ހުރިހާ ފުލުހުންނަށް އަމާޒުކޮށްގެން ޖިނާއީ އިޖުރާއަތުގެ ގާނޫނަށް އަހުލުވެރިކުރުމުގެ ޕްރޮގްރާމެއް ފަށައިފި
ޖިނާއީ އިޖުރާއަތުގެ ގާނޫނަށް އަމުލު ކުރުމަށް ހަމަޖެހިފަ އޮތީ މިދިއަ ޖެނުއަރީ މަހުގެ ދެ ވަނަ ދުވަހު
ޖިނާއީ އިޖުރާއަތުގެ ގާނޫނަށް ފުލުހުން އަހުލުވެރިކުރުމަށް ހިންގާ ޕްރޮގްރާމްގެ ތެރެއިން--
މިއަހަރުގެ ޖުލައި މަހު އަމަލުކުރުމަށް ހަމަޖެހިފައިވާ ޖިނާއީ އިޖުރާއަތުގެ ގާނޫނަށް ފުލުހުން އަހުލުވެރިކުރުމުގެ ގޮތުން ޕްރޮގްރާމެއް ފަށައިފިއެވެ.
ފުލުހުންގެ މީޑިއާއިން ބުނީ ބުދަ ދުވަހު ފެށި މި ޕްރޮގްރާމަކީ އިންސްޓިޓިއުޓް ފޮރ ސެކިއުރިޓީ އެންޑް ލޯ އެންފޯސްމަންޓް ސްޓަޑީޒް (އައިލްސް) ގެ ފަރާތުން ފުލުހުންގެ މުއައްސަސާގައި މަސައްކަތްކުރާ ހުރިހާ ފުލުހުންނަށް އަމާޒުކޮށްގެން ސިލްސިލާކޮށް ކުރިއަށް ގެންދިޔުމަށް ހަމަޖެހިފައިވާ ޕްރޮގްރާމެއް ކަމަށެވެ.
މި ޕްރޮގްރާމުގެ ތެރެއިން ހިންގާ ކޮންމެ ކުލާހެއްގައި 35 ފުލުހުން ބައިވެރިވާއިރު މި ކްލާސް ކުރިއަށްދާނީ ދެ ދުވަހުގެ މުއްދަތަށް ކަމަށް ފުލުހުން ބުނެއެވެ.
ފުލުހުން ބުނީ މި ޕްރޮގްރާމުގައި ޖިނާއީ އިޖުރާއަތުގެ ގާނޫނާއި ގާނޫނުގައިވާ ބައިތަކާއި ކުރިން އަމަލުކުރަމުން އައި ގޮތާއި ޖިނާއީ އިޖުރާޢަތުގެ ގާނޫނަށް އަމަލުކުރުން ފެށުމާއެކު އަންނަ ބަދަލުތަކާ ގުޅޭ ގޮތުން ފުލުހުންނަށް މައުލޫމާތު ދިނުމަށް ހަމަޖެހިފައިވާ ކަމަށެވެ.
މި ޕްރޮގްރާމުގެ ދަށުން ކުރިއަށްގެންދާ ކްލާސްތައް ނަގައިދެނީ އެޓަރނީ ޖެނެރަލްގެ އޮފީހުގެ ފަރާތުން ހިންގި ޓްރެއިނަރސް ޕްރޮގްރާމް ފުރިހަމަކޮށްފައިވާ ފުލުހުން ކަމަށް ފުލުހުން ބުނެއެވެ.
ޖިނާއީ އިޖުރާއަތުގެ ގާނޫނަށް މިދިޔަ ޖެނުއަރީ މަހުގެ 2 ވަނަ ދުވަހު އަމަލު ކުރުމަށް ކުރިން އޮތް ނަމަވެސް އެގާނޫނަށް ސަރުކާރުގެ ފަރާތުން އިސްލާހު ހުށަހަޅާ، އެ ގާނޫނަށް އަމަލު ކުރުމަށް ރައްޔިތުންގެ މަޖިލީހުން ވަނީ ފަސްކޮށްފަ އެވެ.
މިހާރު އެގާނޫނަށް އަމަލު ކުރުމަށް ހަމަޖެހިފައިވަނީ އަންނަ ޖުލައި މަހުގެ 2 ވަނަ ދުވަހު އެވެ.
