ލުއި ދެވޭ ވަރަށް ވުރެ އަންލިންކްޑް ކޭސްތައް މާ ގިނަ!
ރާއްޖޭގެ ބޯޑަރުތައް ހުޅުވާލާފައި ވީނަމަވެސް ޓޫރިޒަމް އާއި ސީދާ ގުޅޭ ކޭސްތަކަށް ލުއިތައް ދިނުމުގައި ނުބަލާ
އެޗްއީއޯސީގެ ތަރުޖަމާން ޑރ ނަޒްލާ ރަފީގް
ކޮވިޑް-19 ފެތުރުން ކޮންޓްރޯލް ކުރުމަށް އަޅާފައިވާ ފިޔަވަޅުތަކަށް ލުއިތައް ދިނުމުގައި ޖުމްލަ ކޭސްތައް ފެންނަ އަދަދަށް ވުރެ ބޮޑަށް ކޮމިއުނިޓީ ތެރޭގައި ކޭސްތައް އުޅޭ މިންވަރަށް ބަލާ ކަމަށް ހެލްތު އެމަރޖެންސީ އޮޕަރޭޝަން ސެންޓަރ (އެޗްއީއޯސީ) ގެ ތަރުޖަމާން ޑރ. ނަޒްލާ ރަފީގް ވިދާޅުވެއްޖެއެވެ.
ހޮނިހިރު ދުވަހުގެ ރޭ އެ ސެންޓަރުން ބޭއްވި ނޫސްވެރިންގެ ބައްދަލުވުމުގައި ރަށްރަށަށް ދާ މީހުންނަށް އަދިވެސް ކަރަންޓީނުވާން ޖެހޭގޮތަށް އޮންނައޮތުމާއި ރަށްރަށަށްދިޔުމުގެ ފުރުސަތު ހުޅުވާލާފައިނުވާތީ އެކަމުގެ ކަންބޮޑުވުންތައް އާންމުންގެ ތެރޭގައި އުޅޭތީ އެކަންކަމަށް ލުއިދިނުމަށް ވިސްނަވާތޯ "ރާއްޖެޓީވީ" އިން ވަނީ ސުވާލުކޮށްފައެވެ.
އެ ސުވާލަށް ޖަވާބު ދެއްވަމުން ޑރ. ނަޒްލާ ވިދާޅުވީ ރާއްޖޭގެ ބޯޑަރުތައް ހުޅުވާލާފައިވީ ނަމަވެސް ޓޫރިޒަމް އާއި ސީދާ ގުޅޭ ކޭސްތަކަށް ލުއިތައް ދިނުމުގައި ނުބަލާ ކަމަށެވެ. ބަލަނީ މާލޭގައި ކޮމިއުނިޓީ ޓްރާންސްމިޝަން އޮތް މިންވަރަށް ކަމަށް ވިދާޅުވިއެވެ. އަދި ދުވާލެއްގެ މައްޗަށް ޖުމްލަ ކޭސްތައް ފެންނަ މިންވަރަށް ވެސް ނުބަލާ ކަމަށް ވިދާޅުވިއެވެ.
ޑރ. ނަޒްލާ ވިދާޅުވީ މީގެ އިތުރުން އެކްޓިވް ސަރވިއަލަންސްގެ ތެރެއިންވެސް މީހުން ޕޮޒިޓިވް ވަމުންދާ ކަމަށެވެ. އެގޮތުން ފާއިތުވި ތިން ހަތަރު ދުވަހަށް ބަލާލި ނަމަވެސް އެކްޓިވް ސަރވިއަލަންސްގެ ތެރެއިން ޕޮޒިޓިވްވި މީހުންގެ އަދަދު އުޅެނީ 7 ނޫނީ 8 އިންސައްތައިގެ ކަމަށެވެ. އެހެންކަމުން މިހުންނަނީ އަދިވެސް މޮނިޓަރ ކުރަންޖެހޭ ކަންތައްތައް ކަމަށް ވިދާޅުވިއެވެ.
އެހެން ކަމުން މިހާތަނަށް އައިއިރު ވެސް އެ ފިޔަވަޅުތައް އަޅާފައިވަނީ ރަށްރަށުގައި ވައިރަސް ފެތުރުން ކޮންޓްރޯލް ކުރުމަށް ކަމަށް ޑރ. ނަޒްލާ ވިދާޅުވިއެވެ. އަދި ރަށްރަށުގައި ކަރަންޓީނުވާ ފަރާތްތަކުގެ ތެރެއިން ޕޮޒިޓިވް ވެފައިވާ މިންވަރަށް ބަލާއިރު މާލެއިން ރަށްރަށަށްދާ ފަރާތްތައް ކަރަންޓީނު ވުމަކީ މުހިންމު ކަމެއްކަން ހާމަވެފައިވާ ކަމަށް ވިދާޅުވިއެވެ.
އެހެން ނަމަވެސް މިކަންކަމަށް ކުރިޔަށް އޮތް ތަނުގައި ރަނގަޅު ބަދަލުތަކެއް އަންނަ ނަމަ އަޅާފައިވާ ފިޔަވަޅުތަކަށް ލުއިތައް ދިނުމުގައި ވިސްނާނެ ކަމަށް ޑރ. ނަޒްލާ ވިދާޅުވިއެވެ.
