ކޮވިޑްގެ ދެވަނަ ރާޅާއިއެކު ސްޕެއިނުން ކާފިއު އިއުލާން ކުރަނީ

ކޮވިޑް-19 އަށް ޕޮޒިޓިވްވާ މީހުންގެ އަދަދު އިތުރުވަމުން އަންނާތީ ސްޕެއިންގެ ސަރުކާރުން ކާފިއު އިއުލާލް ކުރަން ނިންމައިފިއެވެ.

ސްޕެއިންގެ ސިއްހަތާއި ބެހޭ ވަޒީރު ސަލްވެޑޯ އިޔާ ވިދާޅުވީ ކޮވިޑަށް ޕޮޒިޓިވްވާ މީހުންގެ އަދަދު ދުވަހެއް ދުވަހަކަށް އަންނަނީ އިތުރުވަމުން ކަމަށާއި، މިއީ ސްޕެއިންއަށް ކޮވިޑްގެ ދެވަނަ ރާޅު ކަމަށާއި، އެހެން ކަމުން މިހާރު އެޅިފައިހުރި ރައްކާތެރިކަމުގެ ފިޔަވަޅު އިތުރަށް ވަރުގަދަ ކުރުމަށް ނިންމާފައިވާ ކަމަށެވެ. އެގޮތުން ކާފިއު ވަގުތު އިއުލާން ކުރުމަށް ނިންމާފައިވާ ކަމަށް އިޔާ ވިދާޅުވިއެވެ.

ފާއިތުވެދިޔަ ދެ ހަފްތާއަކީ ޔޫރަޕްގެ ގައުމުތަކުން ކޮވިޑަށް މީހުން ޕޮޒިޓިވްވާ އަދަދު އަންނަނީ އިތުރުވަމުންނެވެ. އެގޮތުން ޖަރުމަނުންނާއި ބެލްޖިއަމުން ވެސް ވަނީ ކޮވިޑް ކޮންޓްރޯލް ކުރުމަށް އަޅާފައިވާ ފިޔަވަޅުތައް އިތުރަށް ވަރުގަދަ ކުރުމުގެ މަސައްކަތް ކުރަމުން އަންނަ ކަމަށް ބުނެފައެވެ.

ސްޕެއިންގެ ސިއްހަތާއި ބެހޭ ވަޒީރު ވިދާޅުވީ ކާފިއު އެއް ގެނައުމަށް ނިންމީ ކޮވިޑްގެ ކޭސްތައް މިހާރު އިތުރުވަމުން އަންނަ ވަރަށް އިތުރުވަމުންދާނަމަ ކޮވިޑް ކޮންޓްރޯލް ކުރެވޭނެ ކަމުގެ ބިރު އޮތުމުން ކަމަށާއި، ސްޕެއިންގެ ސަރުކާރުން ވިސްނާނީ ރައްޔިތުންގެ ސިއްހަތަށް ކަމަށެވެ.

މީގެ އިތުރުން އިޔާ ވިދާޅުވީ ކޮވިޑްގެ ވެކްސިން ގަތުމަށް އެކި ކުންފުނިތަކާއި ވާހަކަ ދައްކަމުން އަންނަ ކަމަށާއި، ވެކްސިނެއް ގަންނަނަމަ ގަންނާނީ ޑަބްލިއުއެޗްއޯއިން ވެކްސިން އެޕްރޫވްކުރުމުން ކަމަށެވެ.

ސްޕެއިންއަކީ މުޅި ދުނިޔެއިން 5 ވަނަ އަށް އެންމެ ގިނަ މީހުން ކޮވިޑަށް ޕޮޒިޓިވްވި ގައުމެވެ. އެގައުމުން މިހާތަނަށް 1،015،795 މީހުން ކޮވިޑަށް ޕޮޒިޓިވްވެފައިވާއިރު، މި ބަލީގައި 33.992 މީހުން ވަނީ މަރުވެފައެވެ.