ޒުވާނުންނަށް އަމާޒުކޮށް ކުރެވުނު މަސައްކަތްތަކަށް ހިތްހަމަޖެހުން ބޮޑު: ޔޫތް މިނިސްޓަރު
ޕީއެސްޕީގެ 40 އިންސައްތަ މަޝްރޫއުއަކީ ޔޫތްގެ ބެލުމުގެ ދަށުން ހިންގާ މަޝްރޫއުތައް
ޔޫތް މިނިސްޓަރު އަހުމަދު މަހްލޫފް
ވޭތުވެދިޔަ ދޮޅު އަހަރެއްގެ ތެރޭގައި ޔޫތް މިނިސްޓްރީން ޒުވާނުންނަށް އަމާޒުކޮށްގެން ކުރެވިފައިވާ މަސައްކަތްތަކާއިމެދު ވަރަށް ބޮޑަށް ހިތްހަމަޖެހޭ ކަމަށް ޔޫތް މިނިސްޓަރު އަހުމަދު މަހްލޫފް ވިދާޅުވެއްޖެ އެވެ.
މަހްލޫފް އެހެން ވިދާޅުވީ، ގައުމީ ޒުވާނުންގެ ދުވަހުގެ މުނާސަބަތުގައި ޔޫތް މިނިސްޓްރީން ބާއްވާ "މޯލްޑިވްސް ޔޫތު ކޭމްޕް 2020" އިފްތިތާހު ކޮށްދެއްވައި ވާހަކަ ދައްކަވަމުންނެވެ.
މަހްލޫފް ވިދާޅުވީ، ދުނިޔޭގެ އިތުރުން ރާއްޖެއަށް ދިމާވެފައިވާ ކޮވިޑް-19 ގެ މި ދަނޑިވަޅުގައިވެސް އާއިލާތަކާއި ދުރުގައި އެންމެ އިސްދައުރެއް އަދާކުރަމުން ގެންދަނީ ދިވެހި ޒުވާނުން ކަމަށެވެ. ވަކިން ހާއްސަކޮށް ފޮރްންޓް ލައިންގައި މަސައްކަތްކުރާ ޒުވާނުންނަށް މަހްލޫފް ތައުރީފް ކުރެއްވިއެވެ.
ޒުވާނުންނާ ގުޅޭ ހަރަކާތްތައް ރާވާ ހިންގުމުގެ މަސްއޫލިއްޔަތު މަތިކޮށްފައިވާ ޔޫތް މިނިސްޓްރީގެ މެންޑޭޓުގައި ހިމެނޭ ކަންތައްތަކުގެ ތެރެއިން ގިނަ މަސައްކަތްތަކެއް ކުރީ އަހަރުތަކާއި އަޅައި ބަލާއިރު ރައީސް އިބްރާހިމް މުހައްމަދު ސޯލިހުގެ ސަރުކާރުން ކުރަމުންދާކަން މަހްލޫފް ފާހަގަކުރެއްވިއެވެ. އަދި ސަރުކާރުން ހިންގާ ޕީއެސްޕީ މަޝްރޫއުގެ 40 އިންސައްތަ އަކި ޔޫތް މިނިސްޓްރީގެ ބެލުމުގެ ދަށުން ކުރެވެމުންދާ މަސައްކަތްތައް ކަމަށް ވިދާޅުވިއެވެ.
މަހްލޫފް ވަނީ ފާއިތުވެ ދިޔަ އަހަރު ޔޫތް މިނިސްޓްރީން ހިންގިފައިވާ މުހިއްމު ކަންތައްތަކުގެ މައްޗަށް އަލިއަޅުއްވާލައްވާފައެވެ.
އޭގެ ތެރޭގައި ޒުވާނުންގެ ގައުމީ މަޖިލީހުގެ ބައިވެރިވުމާއި އެކީ ބާއްވަމުން އަންނަ ޒުވާނުންގެ ހޮޅުއަށި ޕްރޮގްރާމް، ނަފްސާނީ ދުޅަހެޔޮކަން އިތުރު ކުރުމުގެ ޕްރޮގްރާމް، ލައިފް ސްކިލްސް ޕްރޮގްރާމްތަކާއި ވަޒީފާގެ މާހައުލަށް ޒުވާނުން އަހުލުވެރި ކުރުވުމުގެ ޕްރޮގްރާމްގެ އިތުރުން ޒުވާން ލީޑަރު އުފެއްދުމަށް ކުރިޔަށް ގެންދިޔަ ކޭމްޕްތައް ފާހަގަކުރެއްވިއެވެ. ކޮވިޑް-19 ގެ ހާލަތުގައި ޔޫތް މިނިސްޓްރީން ދަނީ އޮންލައިންކޮށް އެކި ކަހަލަ ޕްރޮގްރާމްތަކެއް ހިންގަމުންނެވެ.
ފާއިތުވެދިޔަ އަހަރު ކުޅިވަރުން ހޯދިފައިވާ ކާމިޔާބީތަކުގެ ތަފްސީލު ދެއްވަމުން ކުޅިވަރާއި ބެހޭ ވަޒީރު ވިދާޅުވީ، ކުޅިވަރު ކުރިއަރުވާ އެހެން ހަރުފަތަކަށް ގެންދިޔުމަށް ދިވެހި ތާރީހުގައިވެސް ދައުލަތުގެ ބަޖެޓުން ހަރަދުނުކުރާ ވަރަށް ހަރަދުކޮށް ކުޅިވަރު ފެސިލިޓީސްތައް ގާއިމްކޮށް، ތަމްރީނުތައް ދީފައިވާނެ ކަމަށެވެ. އަދި ބައިނަލްއަގްވާމީ މުބާރާތްތަކުން ރާއްޖެ އަށް ރަންވަނަ ތަކެއް ހޯދަ ދިވެހި ޒުވާނުން ބޮޑެތި ކާމިޔާބީތަކެއް ހާސިލްކޮށްފައިވާ އިރު އަންހެން ފިރިހެން ތަފާތު ނައްތާލާ ގައުމީ އެތްލީޓުންނަށް ދޭ މުސާރަޔާ އިނާމުގެ ފައިސާ އަށް ހެޔޮ ބަދަލުތަކެއް ގެނެސްފައިވާ ކަމަށް ވިދާޅުވިއެވެ.
މަހްލޫފް ގަބޫލުކުރައްވާ ގޮތުގައި ގިނަ ކަންތައްތަކެއް ކުރެވުނުކަމުގައިވިޔަސް އިސްލާހު ކުރަން ޖެހޭ އެބަހުއްޓެވެ. އެކަންތައްތައް ރަނގަޅު ކުރަން ޒުވާނުންގެ މަޝްވަރާ ހޯދާ ދިމާވާ ގޮންޖެހުންތަކަށް ހައްލު ހޯދައި ދޭން މަސައްކަތްކުރައްވާ ކަމުގެ ޔަގީންކަން މަހްލޫފް ދެއްވިއެވެ.
"މޯލްޑިވްސް ޔޫތު ކޭމްޕް 2020" ހުޅުވާލާފައިވަނީ ރާއްޖެ އާއި ރާއްޖޭއިން ބޭރުގައި ދިރިއުޅޭ ޒުވާނުންނަށް ހާއްސަކޮށްގެން އޮންލައިންކޮށް ހިންގާ ކޭމްްޕެކެވެ. މި ކޭމްޕް ހިންގުމުގައި މިނިސްޓްރީއާއިއެކު ލީޑިން ޕާޓްނަރެއްގެ ގޮތުގައި ޔޫއެންޑީޕީ ބައިވެރިވެއެވެ. އަދި ކޯ ޕާޓްނަރުންގެ ގޮތުގައި އެންސީޓީސީ، ޔުނިސެފް، ޔޫރަޕިއަން ޔޫނިއަން، ނެޝަނަލް ޔޫތް ކައުންސިލް ހިމެނެއެވެ. މި ކޭމްޕްގެ މައިގަނޑު މަގްސަދަކީ ސަރުކާރުން އެކުލަވާލައިފައިވާ ސްޓްރެޓެޖިކް އެކްޝަން ޕްލޭންގެ ދަށުން ޒުވާނުން ބާރުވެރިކުރުމާއި، ޒުވާނުންނާ ގުޅުންހުރި މައްސަލަތައް ހައްލުކުރުމުގައި ޒުވާނުންގެ އިސްނެގުމާއި، ބައިވެރިވުން އިތުރުކުރުން ކަމަށް ޔޫތް މިނިސްޓްރީން މައުލޫމާތުދެއެވެ.
