އޭޑީކޭ ހޮސްޕިޓަލްގެ ފަރާތުން ފްލޫ ކުލިނިކެއް ހުޅުވާ  އެ ކުލިނިކްގެ ޚިދުމަތް ބުދަ ދުވަހުން ފެށިގެން ސޯސަންގޭގައި ދޭން ފަށާނޭކަމަށް އެ ހޮސްޕިޓަލުން ހާމަކޮށްފިއެވެ.

އޭޑީކޭ ހޮސްޕިޓަލުގެ އިސް އޮފިޝަލަކު ވިދާޅުވީ، އަންގާރަދުވަހު އޭޑީކޭގެ ލޮބީގައި މި ޚިދުމަތް ދޭން ފެށިނަމަވެސް ޖާގައިގެ ދަތިކަމާއި އެކު، ބުދަދުވަހުން ފެށިގެން ފްލޫކުލިނިކުގެ ޚިދުމަތްދޭނީ ސޯސަންގޭ ނުވަތަ ފެކަލްޓީ އޮފް ސައިންސްގެ އިމާރާތުގައި ކަމަށެވެ. އަދި އެ ކްލިނިކްގެ ޚިދުމަތް ކޮންމެ ދުވަހެއްގެ ހެނދުނު 10.00 އިންފެށިގެން ރޭގަނޑު 10.00 އަށް ދެމުން ގެންދާނޭކަމަށް އޭޑީކޭއިން ބުންޏެވެ.

އޭޑީކޭއިން ގާއިމްކޮށްފައިވާ ކްލިނިކުގައިވެސް ފުރަތަމަ މަރުހަލާގައި ޑޮކްޓަރަށް ދެއްކުމަށް އެއްވެސް ފީއެއް ނުނަގާނޭކަމަށް އެ ހޮސްޕިޓަލުން ބުނެއެވެ.

ބަލިމީހުން އަންނަ ޢަދެއް ބަލާ ޚިދުމަތް އިތުރަށް ފުޅާކުރުމަށް އަދި ޑޮކްޓަރުން އިތުރުކުރުމަށް ނިންމާފައިވާއިރު، މިވަގުތަށް ޑޮކްޓަރަކާއި ނަރުހަކު ބަލިމީހުން ބެލުމުގައި ހަރަކާތްތެރިވާނެކަމަށް އޭޑީކޭއިން މައުލޫމާތުދެއެވެ.

އޭޑީކޭގެ ފުލޫކުލިނިކުގެ އިތުރުން އައިޖީއެމްއެޗުން ތާޖުއްދީން ސްކޫލްގައި ވެސް ފްލޫ ކުލިނިކެއް ހުޅުވާ ޚިދުމަތްދޭން މިހާރުވަނީ ފަށާފައެވެ.