ށ. ނަރުދޫ އިންޖީނު ގޭގައި ރޯވެއްޖެ

ށ. ނަރުދޫ އިންޖީނު ގޭގައި ރޯވެ، މުޅި ރަށުން ކަރަންޓްގެ ޚިދުމަތް މެދު ކެނޑިއްޖެއެވެ.

ރާއްޖެއެމްވީއަށް މައުލޫމާތު ދެއްވަމުން ނަރުދޫ ކައުސްސިލްގެ ރައީސް އަބުދުﷲ ޝަފީގު ވިދާޅުވީ އަލިފާނުގެ ހާދިސާ ހިނގާފައި ވަނީ ހޯމަދުވަހުގެ މެންދުރު 11:45 އެހާއިރު ކަމަށެވެ.

އަކިފާން ރޯވީ އިންޖީނުގޭގައި އެވަގުތު ހިންގާފައި ހުރި 80 ކިލޯވޮޓްގެ ޖަނަރޭޓަރުގައި ކަމަށެވެ. ޝަފީގު ވިދާޅުވީ، ޖަނަރޭޓަރު ރޯވުމުން މުޅި ރަށުން މިހާރު ކަރަންޓްގެ ޚިދުމަތް މެދުކެނޑިފައިވާ ކަމަށެވެ. އަދި އިންޖީނު ގޭގެ ފުރާޅުން ބޮޑު ބަޔަކާއި އިންވެގެން ހުރި އޮފީސް އިމާރާތަށް ބޮޑެތި ގެއްލުންތަކެއް ވެފައިވާ ކަމަށެވެ.

"ރަށުގެ ރައްޔިތުންނާއި އިންޖީނުގޭގެ މުއައްޒަފުންގެ މަސައްކަތުން އިރާދުކުރެއްވިއްޔާ ވަރަށް އަވަހަށް ނިންވާލެވިއްޖެ، އެހެންނަމަވެސް ޖަނަރޭޓަރު ހަމަ އެއްކޮށް އަދާފައި އެވަނީ. ބާރުއަޑެއް ކިޔާފައި ހަމަ ރޯވިތަން ފެނުނީ، ޑިއުޓީ އޮފިސަރަށް ވެސް،" ޝަފީގު ވިދާޅުވިއެވެ.

މިޚަބަރާއި ގުޅިގެން ފެނަކައިގެ ބަހެއް އަދިވަނީ ލިބޭ ގޮތް ނުވެފައެވެ. އެހެނަސް ޝަފީގު ވިދާޅުވީ، ކައުންސިލުން ކުރި މަސައްކަތުން ފެނަކައިގެ އިސްފަރާތްތަކާއި ގުޅިފައިވާ ކަމަށާއި، ހއ. ކެލާގައި ހުރި ޖަނަރޭޓަރެއް މިހާރު ނަރުދޫއަށް ގެނައުމުގެ މަސައްކަތް ފަށާފައިވާ ކަމަށެވެ.

އެހެނަމަސް ރަށަށް ކަރަންޓް ދެވޭނެ ވަކި އިރެއް ނޭނގޭ ކަމަށް ޝަފީގު ވިދާޅުވިއެވެ.

މިކަމާ ގުޅޭ ގޮތުން ފުލުހުން ފޯނަށް ޖަވާބު ނުދޭދީ ފުލުހުންގެ ކޮމެއްޓެއް ވަނީ ލިބޭގޮތް ނުވެފައެވެ.