އަދީބު ގޭގައި ހުންނެވީ ފުއްޕާމެއާ ގުޅުންހުރި ނޭވާލުމުގެ މައްސަލަތަކެއް ހުރުމުން: ހޯމް މިނިސްޓަރު

އެމްއެމްޕީއާރުސީގެ ބޮޑު ހިޔާނާތް ސާބިތުވެ 20 އަހަރުގެ ޖަލު ހުކުމެއް ކޮށްފައިވާ ކުރީގެ ނައިބު ރައީސް އަހުމަދު އަދީބު ޖަލަށް ނުގެން ގޮސް ގޭގައި ބަހައްޓާފައި ހުރީ ފުއްޕާމެއާ ގުޅުން ހުރި ނޭވާލުމުގެ މައްސަލަތަކެއް ހުރި ކަމަށް ޑޮކްޓަރުން ލިޔުން ދެއްވާފައިވާތީ ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެއެވެ.

އަދީބުގެ މައްޗަށް 20 އަހަރުގެ ޖަލު ހުކުމެއް އިއްވާ، ދެ މިލިއަން ރުފިޔާއިން ޖޫރިމަނާ ކޮށްފައި ވަނީ އެމްއެމްޕީއާރްސީގެ ބޮޑު ހިޔާނާތުގެ މައްސަލާގައި އޭނާގެ މައްޗަށް ދައުލަތުން އުފުލި ހަތް ދައުވާއަކަށް އިއުތިރާފު ވުމުންނެވެ.

Advertisement

ދިވެހިރާއްޖޭގެ އަޑުން ގެނެސްދޭ ޕްރޮގްރާމެއްގައި އަދީބު ގޭގައި ހުންނެވުމާ ގުޅޭ ގޮތުން މައުލޫމާތު ދެއްވަމުން ހޯމް މިނިސްޓަރު އިމްރާން އަބްދުﷲ ވިދާޅުވީ، އަދީބު ނިދުމުގައި މައްސަލަތަކެއް ހުންނަ ކަމަށާއި ފުއްޕާމެއާ ގުޅުންހުރި ނޭވާލުމުގެ މައްސަލަތަކެއް ހުރިކަމަށް ޑޮކްޓަރުން ލިޔުން ދެއްވާފައިވާ ކަމަށެވެ. އެގޮތުން އަދީބު ނިދުމުގައި ވަކި ހާއްސަ މެޝިނެއް ބޭނުން ކުރަން ޖެހޭ ކަމަށާއި އެ މެޝިނަކީ ޖަލުގައި ބޭނުން ކުރެވޭ މެޝިނެއް ނޫން ކަމަށް ވެސް ވިދާޅުވިއެވެ.

މި ޕްރޮގްރާމުގައި މިނިސްޓަރު ވަނީ ޖަލު ހުކުމެއް އައިސްފައިވާ ފަރާތެއްގެ ބަލި ހާލަތަށް ރިއާޔަތްކޮށް، އެފަރާތެއް ގޭގައި ހުންނަން ޑޮކްޓަރު ލަފާ ދެއްވާ ނަމަ ކަރެކްޝަނުން އެކަން ކުރަމުން އަންނަ ގޮތް ވެސް ތަފްސީލު ކޮށް ދެއްވާފައެވެ.

އެގޮތުން މިނިސްޓަރު ވިދާޅުވީ، މީހެއްގެ މައްޗަށް ހުކުމެއް އިއްވިގެން ދިއުމުން އެކަމުގައި ފުރިހަމަ ކުރަން ޖެހޭ ގާނޫނީ އިޖުރާއަތްތަކެއް ހުންނަ ކަމަށާއި، އެގޮތުން އެމީހަކު ޖަލުގައި ބަހައްޓާނެ ތަނެއް ކަނޑައެޅޭ ފަދައިން، އެމީހެއްގެ ހާލަތު ނިޔާކުރާ ގޮތުން ގޭގައި ނުވަތަ އެނޫންވެސް ތަނެއްގައި ބަހައްޓަންޖެހޭ ކަމަށެވެ. އަދި ބައެއް ހާލަތްތަކުގައި އެފަދަ ފަރާތްތައް ބޭރަށް ފޮނުވަންޖެހޭ ފަހަރުވެސް އަންނަ ކަމަށް މިނިސްޓަރު ވިދާޅުވިއެވެ.

މިނިސްޓަރު ވިދާޅުވީ ގައިދީއަކު ޖަލު ނޫން އެހެން ތަނެއްގައި ބެހެއްޓުމަށްޓަކައި ކަނޑައެޅިގެން ދާނީ ޖަލުގައި ހުންނަ ޑޮކްޓަރަށް ދެއްކުމަށް ފަހު ހާލަތު އިތުރަށް ގޯސް ނަމަ އެކަމާ ގުޅުން ހުރި ސްޕެޝަލިސްޓް އެހެން ޑޮކްޓަރަކަށް ދެއްކުމަށް ފަހު، އެ ޑޮކްޓަރެއްގެ ލަފާގެ މަތިން ކަމަށެވެ.

ކުރީގެ ނައިބު ރައީސްއަށް ޖަލު ހުކުމެއް ކޮށް، ގޭގައި ބަހައްޓާފައި ހުރުމުން އިދިކޮޅު ސިޔާސީ ފަރާތްތަކުން އަންނަނީ އެކަމާ މެދު ކަންބޮޑުވުން ފާޅުކުރަމުންނެވެ.

އެގޮތުން ކުރީގެ ރައީސް ޔާމީންގެ ސިއްހީ ހާލުކޮޅާ ގުޅުވައި އެފަރާތްތަކުން ބުނެފައި ވަނީ އަދީބުގެ ޖަލު ހުކުން ތަންފީޒު ކުރުމަށް ގޭގައި ބަހައްޓާ، ޔާމީން ޖަލުގައި ހުންނެވުމަކީ އިންސާފެއް ނޫން ކަމަށެވެ. އަދި އަދީބު ގޭގައި ބަހައްޓާފައި ހުންނަނީ ސަރުކާރާއެކު ހަދާފައިވާ ޑީލެއްގެ ދަށުން ކަމަށް ދޭހަވާ ގޮތަށް އިދިކޮޅުން އަންނަނީ ސަރުކާރަށް ބަހުގެ ހަމަލާތައް ދެމުންނެވެ.