އިންކަމް ސަޕޯޓް އެލަވަންސްގެ ގޮތުގައި 120 މިލިއަން ރުފިޔާ އެޕްރޫވް ކޮށްފި
މިނިސްޓްރީ އިން އެޕްރޫވްކޮށްފައި ވަނީ މުޅިއަކު 28،000 އެއްހާ އެޕްލިކޭޝަން
އިންކަމް ސަޕޯޓް އެލަވަންސް ދިނުމަށް ސަރުކާރުން ނިންމީ ކޮވިޑް-19 އާއި ގުޅިގެން އާމްދަނީ އަށް އަސަރުކޮށްފައިވާ ފަރާތްތަކަށް އެހީތެރިވުމުގެ ގޮތުން
ކޮވިޑް-19 އާއި ގުޅިގެން އާމްދަނީއަށް އަސަރު ކޮށްފައިވާ ފަރާތްތަކަށް އިންކަމް ސަޕޯޓް އެލަވަންސްގެ ގޮތުގައި 120 މިލިއަން ރުފިޔާ ދިނުމަށް މިހާތަނަށް އެޕްރޫވް ކުރެވިފައިވާ ކަމަށް އިކޮނޮމިކް މިނިސްޓްރީއިން ހާމަކޮށްފިއެވެ.
އިކޮނޮމިކް މިނިސްޓްރީގެ ކޮންސަލްޓެންޓް އެންޑް ޕްރޮޖެކްޓް ޑިރެކްޓަރ، އިންކަމް ސަޕޯޓް ޕްރޮޖެކްޓް ޝުހާދު އިބްރާހިމް ވިދާޅުވީ އޭޕްރިލް މަހުން ސެޕްޓެމްބަރ މަހަށް މުޅިއަކު 120 މިލިއަން ރުފިޔާ ދޫކުރުމަށް އެޕްރޫވް ކުރެވިފައިވާ ކަމަށާއި އެއީ މުޅިއަކު 28،000 އެއްހާ އެޕްލިކޭޝަން ކަމަށެވެ. ޝުހާދު މިހެން ވިދާޅުވީ ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަ ދައްކަވަމުންނެވެ.
އެގޮތުން ވަކިވަކި ފަރުދުންނަށް ބަލާލާއިރު މިއީ 10،700 އަށް ވުރެ ގިނަ މީހުން ކަމަށް ޝުހާދު ފާހަގަ ކުރެއްވިއެވެ.
ޝުހާދު ވިދާޅުވީ މީގެ ތެރެއިން 23 ނުވަތަ 25 އިންސައްތަ މީހުންނަކީ އަންހެނުން ކަމަށެވެ. އެޕްރޫވް ކުރެވުނު އަދަދުތަކަށް ބަލާއިރު، ބޮޑު ބައެއް ހިއްސާ ކުރަނީ ފަތުރުވެރިކަމުގެ ސިނާއަތުގެ އެކިއެކި ވަޒީފާތައް އަދާކުރާ ފަރާތްތައް ކަމަށާއި މި ސިނާއަތުގައި މަސައްކަތްކުރާ ފަރާތްތަކަށް އިންކަމް ސަޕޯޓް އެލަވަންސްގެ ގޮތުގައި 60 މިލިއަން ރުފިޔާ އާއި ގާތްކުރާ އަދަދަކަށް އެޕްރޫވް ކުރެވިފައިވާ ކަމަށް ޝުހާދު ވިދާޅުވިއެވެ. މިއީ އެޕްރޫވް ކުރެވިފައިވާ އެލަވަންސްގެ 49 އިންސައްތަ ކަމަށްވެސް ޝުހާދު ފާހަގަ ކުރެއްވިއެވެ.
މީގެ އިތުރުން މަސްވެރިކަމުގެ ސިނާއަތުގައި އަދި ދަނޑުވެރިކަމުގެ ސިނާއަތް ވެސް ހިމެނިގެން ދަނީ އެންމެ ގިނަ އަދަދަކަށް އެލަވަންސް އެޕްރޫވް ކުރެވިފައިވާ ސިނާއަތްތަކުގެ ތެރޭގައި ކަމަށް ޝުހާދު ވިދާޅުވިއެވެ.
އިކޮނިމިކް މިނިސްޓްރީއިން އާންމު ކޮށްފައިވާ މައުލޫމާތުތަކަށް ބަލާ އިރު، އޭޕްރިލް މަހުން ޖޫން މަހަށް މިނިސްޓްރީއިން ވަނީ މަހަކު 15 ނުވަތަ 16 މިލިއަން ރުފިޔާ އެލަވަންސްގެ ގޮތުގައި ދިނުމަށް އެޕްރޫވް ކޮށްފައެވެ. ޖުލައި މަހުން ސެޕްޓެމްބަރު މަހަށް، މަހަކު 30 މިލިއަނަށް ވުރެ ގިނަ ރުފިޔާ އެލަވަންސްގެ ގޮތުގައި ދިނުމަށް ވަނީ އެޕްރޫވް ކޮށްފައެވެ.
