ރިސޯޓްތަކުގައި ރީބްރޯޑްކާސްޓިންގެ ހިދުމަތް ފުޅާކުރުމަށް މަޝްވަރާކޮށްފި
ރާއްޖޭގެ ރިސޯޓްތަކުގައި ފަތުރުވެރިންނަށް ރީބްރޯޑްކާސްޓިންގެ ހިދުމަތް ފޯރުކޮށްދޭ ގޮތާއި ގުޅޭ ގޮތުން މަޝްވަރާކުރި
ބްރޯޑްކޮމްގެ ރައީސް އަދި ނައިބު ރައީސް އަންގާރަ ދުވަހު ޓޫރިޒަމް މިނިސްޓަރ އާއި ބައްދަލުކުރައްވާފައި
ރިސޯޓްތަކުގައި ރީބްރޯޑްކާސްޓިންގެ ހިދުމަތް ފުޅާކުރުމަށް ބްރޯޑްކާސްޓިން ކޮމިޝަން އިން ޓޫރިޒަމް މިނިސްޓަރ އަބްދުﷲ މައުސޫމް އާއި އެކު މަޝްވަރާކޮށްފިއެވެ.
ބްރޯޑްކޮމްގެ ރައީސް މަރިޔަމް ވަހީދާ އަދި ނައިބު ރައީސް އަހްމަދު ގައިސް ވަނީ އަންގާރަ ދުވަހު ޓޫރިޒަމް މިނިސްޓަރ އާއި ބައްދަލު ކުރައްވާފައެވެ.
މި ބައްދަލު ވުމުގައި ރާއްޖޭގެ ރިސޯޓްތަކުގައި ފަތުރުވެރިންނަށް ރީބްރޯޑްކާސްޓިންގެ ހިދުމަތް ފޯރުކޮށްދޭ ގޮތާއި ގުޅޭ ގޮތުން ވަނީ މަޝްވަރާ ކުރައްވާފައެވެ. އަދި ރިސޯޓްތަކުގައި މި ހިދުމަތް ފުޅާކުރުމުގެ ގޮތުން ސްޓޭކްހޯލްޑަރުންނާއި އެކު ބައްދަލުކޮށް މަޝްވަރާ ކުރުމަށް ވެސް ވަނީ ނިންމާފައެވެ.
ރާއްޖެއަށް އަންނަ ފަތުރުވެރިންނަށް ދޭ ހިދުމަތްތަކުގެ ފެންވަރު ރަނގަޅު ކުރުމަށް ޓޫރިޒަމް މިނިސްޓްރީން އަންނަނީ ގިނަ މަސައްކަތްތަކެއް ކުރަމުންނެވެ.
ކޮވިޑް-19 ގެ ސަބަބުން ގިނަ ދުވަސްތަކެއް ވަންދެން ރާއްޖޭގެ ފަތުރުވެރިކަން މެދުކަނޑާލާފައި އޮތުމަށް ފަހު އަލުން ފަތުރުވެރިކަން ފަށާފައިވާ އިރު، ސަރުކާރުގެ އަމާޒަކީ ރާއްޖެ އަކީ ފަތުރުވެރިންނަށް ރައްކާތެރި ތަނެއްގެ ގޮތުގައި އިޝްތިހާރުކޮށް މާކެޓްތަކުގެ އިތުބާރު ހޯދައި އެ އިތުބާރު ދެމެހެއްޓުމެވެ.
