ތުރާކުނުގައި ފުލުހުންގެ ހިދުމަތް ގާއިމް ކުރެވޭނެ ހަރަދު ކުޑަ ގޮތެއް ބަލަނީ
ތުރާކުނުގައި ފުލުހުންގެ ޚިދުމަތް ގާއިމުކުރެވި އެރަށުގެ ރައްޔިތުންނަށް އަމާންކަމާއި ރައްކާތެރިކަން ލިބުމަކީ މުހިންމު ކަމެއްގެ ގޮތުގައި ބަލައިގަންނަން
ހޯމް މިނިސްޓަރ އައްޝެއިޚް އިމްރާން އަބްދުﷲ
އެންމެ ޚަރަދު ކުޑަކޮށް ފުލުހުންގެ ޚިދުމަތް ހއ. ތުރާކުނުގައި ދެވޭނެ އިންތިޒާމެއް ގާއިމު ކުރެވޭނެ ގޮތްތަކެއް ހޯދަމުންދާ ކަމަށް ހޯމް މިނިސްޓަރ އައްޝެއިޚް އިމްރާން އަބްދުﷲ ވިދާޅުވެއްޖެއެވެ.
ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައި ވަޒީރުންނާއި ސުވާލު ކުރުމުގެ އެޖެންޑާގެ ދަށުން ހޯރަފުށި ދާއިރާގެ މެމްބަރ އަހުމަދު ސަލީމް ވަނީ ތުރާކުނުގައި ފުލުހުންގެ ޚިދުމަތް ދިނުމާއި ގުޅޭގޮތުން މިނިސްޓަރުގެ ވިސްނުންފުޅު ހުރި ގޮތާއި ގުޅޭ ގޮތުން ސުވާލު ކުރައްވާފައެވެ.
އެ ސުވާލަށް ޖަވާބު ދެއްވަމުން މިނިސްޓަރ އިމްރާން ވިދާޅުވީ ތުރާކުނުގައި ފުލުހުންގެ ޚިދުމަތް ގާއިމު ކުރެވި އެ ރަށުގެ ރައްޔިތުންނަށް އަމާންކަމާއި ރައްކާތެރިކަން ލިބުމަކީ މުހިންމު ކަމެއްގެ ގޮތުގައި ބަލައިގަންނަ ކަމަށެވެ. އަދި މި އަހަރުގެ މެދު ތެރޭގައި ތުރާކުނުގައި ފުލުހުންގެ ޚިދުމަތް ގާއިމު ކުރުމާއި ގުޅޭ ގޮތުން މަސައްކަތްތަކެއް ކުރަމުން ގެންދެވި ކަމަށް މިނިސްޓަރ ވިދާޅުވިއެވެ.
އެގޮތުން، ފުލުހުންގެ އަދަދަށް ނުވަތަ ފުލުހުންގެ ތެރެއަށް އިތުރު ބެޗެއް ލިބުމަށް ވަރަށް ބޮޑަށް ފިނޭންސާ އެކު މަޝްވަރާ ކުރަމުން ދިޔަ ކަމަށާއި އަދި އެކަން ކޮށް ދެއްވާނެ ފުލުހުން ދެންނެވި ކަމަށް މިނިސްޓަރ ވިދާޅުވިއެވެ. އެހެން ނަމަވެސް ކޮވިޑްގެ ހާލަތާއި ގުޅިގެން ފުލުހުންގެ އަދަދު އިތުރު ކޮށް ދެވެން ނެތް ކަމަށް ފިނޭންސުން ވިދާޅުވެފައިވާ ކަމަށް މިނިސްޓަރ ވިދާޅުވިއެވެ.
ރާއްޖޭގައި ފުލުހުންގެ ހިދުމަތް ގާއިމްވެފައި ނުވާ ރަށްތަކުގެ އަދަދު މިހާރު ނިސްބަތުން މަދު ނަމަވެސް، އަދިވެސް ބައެއް ރަށްރަށުގައި އެއްވެސް ވަރަކަށް ފުލުހުންގެ ހިދުމަތް ނުދެވި އެބަހުއްޓެވެ.
