެން
ސީޝެލްސްގައި ކުރިޔަށްދިޔަ އިންތިހާބުގެ ތެރެއިން
ސީޝެލްސްގައި ރައީސަކު ހޮވަން ބޭއްވި އިންތިހާބު 43 އަހަރަށް ފަހު އިދިކޮޅުން ވާދަކުރި ކެނޑިޑޭޓު ކާމިޔާބު ކުރައްވައިފިއެވެ.
އިންތިހާބާއި ބެހޭ ކޮމެޓީއިން ވަނީ އާދީއްތަ ދުވަހު އެ ގައުމުގެ އިންތިހާބު ވެވެލް ރަމްކަލަވަން ކާމިޔާބު ކުރައްވާފައިވާ ކަން ހާމަ ކުރައްވާފައެވެ. ރަމްކަލަވަން، އިންތިހާބު ކާމިޔާބު ކުރެއްވީ ވޯޓުލީ މީހުންގެ 54.9 އިންސައްތަ ވޯޓު ހޯދައިގެންނެވެ.
ރަމްކަލަވަން ވަނީ ކޮވިޑް-19 ގެ ސަބަބުން އެ ގައުމުން ވަޒީފާ ގެއްލުނު ފަރާތްތަކަށް އަލުން ވަޒީފާގެ ފުރުސަތު ދޭނެ ކަމަށް ވައުދުވެ ވަޑައިގެންފައެވެ. އަދި އިންސާފާއި ހަމަހަމަ ކަމާއިއެކު ވަކި މީހަކަށް ބެލުމެއް ނެތި ކޮރަޕްޝަނާއި ފަސާދައިން ގައުމު ސަލާމަތް ކުރުމަށް ވައުދުވެ ވަޑައިގެންފައެވެ.
އިންތިހާބު ކާމިޔާބު ކުރެއްވުމަށް ފަހު ރަމްކަލަވަން ވިދާޅުވީ އެ މަނިކުފާނުގެ ސަރުކާރުގައި މިހާރު ސަރުކާރުގައި ތިއްބެވި ބޭފުޅުންނަށް މަސައްކަތް ކުރުމުގެ ފުރުސަތު އޮންނާނެ ކަމަށާއި، ގައުމު ކުރިއަރައި ދާނީ އެންމެން އެކައްޗެއް ކިޔައި، އެއް އަމާޒަކަށް މަސައްކަތް ކޮށްގެން ކަމަށެވެ.
ސީޝެލްސް އިންތިހާބު ކާމިޔާބު ކުރެއްވި ރަމްކަލަވަންގެ ނައިބަކީ ސުވައިދީބު ޖުމްހޫރިއްޔާގެ ރައީސް އަބްދުﷲ އަފީފްގެ ދަރިކަލުން، އަހުމަދު އަފީފް، އެވެ.
ސީޝެލްސްގެ ރިޔާސީ އިންތިހާބު ބާއްވާފައި ވަނީ މި މަހުގެ 22 އިން 24 އަށެވެ. މި އިންތިހާބުގައި 74،000 އަށް ވުރެ ގިނަ މީހުން ވަނީ ވޯޓުލައިފައެވެ.
